Read Batak Karo SAKARIA 1 Bible Online

SAKARIA 1 - Batak Karo bible

SAKARIA 1

¹I bas bulan pewaluhken, tahun peduaken kenca Darius jadi raja Persia, reh kata TUHAN man Nabi Sakaria anak Berekia, kempu Iddo. [1†]

²TUHAN si Mada Kuasa nuruh Sakaria ngatakenca man bangsa e nina, “Aku, TUHAN, nembeh kal ateKu kempak nini-ninindu,

³tapi genduari Kukataken man bandu: Mulihlah ku Aku, maka Aku mulih ku Kam.

⁴Ola kam bagi nini-ninindu nai. I bas paksa si nai-nai nabi-nabi nehken katangKu man bana, gelah itadingkenna kejahaten ras dosa-dosana. Tapi la ia nggit megiken ras ngikutken Aku.

⁵Nini-ninindu ras nabi-nabi e lanai nggeluh genduari.

⁶Arah nabi-nabi suruh-suruhenKu Kubereken man nini-ninindu perentah ras kata pertenget, tapi la diatena. Erkiteken si e dat kiniseran ia. Kenca bage jera ia janah iakuina maka Aku, TUHAN si Mada Kuasa enggo ngukum ia sue ras perbahanenna, bagi si enggo Kutetapken i bas ukurKu.”

⁷I bas tahun peduaken kenca Darius jadi raja, i bas wari dua puluh empat, bulan si pesepuluh sadaken (e me bulan Sebat), reh kata TUHAN man bangku arah pengenehenen.

⁸Kuidah malekat TUHAN ngersak kuda si megara. Ngadi ia i teruh batang kayu i bas sada baluren, janah arah pudina lit piga-piga kuda si deban, rupana megara, mekambing, ras mbulan. [2†]

⁹Kusungkun malekat e, ningku, “Kai ertina si e, Tuan?” Erjabap ia nina, “Banci kuturiken man bandu kai ertina.

¹⁰TUHAN nuruh kuda e kerina niar-niar doni enda.”

¹¹Kenca bage iturikenna man malekat e nina, “Enggo isiar kami doni enda, janah idah kami kerina doni enda teneng dingen dame.”

¹²Kenca bage nina malekat ndai, “O TUHAN si Mada Kuasa, enggo nembeh ateNdu man Jerusalem ras kuta-kuta Juda pitu puluh tahun dekahna. Kasa kai nari dekahna maka icidahkenNdu perkuah ateNdu man bana?”

¹³Ialoi TUHAN malekat ndai alu kata-kata pengapul si melias,

¹⁴jenari isuruh malekat e aku ermomo kerna kai si ikataken TUHAN si Mada Kuasa e; nina TUHAN, “Mbelin kal kekelengenKu man Jerusalem, dingen katangKu si badia e tetap lit i bas ukurKu.

¹⁵Tapi nandangi bangsa-bangsa si nggeluh ersenang-senang nembeh ateKu, sabap tupung Kuamper rawangKu man bangsangKu, reh ka ia ngurupi nambahi kiniseran bangsangKu e.

¹⁶Dage genduari enggo mulih Aku ku Jerusalem encidahken perkuah ateKu man kuta e. Rumahku ipajekken pagi mulihi, dingen kuta e ipanteki ka.”

¹⁷Isuruh malekat ndai ka pe aku ngatakenca bagenda, “Ikataken TUHAN si Mada Kuasa maka kerina kuta-kuta e senang ka pagi akapna mulihi, janah isampatiNa pagi sekali nari Jerusalem dingen ikatakenNa maka kuta e me kuta si kelengna kal atena.”

¹⁸I bas pengenehenen si deban kuidah empat tanduk.

¹⁹Kusungkuni malekat si pernah ngerana ras aku e ningku, “Kai ertina tanduk e?” Ngaloi ia nina, “Tanduk e nggambarken bangsa-bangsa doni si enggo engkerapken kalak Juda, Israel, ras Jerusalem.”

²⁰Kenca bage icidahken TUHAN man bangku empat kalak pande besi.

²¹Nungkun aku, “Kai ate kalak enda maka ia reh?” Ngaloi TUHAN nina, “Kalak enda reh lako pebiar-biar ras ngeruntuhken bangsa-bangsa si ngeradasken negeri Juda dingen engkerapken pendudukna.”