Read Batak Karo SEPANYA 3 Bible Online

SEPANYA 3 - Batak Karo bible

SEPANYA 3

¹Cilaka me Jerusalem, kuta si macik dingen pemberontak e, kuta si nindih pendudukna jine.

²La ibegikenna TUHAN, la iikutkenna pengajarenNa. La ia ernalem man TUHAN, la ia mindo penampat man baNa.

³Peminpin-peminpin kuta e desken singa si erdengum, hakim-hakimna desken serigala si kelihen, si la nggit nadingken sempenggel pe tulan-tulan seh erpagi-pagi perban rangapna.

⁴Nabi-nabina la ertanggung jabab, la terteki; imam-imamna ngeliami kai si badia, dingen ipegedukna Undang-undang Dibata guna keuntungenna jine.

⁵Tapi TUHAN i bas kuta e denga kap. IlakokenNa kai si benar dingen la pernah idalankenNa si salah. Tep-tep erpagi-pagi la Ia lupa mereken keadilen man bangsaNa. Amin bage pe kalak jahat si lit i bas kuta e la erngadi-ngadi ngelakoken si salah janah la meteh mela.

⁶Nina TUHAN, “Enggo Kusasapken kerina bangsa-bangsa; enggo Kukernepken kuta-kutana dingen tembok-tembok ras menara-menarana Kuradasken. Kuta e enggo melungen; pasar-pasar enggo lume lanai lit si tading i je.

⁷Kuakap kin maka kenca bage mbiar bangsangKu man bangKu dingen ialokenna pengajarenKu, janah dingen pe lanai ia lupa pengajaren si Kuajarken man bana. Tapi kepeken minter ia lupa, janah lagu langkahna seh macikna bagi si nggo-nggona.”

⁸“Timailah,” nina TUHAN. “Timailah seh warina Aku keke jadi saksi ngaduken bangsa-bangsa. Enggo Kutetapken mpepulung bangsa-bangsa ras kerajan-kerajan, gelah inanamina uga sangatna rawangKu. Kerina doni kernep erkiteken api pernembeh ateKu.

⁹Kenca bage Kusambari me cakap bangsa-bangsa jadi cakap si badia, janah man bangKu saja ngenca ia ertoto, lanai man dibata-dibata si deban. Kerina ia ngikutken Aku.

¹⁰I bas negeri Sudan si ndauh e nari pe bangsangKu si merap maba persembahen man bangKu.

¹¹I bas paksa si e pagi, kam o bangsangKu, lanai perlu mela kerna kam nai mberontak man bangKu. Kupelawes kerina kalak megombang dingen meganjang rukur, janah ndigan pe lanai kam mberontak man bangKu i das delengKu si badia e.

¹²Kutadingken i je ringan kalak musil dingen meteruk rukur, si nggit reh man bangKu mindo penampat.

¹³Kalak Israel si tading denga la nggit erbahan salah man ise pe, la ia ernubuat man ise pe, dingen la icubakenna nipu. Teneng dingen senang iakapna, janah la ise pe ia mbiar.” [7†]

¹⁴Rende dingen ersurak meriahlah, o kalak Israel! Meriahlah alu bulat ukurndu, o Jerusalem!

¹⁵ TUHAN enggo ndungi ukumenndu; enggo ipelawesNa kerina musuh-musuhndu. TUHAN, raja Israel, ras kam kap; genduari lanai perlu kam mbiar.

¹⁶Paksana reh me i ja ikataken kalak man Jerusalem, “Ola mbiar o Kuta Sion! Ola bere tanndu kote.

¹⁷ TUHAN Dibatandu ras kam kap; kuasaNa mereken kemenangen bandu. Ngena ateNa kam dingen i bas keleng ateNa iberekenNa bandu geluh si mbaru. Rende dingen ermeriah ukur Ia erkiteken kam,

¹⁸bali riahna ras kalak si i bas pesta.” Nina TUHAN, “Kerina si suin enggo Kupepulung, enggo Kuambekken si erbahanca akapndu mela.

¹⁹Paksana enggo seh! Kuukum me si nindih kam; Kupulahi kalak si cempang-cempang, kalak si terbuang Kutaruhken mulih. Si mahanca akapna mela Kusalihken jadi kehamatenna, dingen kerina doni mujiken ia.

²⁰Paksana enggo reh! Bangsandu si merap Kutaruhken mulih; Kubahan kam terberita i belang-belang doni, janah senang ka akapndu mulihi.” Bage nina TUHAN.