Read Batak Karo SAKARIA 7 Bible Online

SAKARIA 7 - Batak Karo bible

SAKARIA 7

¹I bas tahun peempatken kenca Darius jadi raja, i bas wari peempatken, bulan siwah (e me bulan Kislu), reh kata TUHAN man bangku.

²Anak kuta Betel nuruh Sereser ras Regem-Melekh rikut ras anak buahna ku Rumah Pertoton TUHAN si Mada Kuasa lako ertoto mindo pemasu-masun TUHAN

³dingen nungkun imam-imam ras nabi-nabi alu penungkunen enda, “Iterusken kami kin erceda ate alu erpuasa i bas bulan pelimaken bagi enggo semal ilakoken kami ertahun-tahun, erkiteken Rumah Pertoton e runtuh denga seh genduari?”

⁴Enda me kata TUHAN si seh man bangku kerna si e.

⁵Nina, “Kataken man kerina anak negeri enda ras man imam-imam maka tupung ia erpuasa ras erceda ate i bas bulan pelimaken ras pepituken kidekah pitu puluh tahun enda, si e ilakokenna labo guna enghamati Aku.

⁶Janah adi man ras minem ia, guna mesuri beltekna saja ngenca.”

⁷Enda me si ikataken TUHAN arah nabi-nabi si arah lebe nai, tupung Jerusalem meriah denga dingen dem alu jelma, i ja nterem kalak ringan la saja i bas kuta-kuta sekelewet kuta e, tapi pe i Selatan ras i uruk-uruk si arah kenjahe.

⁸Kata TUHAN seh man Sakaria nina,

⁹“Nai Kuperentahken bangsangKu, “Bahanlah keputusen si bujur i bas tep-tep perkara, janah cidahken lias ras perkuah ate sapih-sapih kam.

¹⁰Ola itidasndu diberu balu-balu, anak melumang, bangsa si deban si ringan i tengah-tengahndu, bage pe kalak si musil-musil. Janah ola ukurken si jahat sapih-sapih kam ras temanndu.”

¹¹Tapi tupung e nai la nggit bangsangKu megiken Aku. Mekeng ia, itutupna pinggelna,

¹²janah ipemersikna ukurna bali ras batu. Erkiteken la ia nggit megiken pengajaren si Kubereken arah KesahKu man nabi e, seh kal garana pusuhKu.

¹³Perbahan la idengkehkenna tupung Aku ngerana, e maka tupung ia ertoto la Kualoi.

¹⁴Desken angin kaba-kaba Kukencahken ia maka ringan i negeri kalak. Taneh si mehuli enda enggo tading terulang, dingen lanai lit ise pe ringan i je.”