Read Batak Karo SAKARIA 9 Bible Online

SAKARIA 9 - Batak Karo bible

SAKARIA 9

¹Enda kata i bas TUHAN nari: Enggo ibelaskenNa ukumen man negeri Hadrah ras man kuta Damaskus. Labo suku-suku Israel saja ngenca sikerajangen TUHAN, tapi ibukota Siria pe Ia empuna. [16†] [17†]

²Hamat, si sebalengen ras Hadrah e pe sikerajangen TUHAN, bage pe kuta Tirus ras Sidon, rikut ras kerina kepentarenna.

³Kuta Tirus enggo ibahan bentengna janah enggo ipegun-gun i je emas ras pirak seh buena, maka enggo bali buena ras kubang.

⁴Tapi ibuat TUHAN me kai si lit i bas kuta e. IbenterkenNa kebayakenna ku lawit, janah kuta e iciluk seh radas kerina.

⁵Kuta Askelon ngidah si enda pagi, e maka mbiar ia. Kuta Gasa pe ngidahsa, e maka mesui kal akapna. Bage ka pe Ekron, e maka bene me pengarapenna. Gasa kebenen raja, dingen Askelon jadi terulang. [18†]

⁶Bangsa peranaken pagi ngiani Asdod. Nina TUHAN, “Kerina si iagahken bangsa Pilisti Kumasapken pagi.

⁷Lanai pagi ipanna daging si erdareh denga tah pe pangan si deban si pantang. Kerina kalak Pilisti si tading denga bengket pagi jadi bagin i bas bangsangKu janah bali ras sada terpuk i bas suku Juda. Ekron pe jadi sada bagin pagi i bas bangsangKu, bali ras kalak Jebusi nai.

⁸Kukawali negeringKu janah la Kupelepas tentera kalak mentas arah e. Lanai Kubere raja penindas nindih bangsangKu. Sabap enggo Kuidah uga kiniseran bangsangKu.”

⁹Ersuraklah, ersuraklah, o anak kuta Sion! Ersuraklah meriah, o kalak Jerusalem! Nehenlah, rajandu reh ndahi kam! Ia dem kemulian, dem kemenangen. Tapi meteruk ukurna, Ia reh ngersak kelede; kelede si nguda denga e me anak indung kelede. [19†]

¹⁰Nina TUHAN man bangsaNa, “Kusasapken me gereta perang i Israel nari bage ka pe kerina kuda i Jerusalem nari; panah si ipake i bas perang, Kukernepken seh keri. Rajandu e mperdameken bangsa-bangsa; i lawit nari seh ku lawit iperentahna kerina, mulai i Lau Eprat nari, se ku tampuk doni enda.” [20†]

¹¹Nina TUHAN, “Erkiteken perpadanenKu ras kam, si isahken alu dareh persembahen. Kupulahi kam si terbuang i bas lubang si mbages nari si la erlau. [21†]

¹²Mulihlah, o kam kalak buangen, si genduari enggo erpengarapen; mulihlah ku bentengndu si aman. Kukataken man bandu maka Kubereken me man bandu pasu-pasu dua kali lipat erkiteken kiniseran si enggo inanamindu,

¹³Kupake me Juda desken panah, dingen Israel anak panahna. Dilaki si i Sion Kupake desken sada pedang ngelawan kalak Junani.”

¹⁴Teridah me TUHAN i babo bangsaNa; anak panahNa kabang desken kilap. TUHAN si Mada Kuasa ngembus terompetNa, dingen reh Ia i bas angin kaba-kaba i Selatan nari.

¹⁵Ikawali TUHAN si Mada Kuasa kap bangsaNa maka ikernepkenNa kerina musuh-musuhna. Ersurak ia i bas perang desken kalak mabuk erkiteken anggur; dareh musuh-musuhna iamburkenna, seh maler desken dareh persembahen si niamburken i bas mangkuk nari ku suki-suki batar-batar.

¹⁶I bas wari e pagi, ikelini TUHAN me bangsaNa bali ras permakan ngkelini rarasenna i bas bahaya nari. Bangsa e ersinalsal i bas negerina bali ras permata i bas mahkota.

¹⁷Nehen me uga ulina ras jilena pagi taneh e! Anak perana ras singuda-nguda mejuah-juah kerina erkiteken gandum ras anggur si mbaru.