Read Batak Karo MALEAKI 3 Bible Online

MALEAKI 3 - Batak Karo bible

MALEAKI 3

¹ TUHAN si Mada Kuasa erjabap nina, “Kusuruh persuruhenKu nikapken dalan man bangKu. Kenca bage TUHAN si idaramindu e rempet reh ku RumahNa. PersuruhenKu si tedeh atendu ngidahsa e nandangi reh me, jenari imomokenna perpadanenKu.” [6†]

²Tapi ise ngasup nggengkenca wari kerehen e? Ise banci tahan tupung ia teridah pagi? Sabap bali kap ia ras sabun cuci si keras, bali ras api si ipake tukang ngelebur besi. [7†]

³Reh ia ngukum, bali ras sekalak tukang ngelebur pirak lako mbersihkenca. Bagi tukang mbersihken emas ras pirak, bage me persuruhen TUHAN e mbersihken imam-imam, gelah alu bage ibabana persembahen si payo man TUHAN.

⁴Kenca bage maka persembahen si ibaba kalak Juda ras Jerusalem kempak TUHAN ngena ateNa, bali ras si nggo-nggona i bas paksa si nai.

⁵Nina TUHAN si Mada Kuasa, “Reh me Aku ku tengah-tengahndu lako ngadili; e maka minter Kuaduken guru-guru pertendung, perlua-lua, saksi palsu, si nipu kalak upahenna, bage pe kalak si nindas diberu balu-balu, anak melumang ras kalak pertandang; gendekna, kerina kalak si la mbiar man bangKu.”

⁶“Aku kap TUHAN, janah Aku la mobah-obah. Dage, o kesusuren Jakup, kam pe labo masap.

⁷Kam, bali ras nini-ninindu si arah lebe, enggo nilah i bas Undang-undangKu nari janah lanai ipakendu. Mulihlah ku Aku, maka Aku mulih ku kam. Tapi nungkun kam nindu, ‘I bas soal kai kin kami arus mulih man bandu?’

⁸Genduari Kusungkun kam, ‘La kin salah adi itipu Dibata?’ Tentu salah; amin bage pe itipundu nge Aku. ‘I bas kai kin Kam itipu kami?’ nindu nungkun. I bas perkara persepuluhen ras persembahen.

⁹Enggo kena sumpah kam kerina erkite-kiteken kerina bangsa e nipu Aku.

¹⁰Babalah persembahen persepuluhenndu ku Rumah Pertoton asa arusna maka melala i je pangan. Ujilah Aku alu si e; tentu idahndu maka Kutalangi tingkap-tingkap langit janah Kucurcurken man bandu kerina erbage si mehuli alu la kurang-kurangen. [8†]

¹¹La Kupelepas labang encedaken jumandu, janah batang anggurndu meramis buahna.

¹²Kenca bage maka kerina bangsa ngatakenca kam sangap, sabap negerindu negeri si mehuli man ingan tading.”

¹³“Sitik kal pe la mehuli cakapndu kerna Aku,” nina TUHAN. “Tapi nungkun kam, ‘Kai kin ningkami kerna kam?’

¹⁴Bagenda kap nindu: ‘Sia-sia nge nembah man Dibata. Kai gunana ngelakoken si ikatakenNa? Kai gunana si cidahken maka kita erceda ate kerna perbahanenta i lebe-lebe TUHAN si Mada Kuasa?

¹⁵Bagi si idah jine, kalak si megombang nge si senang. Kalak jahat labo saja sangap, tapi pe iujina kesabaren Dibata alu kejahatenna, janah pulah nge ia i bas ukumen nari.’ ”

¹⁶Kenca bage kalak si mbiar man TUHAN ngerana sapih-sapih ia, janah idengkehken ras ibegi TUHAN kai si ikatakenna. I bas adep-adepen TUHAN, lit tersurat i bas sada kitap kerna kalak si mbiar dingen mehamat man TUHAN.

¹⁷“Ia nge jadi bangsangKu,” nina TUHAN si Mada Kuasa. “Tupung warina Aku nehken perbahanenKu, ia me si jadi sikerajangenKu. Melias Aku man bana bali ras liasna ate sekalak bapa man anakna si patuh man bana.

¹⁸Sekali nari iidah bangsangKu kai lainna kejadin si reh man kalak bujur ras kalak jahat, man kalak si nembah man bangKu ras kalak si lang.”