Read Batak Karo MALEAKI 2 Bible Online

MALEAKI 2 - Batak Karo bible

MALEAKI 2

¹Nina TUHAN si Mada Kuasa man imam-imam, “Enda perentah man bandu:

²Pehagalah Aku arah perbahanenndu. Adi la ibegikenndu kai si Kukataken, Kukenai kam alu sumpah. Kudabuhken pe sumpahKu kempak barang-barang si ialokenndu erkiteken pendahin keimamenndu. Tuhu-tuhu enggo Kutamaken pe sumpahKu e i bas si e kerina erkiteken la atendu tutus megiken perentahKu.

³Kuukum anak-anakndu janah Kudampelken terites rubia-rubia si ipersembahkenndu e ku ayondu, jenari kam pe isarenken ku gun-gunen terites si i darat kuta.

⁴Kenca bage ietehndu maka enggo Kubereken perentah enda man bandu, gelah perpadanenKu ras imam-imam kesusuren Lewi, la icedaken. [4†]

⁵I bas perpadanenKu e erpadan Aku mereken kegeluhen ras kejuah-juahen man bana, janah e enggo Kubereken man bana, gelah banci ia mehamat man bangKu. I bas paksa e nai, tuhu-tuhu kal ihamatina Aku dingen mbiar ia. [5†]

⁶Iajarkenna kai si benar, labo si salah. Nggeluh ia alu dame ras Aku; la saja idalankenna si mehuli, tapi pe isampatina kalak si deban gelah lanai erbahan jahat.

⁷Tugas imam-imam kap ngajarken pemeteh si tuhu-tuhu kerna Aku. Kalak arus lawes ndahi imam-imam mpelajari sura-surangKu, sabap ia kap suruh-suruhenKu, TUHAN si Mada Kuasa.

⁸Tapi genduari, kam o imam-imam, enggo nilah i bas dalan si benar nari. Pengajarenndu mabai nterem kalak papak. Enggo ilanggarndu perpadanen si Kubahan ras kam.

⁹Erkiteken si e genduari Kubahan ka ciga ate bangsa Israel man bandu sabap la iikutkenndu sura-surangKu, dingen erpendobahen idahndu kalak i lebe-lebe Undang-undangKu.”

¹⁰Ma sada bapa kin kita kerina? Ma Dibata si sada e nge si nepa kita kerina? Adi bage ngkai maka sihianati seninanta, janah ngkai maka la si ergai perpadanen si ibahan Dibata ras nini-nininta nai?

¹¹Kalak Juda enggo ngelanggar padanna ras Dibata janah enggo ilakokenna perbahanen si ilat i Jerusalem ras i belang-belang negeri e. Enggo iliamina Rumah Pertoton si ikelengi TUHAN. Dilaki ngempoi diberu-diberu si nembah man dibata-dibata si deban.

¹²Ipelawes TUHANlah i bas perpulungen bangsa Israel nari kerina kalak si ngelakoken si enda, janah ndigan pe lanai banci ikut maba persembahen man TUHAN si Mada Kuasa radu ras bangsanta.

¹³Enda me sada nari si ilakokenndu. Enggo gedap ibahandu batar-batar TUHAN alu iluh; tangis ras ngandung kam sabap lanai ialokenNa persembahen si ibahanndu.

¹⁴Isungkunndu ngkai maka lanai Ia nggit ngalokenca. La ialokenNa erkiteken enggo ilanggarndu padanndu man ndeharandu si iempoindu tupung kam nguda denga i ja TUHAN jadi saksi. Ia kap temanndu janah enggo ilanggarndu padanndu man bana, aminna pe enggo kam erpadan i adep-adepen Dibata maka kam tetap setia man bana.

¹⁵Ma enggo ibahan Dibata kam sada kula ras sada ukur ras ia? Kai kin sura-sura Dibata i bas si enda? Sura-suraNa gelah ipupusndu anak-anak si tuhu-tuhu kal bangsa Dibata. E maka inget ola sada pe kam ngelanggar padanna man ndeharana.

¹⁶“Nembeh ateKu kalak si mulihen,” nina TUHAN Dibata man Israel. “Nembeh kal ateKu adi lit kam ngelakoken perbahanen si kejam e nandangi ndeharana. Inget maka tetap igelemndu padanndu maka kam tetap setia man ndeharandu.”

¹⁷Enggo latih iakap TUHAN ibahanndu alu cakapndu. Tapi isungkunndu, “I bas kai kin kami ngelatihi Ia?” Ilatihindu kap Ia alu ngataken, “TUHAN si Mada Kuasa erpengakap maka kerina kalak jahat mehuli nge; janah tuhu-tuhu ngena nge ateNa man kalak jahat e.” Ilatihindu pe Dibata alu penungkunen, “I ja kin Dibata si bujur ningen e?”