Read Batak Karo HAGAI 2 Bible Online

HAGAI 2 - Batak Karo bible

HAGAI 2

¹I bas wari dua puluh sada, bulan pepituken, i bas tahun e, reh kata TUHAN arah Nabi Hagai.

²IsuruhNa Hagai ngataken man Serubabel gubernur Juda, Imam si Mbelin, bage pe man bangsa e bagenda,

³“Lit kam si ngingetsa uga jilena nai Rumah Pertoton e? Uga iidahndu genduari? Ma lanai tempa kai-kai pe si genduari e? [2†]

⁴Tapi ola sada pe tumpat ukurndu. Teruskenlah ndahiken dahin e, sabap Aku kap ras kam.

⁵Tupung kam ndarat i Mesir nari, erpadan Aku maka Aku tetap ras kam. Genduari pe Aku tetap nge ras kam, e maka ola kam mbiar. [3†]

⁶Lanai ndekahsa Kuugur me langit ras doni, lawit ras daraten. [4†]

⁷Kuugur kerina bangsa-bangsa, erta-ertana ibaba ku jenda, maka Rumah Pertoton e dem alu kemulian.

⁸Kerina emas ras pirak i doni enda Aku empuna.

⁹Rumah Pertoton si mbaru e, jilen pagi asa si nai, janah i je Kubereken kesenangen ras dame man bangsangKu.” Bagenda me nina TUHAN si Mada Kuasa.

¹⁰I bas wari dua puluh empat, bulan pesiwahken tahun peduaken kenca Darius jadi raja, reh kata TUHAN arah Nabi Hagai.

¹¹Nina, “Sungkun imam-imam uga peraturenna enda:

¹²Adi lit sekalak jelma maba tare jubahna sengkeret daging si badia, e me daging si enggo ipersembahken, jenari ipelepasna jubahna e engkenai roti, pangan si enggo tasak, anggur, minak saitun, tah pe erbage-bage pangan si debanna, enggo nge jadi badia ibahanna pangan ndai pe?” Erjabap imam-imam nina, “Lang.”

¹³Kenca bage nungkun ka Hagai nina, “Adi lit sekalak jelma keliamen erkite-kiteken terjemaksa mait, kenca bage terdegessa ka pangan si apai gia, keliamen nge ibahanna pangan ndai pe?” Ngaloi imam-imam e nina, “Keliamen.” [5†]

¹⁴Kenca bage nina Hagai, “Bage ka me kerna bangsa enda pe ras kerina bekas pendahinna; e maka kasa kai si ipersembahkenna i bas batar-batar e barang si keliamen nge.”

¹⁵Nina TUHAN, “Ma ipergermetkenndu nge kai si jadi man bandu? Ope denga ibenakenndu ngumban Rumah Pertoton e,

¹⁶adi lawes kam ku pinugun gandum, ngarap kam ndatken dua puluh ayan, tapi kepeken sepuluh ayan ngenca idatndu. Atendu njaruk lima puluh tumba anggur i bas tong nari, tapi dua puluh tumba ngenca idatndu.

¹⁷Kusuruh angin si melas bage pe udan baho, encedaken kerina sinuan-sinuanndu, tapi bage pe la ka bo kam jera-jera.

¹⁸Sendah e me wari dua puluh empat, bulan pesiwahken, i ja palas Rumah Pertoton e enggo dung. Perdiatekenlah kai si nandangi jadi i jenda nari ku wari-wari si rehna.

¹⁹Aminna lanai pe lit tading buah gandum janah batang anggur, batang ara, dingen galiman langa erbuah, tapi i jenda nari terus ku paksa-paksa si reh Kupasu-pasu me kam.”

²⁰I bas wari e, e me wari dua puluh empat bulan e, reh ka kata TUHAN pedua kaliken arah Hagai,

²¹si man sehenken man Serubabel, gubernur Juda nina, “Nandangi Kuugur me langit ras doni,

²²janah Kuruntuhken kerajan-kerajan ras kuasana. Kubenterken gereta perang ras kusirna; kuda e mate kerina bage pe si ngersaksa sibunuh-bunuhen sapih-sapih ia.

²³I bas wari e, o suruh-suruhenKu Serubabel, Kuangkat me kam jadi si erkuasa i bas gelarKu. Kam kap kalak si enggo Kupilih.” Bagenda me nina TUHAN si Mada Kuasa.