Read Batak Karo SAKARIA 2 Bible Online

SAKARIA 2 - Batak Karo bible

SAKARIA 2

¹I bas pengenehenen si deban kuidah sekalak dilaki njemak tinali sibar-sibar.

²“Ku ja kam e?” ningku man bana. “Ku Jerusalem, lako nibarisa, ntah kasa kai belangna ras gedangna,” nina ngaloi.

³Kenca bage kuidah reh malekat si pernah ngerana ras aku e, jenari reh ka malekat si deban njumpaisa.

⁴Nina malekat si pemena ndai man si sada nari, “To kiamken, janah kataken man anak perana si njemak tinali sibar-sibar ah maka nandangi nterem kal denggo jelma ras asuh-asuhen i Jerusalem seh maka lanai siat adi ibahan tembokna.

⁵TUHAN enggo erpadan maka Ia jine kap jadi tembok api sekelewet kuta e lako engkawalisa, dingen i je me Ia ringan alu dem kemulian.”

⁶ [6-7] Ikataken TUHAN man bangsaNa, “Enggo Kukerapken kam ku japa pe. Tapi genduari, o kalak buangen, lompatlah i Babilon nari, janah mulihlah ku Jerusalem.

⁸Ise si mekpek kam, anak matangKu jine kap si ipekpekna e.” E maka TUHAN si Mada Kuasa nuruh aku nehken berita enda man bangsa-bangsa si enggo ngerampasi bangsaNa nina,

⁹“TUHAN jine kap si ngelawan kam kerina, janah bangsa si enggo pernah jadi suruh-suruhenndu ngerampasi kam me pagi.” Kenca jadi pagi si enda, kerina pagi kalak meteh maka TUHAN si Mada Kuasa kap si nuruh aku.

¹⁰Nina TUHAN, “Rendelah alu meriah, o kalak Jerusalem! Reh nge Aku ringan i tengah-tengahndu!”

¹¹I bas paksa e pagi melala bangsa reh ndahi TUHAN janah jadi bangsaNa. Ringan me Ia i tengah-tengahndu.

¹²Sekali nari Juda jadi pusaka TUHAN i bas tanehNa si badia e, janah Jerusalem me kuta si kelengna kal ateNa.

¹³Siniklah i adep-adepen TUHAN o kerina jelma, sabap enggo berkat Ia i bas inganNa si badia nari.