Read Batak Karo SAKARIA 5 Bible Online

SAKARIA 5 - Batak Karo bible

SAKARIA 5

¹Jurgak ka aku, janah sekali enda kuidah surat gulungen kabang.

²Isungkun malekat ndai aku kai si kuidah. Erjabap aku ningku, “Kuidah sada surat gulungen kabang; gedangna siwah meter dingen belangna empat setengah meter.”

³Kenca bage nina bangku, “I je me tersurat sumpah si ipebelang ku kerina negeri e. Arah sembelah tersurat maka kerina pinangko isintapken i bas negeri e nari; janah arah si sembelah nari ikataken maka kasa kalak si melasken sumpah palsu ia pe ibuat.

⁴TUHAN si Mada Kuasa ngatakenca maka isuruhNa me sumpah e lawes, maka ibengketina tep-tep rumah pinangko ras rumah kalak si melasken sumpah palsu i bas gelarKu. Tading me sumpah e i bas rumah kalak e jenari radas ibahanna rumah e.”

⁵Teridah ka mulihi malekat ndai janah nina man bangku, “Nehenlah! Lit ka si deban si reh!”

⁶“Kai e?” ningku nungkun. Erjabap ia nina, “Enda me kap sada tong, janah tong e nggambarken dosa kerina negeri e.”

⁷Tong ndai lit tutupna, ibahan i bas timah nari. Tupung kupernehen, italangi tutupna, janah i bas tong e kundul sekalak diberu!

⁸Nina malekat e, “Diberu enda nggambarken kejahaten.” Kenca bage ijemjemkenna diberu e mulihken ku bas tong ndai, kenca bage itutupina mulihken alu timah ndai.

⁹Kutare ku das janah kuidah dua kalak diberu kabang kempak aku; kabengna megegeh kal bali ras kabeng perik ondan. Iangkatna tong ndai kenca bage ikabangkenna.

¹⁰Kusungkun malekat ndai, “Ku ja ibabana e?”

¹¹Erjabap ia nina, “Ku Babilon, i je me ipajekkenna rumah persembahen man keranjang e. Kenca dung pagi rumah persembahen e, i je me itamakenna keranjang e jadi sembah-sembahen.”