Read Batak Karo HABAKUK 3 Bible Online

HABAKUK 3 - Batak Karo bible

HABAKUK 3

¹Enda me pertoton Nabi Habakuk:

²O TUHAN, enggo kubegi kai si enggo ibahanNdu, e maka mbiar kal aku. Genduari lakoken dingen cidahken lah i bas tahun-tahun kegeluhen kami, perbahanen si mbelin bagi si enggo ilakokenNdu mbarenda. Aminna nembeh pe ateNdu, mekuahlah min ateNdu kempak kami.

³Dibata reh mulihi i Edom nari, Dibata si Badia reh i bas uruk-uruk i Paran nari. KiniulinNa nutupi langit kerina, doni dem alu pujin man baNa.

⁴TerangNa bali ras kilap mesilo terang erkinar-kinar i bas tanNa nari, i bas terang kuasaNa terbuni.

⁵Arah lebeNa erdalan penakit laya-laya, arah pudiNa ngarak-ngarak kematen.

⁶Adi ngadi Ia erdalan, doni mugur-ugur, itulihkenNa saja, bangsa-bangsa nggirgir. Deleng-deleng si enggo lit nai-nai nari pecah, uruk-uruk si paguh gedap ku teruh; inganNa erdalan nuria nari.

⁷Kuidah bangsa Kusan mbiar, bangsa Midian nggirgir

⁸Lau belin kin si mahanca ateNdu nembeh TUHAN? Lawit kin si mahanca gara ateNdu, seh maka iersakndu kudaNdu, ras gereta perang kemenangenNdu?

⁹Kam enggo sikap make panahNdu sikap manahken anak panahNdu. PerkasNdu mahanca doni beka.

¹⁰Tupung deleng-deleng ngidah Kam, nggirgir ia; lau mambur i langit nari. Lau si i teruh doni ergeruhguh, galumbang mbelin ergalun-galun.

¹¹Matawari ras bulan la miser ibahan anak panahndu si kabang erbinar ibahan sinalsal lembingNdu si erndilap.

¹²Alu pusuh gara isiarNdu doni enda; alu pernembeh ateNdu iperjakiNdu bangsa-bangsa.

¹³Berkat Kam engkelini bangsaNdu engkelini raja pilihenNdu. IdumpangNdu peminpin kalak jahat pengikut-pengikutna ikernepkenNdu seh keri.

¹⁴Anak panahNdu nelpusken takal puanglima tupung ia reh desken banjir lako engkernepken kami, si ermeriah ukur desken kalak si enggo nelen kalak musil erbuni-buni.

¹⁵Lawit iperjakiNdu alu kudaNdu, e maka lau si mbelang rugup-ugup.

¹⁶Enggo kubegi si e kerina, e maka nggirgir aku; biberku pe nggirgir ban biarku. Tulan-tulanku tempa-tempa medate, nahengku siantuken i teruh. Alu teneng kutimai paksa si reh i ja iukum Dibata kalak si reh nerang kita.

¹⁷Aminna pe batang ara la erbunga batang anggur la lit buahna, aminna pe batang saitun la lit asilna, perjuma la rulih gia, aminna pe biri-biri mate kerina, dingen enggo keri lembu i bas karangna,

¹⁸tetap nge aku ermeriah ukur i bas TUHAN erkiteken Dibata kap si ngkelini aku.

¹⁹ TUHAN kap si mereken gegeh man bangku desken nahe belkih, paguh ibahanNa perdalanku; e maka la celus nahengku aminna erdalan pe aku i deleng-deleng si meganjang. [6†]