Read Batak Karo SAKARIA 10 Bible Online

SAKARIA 10 - Batak Karo bible

SAKARIA 10

¹Pindolah udan man TUHAN tupung paksa merdang. Sabap TUHAN kap si mahanca embun erkilap, dingen Ia si pesusursa udan, maka sinuan-sinuan meratah i juma man kerina manusia.

²Isungkuni kalak berhala-berhala ras guru pertendung, tapi jabap si idatca e me kata guak dingen la tuhu. Deba iturikenna antusen nipi, tapi si e mabai kam papak ngenca; pengapul si iberekenna la lit gunana. E maka bangsa e mampa-mampa desken biri-biri si papak. Ia ndat kiniseran erkite-kiteken la lit peminpinna. [22†]

³Nina TUHAN, “Nembeh ateKu man bangsa si deban si merentah bangsangKu. E maka Kuukum me ia. Aku kap empuna kalak Juda, e maka Aku, TUHAN si Mada Kuasa, ngarak-ngaraksa. Ia kap kuda perangKu si me gegeh.

⁴I tengah-tengah bangsa e nari reh me pagi penguasa, peminpin bage pe puanglima si ngaturken bangsangKu.

⁵Menang pagi ia desken tentera, si merjati musuh-musuhna ku bas kubang si i bas dalan. Erperang ia erkiteken TUHAN ras ia, janah subuk musuh si erkuda pe italukenna.

⁶Kubahan kalak Juda jadi megegeh, janah kalak Israel Kupulahi. Mekuah ateKu man bana, janah Kubaba ia kerina mulih, seh maka tempa-tempa la pernah Kutulak ia. Aku kap TUHAN Dibatana, janah Kubegiken pertotonna.

⁷Kalak Israel jadi megegeh pagi, bali ras tentera, janah meriah iakapna bagi kalak si minem anggur. Iinget kesusurenna me pagi kemenangen enda, janah malem atena erkiteken TUHAN.

⁸Kudilo bangsangKu, janah Kupepulung ia kerina. Kupulahi ia janah Kubahan nterem ka ia mulihi bali ras si nai.

⁹Aminna enggo pe ia Kukerapken ku tengah-tengah bangsa-bangsa, tapi i bas ingan si ndauh pe iingetna nge Aku. Mejuah-juah ia ras anak-anakna jenari mulih ras-ras ku kutana.

¹⁰Kubaba ia mulih i Mesir nari ras i Assur nari, janah Kutaruhken ia ku negerina jine, bage pe ku Gileat ras Libanon. Kerina negeri e dem pagi alu jelma.

¹¹Tupung ia mentas arah lawit ate ceda, Kupecahken galumbangna, e maka kerah Lau Nil. Assur si meganjang ukurna ipeteruk, dingen Mesir si mbisa bene kuasana.

¹²Kubahan bangsangKu megegeh; isembahna dingen ikutkenna me Aku.” Bage nina TUHAN.