Read Batak Karo SAKARIA 8 Bible Online

SAKARIA 8 - Batak Karo bible

SAKARIA 8

¹ TUHAN si Mada Kuasa nehken kataNa man Sakaria nina,

²“KekelengenKu man Jerusalem seh kal belinna, janah perban kelengna ateKu, nembeh ateKu kempak musuh-musuhna.

³Mulih me Aku ku Sion, janah ringan i Jerusalem, kutangKu si badia e. Terberita me kuta e kuta si setia, janah deleng TUHAN si Mada Kuasa igelari me Deleng si Badia.

⁴Sekali nari pagi subuk dilaki bage pe diberu tua-tua si enggo erciken ban tuana, kundul i pasar-pasar kuta e.

⁵Janah pasar-pasarna dem alu danak-danak dilaki ras diberu erguro-guro.

⁶Rikutken pengakap bangsa si tading denga, si enda tempa-tempa la banci jadi, tapi i bas Aku la lit si la banci jadi.

⁷Kupulahi bangsangKu i bas negeri e nari ku ja ia enggo ibaba,

⁸janah Kubaba mulih i kenjahe nari bage pe i kenjulu nari gelah ringan i Jerusalem. Ia jadi bangsangKu, janah Aku jadi Dibatana, si ngerajai ia alu tetap dingen bujur.”

⁹Tetapken ukurndu! Kata-kata si ibelasken nabi-nabi tupung palas Rumah Pertoton e ipajekken ngumbansa, genduari kata-kata si bage ka nge ibegindu.

¹⁰Ope denga si e nai, la lit ise pe ngasup nggalari upah si ngemo tah pe newai asuh-asuhen, janah la lit ise pe si ngkawalisa i bas musuhna nari. Sabap Kuperubat kalak sapih-sapih temanna.

¹¹Tapi genduari lanai bage perbahanKu nandangi bangsa enda si tading denga.

¹²Benih iamburna alu teneng dingen mbuah pagena. Batang anggurna erbuah meramis, tanehna melala ulihna, janah udan pe cukup mbue. Pasu-pasu enda Kubereken man bangsangKu si tading denga.

¹³O kalak Juda ras Israel! I bas paksa si enggo lepas bangsa si deban enggo make gelarndu numpahi kalak. Tapi Kukelini me kam, janah kam jadi pasu-pasu man kalak si deban. E maka tetapkenlah ukurndu, ola mbiar.”

¹⁴Nina TUHAN si Mada Kuasa, “Tupung nembeh ateKu erkiteken lagu langkah nini-ninindu, Kusuraken si jahat man bana; la Kusambari ukurKu, tapi Kudalanken sue ras si enggo Kusura.

¹⁵Tapi genduari ersura-sura Aku masu-masu kalak Jerusalem ras Juda. E maka ola kam mbiar.

¹⁶Enda me si arus ilakokendu. Katakenlah si tuhu-tuhu sapih-sapih kam. Bahanlah keputusen si bujur i bas pengadilen, keputusen si maba kedamen. [15†]

¹⁷Ola kam ersura-sura mahan si jahat sapih-sapih kam. Ola kam erbahan kesaksin si la tuhu. Segat ateKu man kata guak, ras kelabujuren ras sigegeh-gegeh.”

¹⁸Kata TUHAN si Mada Kuasa seh man Sakaria nina,

¹⁹“Puasa si ilakoken i bas bulan peempatken, pelimaken, pepituken, ras pesepuluhken salih jadi pesta keriahen ras kesenangen man kalak Juda. Arus kam erngena ate kempak ketuhu-tuhun ras perdamen.”

²⁰Nina TUHAN si Mada Kuasa, “Seh me paksana i ja nterem kalak reh i bas kuta-kuta si deban nari ku Jerusalem.

²¹Kalak si ringan i bas sada kuta lawes me man anak kuta si deban nina, “Berkat me kami nembah man TUHAN si Mada Kuasa dingen ertoto mindo pasu-pasuNa. Ota, ras kita berkat!”

²²Melala bangsa ras negeri-negeri si megegeh reh ku Jerusalem nembah man TUHAN si Mada Kuasa, dingen ertoto mindo pemasu-masunNa.

²³I bas wari e pagi sepuluh kalak bangsa si deban reh ndahi sekalak Jahudi janah nina, “Ikut ate kami ras kam, sabap enggo ibegi kami Dibata ras kam kap.”