Read Batak Karo SAKARIA 14 Bible Online

SAKARIA 14 - Batak Karo bible

SAKARIA 14

¹Nehenlah, wari ukumen TUHAN enggo ndeher. Tupung e pagi Jerusalem irampasi, janah barang rampasen e ibagi-bagiken i lebe-lebe matandu.

²Ipepulung TUHAN kerina bangsa-bangsa merangi Jerusalem. Kuta e ikuasaina, rumah-rumahna irampasina, dingen diberu-diberu igagahina. Setengah i bas anak kuta e ibaba ku pembuangen, si lebihna la ibaba ndarat i bas kuta e nari.

³Kenca bage ndarat me TUHAN ngelawan bangsa-bangsa e, bali ras si ibahanNa i bas paksa-paksa si enggo lepas.

⁴I bas paksa e pagi tedis Ia i Deleng Saitun, arah kenjulu kuta Jerusalem. Kenca bage Deleng Saitun erbelah jadi dua i kenjahe nari ku kenjulu alu sada baluren si mbelang. Sembelah i bas deleng e miser ku Utara dingen sembelah nari ku Selatan.

⁵Kam lompat arah baluren si mbagi deleng e jadi dua. Kiam me kam bali ras nini-ninindu nai kiam tupung lit linur sanga pemerentahen Usia, raja Juda. TUHAN Dibatangku reh nge, dingen ibabaNa kerina malekat-malekat ras Ia.

⁶Tupung e pagi, lanai mbergeh tah pe salju,

⁷lanai lit kegelapen. Katawari pe terang bagi suari, subuk sanga berngi pe. Ndigan si enda jadi, TUHAN ngenca metehsa.

⁸Tupung e pagi, maler lau malem i Jerusalem nari, sembelah maler ku Lawit Mate, janah sembelah nari ku Lawit Tengah. Lau e maler gedang-gedang tahun, subuk sanga paksa perlego bage pe paksa perudan. [28†]

⁹Kenca bage TUHAN jadi raja doni enda kerina; tep-tep kalak nembah Ia selaku Dibata janah gelarNa ngenca itandai kalak i japa pe.

¹⁰Kerina daerah e, mulai i Geba nari i Utara seh ku Rimon i Selatan, ipekendit kerina. Jerusalem pagi ingan si meganjangna, mulai i Pintu Gerbang Benyamin nari seh ku Pintu Gerbang Suki ingan pintu gerbang si lit nai, jenari mulai i Menara Hananel nari ku pengeriken gandum kerajan.

¹¹Bangsa e ringan i je alu teneng, lanai lit kebiarenna. [29†]

¹²Kerina bangsa-bangsa si merangi Jerusalem iukum TUHAN salu penakit si mekelek. Dagingna macik tupung ia nggeluh denga; matana macik i bas lubang matana dingen dilahna macik i bas babahna.

¹³I bas paksa e pagi, sengget kal ia kerina seh maka itangkapna kalak si ndeher ras ia jenari igudamna.

¹⁴Kalak Juda erperang lako mpertahanken Jerusalem. Kebayaken kerina bangsa-bangsa ibuatna jadi barang rampasen -- emas, pirak, bage pe uis si lanai tanggung buena.

¹⁵Kuda, kuda kitik-kitik, unta, bage pe kelede, asuh-asuhen si lit i bas perkemahen musuh, kerina kena penakit.

¹⁶Kenca bage kerina kalak si tading denga i bas bangsa-bangsa si merangi Jerusalem e, lawes ku kuta e tep-tep tahun nembah TUHAN si Mada Kuasa selaku raja, dingen ngerayaken Wari Raya Sapo-sapo. [30†]

¹⁷Adi lit bangsa si la nggit reh ku je nembah man TUHAN si Mada Kuasa, e maka legon tanehna.

¹⁸Adi kalak Mesir la nggit reh ngerayaken Wari Raya Sapo-sapo, e maka ia pe kena penakit seri ras si itamaken TUHAN man kerina bangsa-bangsa si la nggit reh.

¹⁹E me ukumen si isehken man Mesir ras kerina bangsa-bangsa si deban adi la irayakenna Wari Raya Sapo-sapo.

²⁰I bas paksa e pagi subuk giring-giring si lit i bas pasangen kuda pe isurati alu kata-kata, “Ipersembahken guna TUHAN.” Kudin penanggeren si lit i bas Rumah Pertoton bali badiana ras mangkuk si lit i lebe-lebe batar-batar.

²¹Tep-tep kudin si lit i Jerusalem ras i belang-belang Juda iserapken guna ipake nembah man TUHAN si Mada Kuasa. Kalak si mpersembahken persembahenna, ipakena me kudin e lako nanggerken daging persembahenna. Adi enggo seh pagi paksa si e, lanai lit perbinaga i bas Rumah Pertoton TUHAN si Mada Kuasa.