Read Batak Karo SAKARIA 6 Bible Online

SAKARIA 6 - Batak Karo bible

SAKARIA 6

¹Kuidah ka pengenehenen si deban. Sekali enda empat gereta perang ndarat arah kelang-kelang dua deleng tembaga.

²Gereta perang si pemena kuda megara si ngerintaksa, si peduaken kuda mbiring, [11†]

³si peteluken kuda mbentar, janah gereta si peempatken kuda mekambing ngerintaksa. [12†]

⁴Kenca bage kusungkun malekat e, “Kai antusenna gereta perang e, tuan?” ningku.

⁵Erjabap ia nina, “E me angin si empat si rehna ibas adep-adepen TUHAN nari, TUHAN nu kerina doni.” [13†]

⁶Gereta perang si irintak kuda mbiring lawes ku Babilon i Utara, si irintak kuda mbentar lawes ku kenjahe, janah si mekambing lawes ku negeri-negeri i Selatan.

⁷Tupung kuda si mekambing e ndarat, kurang pedas iakapna isuruh niar-niar doni enda. E maka nina malekat e, “To siar-siar doni enda!” Minter ia berkat.

⁸Kenca bage erlebuh malekat e man bangku nina, “Kuda si lawes ku Babilon i Utara enggo erbahanca surut pernembeh ate TUHAN.”

⁹Seh kata TUHAN man bangku

¹⁰nina, “Buatlah pemere kalak buangen e, e me Heldai, Tobia, ras Jedaya, kenca bage minter kam lawes ku rumah Josia anak Sepanya. Kerina kalak enda ndai enggo mulih i pembuangen nari i Babilon.

¹¹Bahanlah sada mahkota i bas pirak ras emas si iberekenna e, jenari tamakenlah ku takal Imam si Mbelin Josua anak Josadak.

¹²Kataken man bana kata TUHAN si Mada Kuasa bagenda, “Kalak si tergelar Dahan, turah nge alu mehumur i bas inganna, janah iumbanna Rumah Pertoton man TUHAN. [14†]

¹³Ia me si majekken Rumah Pertoton TUHAN e, jenari ngaloken kehamaten bagi si ibereken man raja, janah iperentahna me rayat e. Sekalak imam tedis deherken kursi kinirajanna, janah duana ia erdahin alu dame ras sada perarih.”

¹⁴Mahkota e ibahan jadi sada peringet-ingeten i bas Rumah Pertoton TUHAN guna enghamati Heldai, Tobia, Jedaya ras Josia.”

¹⁵Kalak si ringan i negeri-negeri si ndauh reh nampati majekken Rumah Pertoton TUHAN e. Kenca pajek pagi mulihi Rumah Pertoton e ietehndu me maka TUHAN si Mada Kuasa kap si nuruh aku ndahi kam. Kerina si enda jadi pagi adi iikutkenndu kai si iperentahken TUHAN Dibatandu.