Read Batak Karo SAKARIA 13 Bible Online

SAKARIA 13 - Batak Karo bible

SAKARIA 13

¹Nina TUHAN si Erdolat, “Adi enggo seh paksa si e, pultak me pagi ulu lau lako mbersihken kesusuren Daud ras kalak Jerusalem i bas dosa ras kemelketenna nari.

²I bas paksa e pagi kusasapken gelar-gelar berhala i bas negeri e nari, janah lanai ise pe pagi ngingetca. Ise si ngakuken dirina nabi Kupelawes kerina, janah sura-sura lako nembah man berhala Kuagui.

³Kenca bage adi lit denga kalak si iteruskenna ernubuat, bapa-nandena jine kap si ngatakenca man bana maka ia arus ibunuh, sabap iakukenna maka ibelaskenna kata TUHAN, tapi guak nge kepe si ibelaskenna. Adi ernubuat ia, bapana ras nandena jine kap si nebak ia.

⁴Adi enggo seh pagi paksa si e, lanai pagi lit nabi si ermegah ukur kerna pengenehenenna, tah pe pekulah-kulahna jadi nabi, tah pe make uis nabi si ermbulu lako nebu-nebu kalak.

⁵Tapi ikatakenna nina, “Aku labo nabi. Aku sekalak perjuma, janah kidekah geluhku kuperjumai tanehku.”

⁶Kenca bage adi lit kalak nungkun ia, ‘Engkai dage maka luka tentenndu?’ E maka erjabap ia nina, ‘Aku luka sanga aku i bas rumah temanku.’ ”

⁷Nina TUHAN si Mada Kuasa, “Kekekenlah o pedang, lawanlah permakan biri-biringKu! Bunuhlah ia, maka merap biri-biri e. Kulawan bangsangKu [27†]

⁸i belang-belang negeri e, dua pertelu bangsa e mate.

⁹Janah seperteluna si tading denga Kuuji dingen Kubersihken bali ras pirak ibersihken i bas api. Kuuji ia bali ras emas pe iuji. Kenca bage ertoto ia man bangKu, jenari Kualoi ia. Kukataken man bana maka ia kap bangsangKu, dingen iakuina maka Aku Dibatana.”