Read Batak Karo SEPANYA 1 Bible Online

SEPANYA 1 - Batak Karo bible

SEPANYA 1

¹Enda me berita i bas TUHAN nari si seh man Sepanya tupung Josia anak Amon jadi raja i Juda. (Sepanya e me kesusuren Raja Hiskia arah Amaria, Gedalya, ras Kusi.) [1†]

²Nina TUHAN, “Kukernepken ateKu kerina si lit i doni,

³manusia, bage pe nurung, perik-perik ras rubia-rubia si debanna. Kalak jahat Kudabuhken. Kerina manusia Kukernepken, janah la lit sada pe itadingken. Aku TUHAN, enggo melasken katangKu.

⁴Kuukum kerina kalak si ringan i Jerusalem ras kerina kalak Juda. Kumasapken kerina si lit denga tading kerna sembah-sembahen Baal, seh maka lanai lit ise pe ngingetsa imam-imam perbegu si erdahin guna Baal e.

⁵Kukernepken kerina kalak si lawes ku tarum rumah lako nembah matawari, bulan ras bintang-bintang. Jenari Kukernepken pe kalak si nembah dingen ersumpah erkemalangen man bangKu, tapi kenca bage ersumpah ka ia i bas gelar Dewa Milkom.

⁶Kukernepken kerina kalak si enggo surut dingen lanai ngikutken Aku, kerina kalak si la reh man bangKu tah pe mindo penegu-negu i bas Aku nari.”

⁷Wari TUHAN enggo ndeher; Ia enggo sikap nehken ukumen; dage siniklah i adep-adepenNa. TUHAN enggo sikap nggeleh bangsaNa desken asuh-asuhen persembahen.

⁸Nina TUHAN, “I bas wari penggelehen e, Kuukum kerina pegawai, anak-anak raja, ras kerina kalak si ndalanken adat bangsa si deban.

⁹Kuukum kerina kalak si nembah bagi perbegu bage pe kerina kalak si nangko ras munuh ndemi rumah tuanna alu barang-barang rampasen.”

¹⁰“I bas wari e,” nina TUHAN, “ibegindu me sora nderkuh i Pintu Gerbang Nurung i Jerusalem. Ibegindu me sora ngandung i bas bagin si mbaru i bas kuta e dingen sora erderak-derak si megang i das uruk-uruk.

¹¹Ngandung dingen nderkuhlah kam adi ibegindu si enda, kam si ringan arah berneh kuta, erkite-kiteken mate me kerina perbinaga.

¹²I bas paksa e Kugargari kuta Jerusalem alu maba lampu. Kuukum kerina kalak si la akapna lit man kebiarenna, si ngerana i bas ukurna nina, ‘Kai pe labo ibahan TUHAN, subuk si mehuli tah si jahat.’

¹³Kalak si bage, irampasi kebayakenna, rumahna iradasken. Lanai ndigan pe ia ringan i bas rumah si ipajekkenna, lanai ndigan pe iinemna lau anggur i bas peken anggur si isuanna.”

¹⁴Wari TUHAN si mbelin enggo ndeher -- enggo seh kal deherna janah pedas me ia reh! Wari e wari si pagit kap, i ja serdadu si merawana pe nderkuh perban biarna!

¹⁵Wari e wari pernembeh ate si gara, wari kiniseran ras aru ate, wari kerontasen ras kemasapen, wari si geltem dingen gelap, mbiring dingen meremang,

¹⁶wari si gejek erkiteken sora terompet-perang ras surak-surak perang tentera si nerang kuta-kuta si erbenteng dingen ermenara meganjang.

¹⁷Nina TUHAN, “Kubahan kecedan si bage nandangi manusia, seh maka kerina kalak terdadap-dadap bagi kalak pentang. Sabap enggo erdosa ia man bangKu, e maka genduari iamburken me darehna bagi lau, janah maitna ampar-ampar seh macik i babo taneh.”

¹⁸I bas warina TUHAN encidahken pernembeh ateNa si gara, kerina pirak ras emasna pe labo ngasup engkelinisa. Kerina doni keri ikernepken api pernembeh ate TUHAN. IkerikenNa rempet tep-tep kalak si ringan i doni.