Read Batak Karo SEPANYA 2 Bible Online

SEPANYA 2 - Batak Karo bible

SEPANYA 2

¹O bangsa si la meteh mela, rukurlah kam

²ope denga kam ikabangken bagi segal, ope denga pernembeh ate TUHAN si gara reh ku kam, ope denga seh warina Ia ncidahken rawaNa.

³Mulihlah kempak TUHAN o kam kerina si meteruk rukur i bas negeri enda, si ngikutken perentahNa. Lakokenlah kai si benar, janah peteruk bandu i adep-adepen TUHAN. Mbera-mbera pulah kam i bas ukumen nari tupung warina TUHAN encidahken pernembeh ateNa.

⁴La lit sekalak pe pagi tading i Gasa. Askelon jadi melungen. Kalak si ringan i Asdot ipelawes ope ciger wari, janah kalak Ekron ipelawes i kutana nari. [2†]

⁵Cilaka me kam, o kalak Pilisti, o kam kalak si ringan segedang-gedang tepi lawit. TUHAN enggo ndabuhken ukumen man bandu. IkernepkenNa me kam, janah la lit sekalak pe kam si tading.

⁶Tanehndu si i tepi lawit salih pagi jadi mbalmbal man ingan sapo-sapo permakan ras karang biri-biri.

⁷Kalak Juda si tading engkuasai tanehndu. Ipermakanina pagi rarasenna i je janah medem i bas rumah Askelon. Sabap TUHAN Dibatana kap ras ia dingen ibahanNa maka senang ka akapna mulihi.

⁸Nina TUHAN si Mada Kuasa, “Enggo Kubegi kalak Moap ras Amon megombang ras naling-naling bangsangKu. Alu cakap meganjang ikatakenna maka irampasna me tanehna. [3†]

⁹Asa tuhu Aku Dibata si nggeluh nu Israel, ersumpah Aku maka Moap ras Amon nandangi ikernepken bali ras Sodom ras Gomora. Nandangi salih me ingan si dua e jadi embang sira ras kerontasen dingen rambahen ibahan dukut. BangsangKu si tading ngerampasi dingen muat tanehna.” [4†]

¹⁰Bage me bangsa Moap ras Amon iukum, erkite-kiteken kiniganjangen ukurna dingen megombang ia man bangsa TUHAN si Mada Kuasa,

¹¹Gentar me ia ibahan TUHAN. IkerikenNa me kerina dibata-dibata si i doni enda, janah kenca bage tep-tep bangsa nembah me man baNa, sada-sadai i bas negerina jine.

¹²Bangsa Sudan pe ibunuh TUHAN. [5†]

¹³Ikernepken TUHAN me Ashur alu kuasaNa. Kuta Niniwe ibahanNa jadi runtuhen si terulang, gurun si la erlau. [6†]

¹⁴I je pagi gempang rarasen asuh-asuhen ras kerina erbage rubia-rubia si deban. Kalingkupa ringan i bas runtuhenna dingen ersora-sora i bas jendelana nari, bage pe kak erkak-koang i bas tanggana. Kayu ingul si ipake jadi perkayun rumahna kerina ibongkar.

¹⁵E me si nandangi jadi man kuta si megah kal akapna kerna gegehna dingen la lit kai pe iakapna si man kebiarenna. Kalak si ringan i je erpengakap maka kutana kuta si megahna i belang-belang doni enda. Andiko, uga lungenna pagi ingan e jadina, i ja rubia-rubia si meliar ringan. Kasa kalak si mentas arah e ndegeri mbuluna jenari itadingkenna perban biarna.