Read Batak Karo SAKARIA 3 Bible Online

SAKARIA 3 - Batak Karo bible

SAKARIA 3

¹I bas pengenehenen si deban icidahken TUHAN man bangku Imam si Mbelin, Josua, sangana tedis i lebe-lebe malekat TUHAN. Deherken Josua tedis si Iblis, janah enggo sikap ia ngaduken Josua. [3†]

²Ikataken malekat TUHAN man Iblis nina, “Iukum TUHANlah kam, o Iblis! TUHAN si erkeleng ate man Jerusalem ngukum kam gelah! Josua bali kap ras ranting si isintapken i bas api nari.” [4†]

³Josua sangana tedis i je i lebe-lebe malekat e make uis melket.

⁴Nina malekat ndai man suruh-suruhenna, “Tangtangi uis melket si ipakena e.” Kenca bage nina kempak Josua, “Enggo kusasapken dosandu janah kubereken me man bandu uis mbaru.”

⁵Iperentahkenna suruh-suruhenna makeken bulang si bersih man Josua. Minter ilakoken suruh-suruhen e sue ras si iperentahken man bana, kenca bage ipakekenna man Josua uis si mbaru, janah sanga bage malekat TUHAN ndai tedis i je.

⁶Kenca bage ikataken malekat ndai man Josua maka

⁷enggo ikataken TUHAN si Mada Kuasa bagenda, “Adi iikutkenndu Undang-undangKu dingen ilakokenndu kai si Kusuruh kam ngelakokenca, e maka tetap kam erkuasa i bas Rumah PertotonKu ras kesainna, janah Kubegiken pertotonndu, bagi Kubegiken pertoton malekat-malekat si lit i adep-adepenKu.

⁸Dage begikenlah, o Josua, kam Imam si Mbelin; janah begikenlah o imam-imam teman-teman Josua, kam si jadi gambaren kerna paksa si reh si mehuli: Kupetangkas me suruh-suruhenKu si igelari Dahan. [5†]

⁹Kutamaken me i lebe-lebe Josua sada batu si pitu ayona. I bas batu e Kuukir sada tulisen, janah i bas sada wari saja pe enggo keri Kubahan masap dosa negeri enda.

¹⁰Kenca seh pagi wari si e, sekalak-sekalak kam ndilo temanna gelah reh ngenanami kesenangen ras ketenangen i tengah-tengah peken anggur ras batang arana.” [6†]