Read Batak Karo LUKAS 1 Bible Online

LUKAS 1 - Batak Karo bible

LUKAS 1

¹Teopilus si ihamati. Nterem kalak enggo nuratken alu ratur kerna kejadin-kejadin si terjadi i tengah-tengahta.

²Kalak enda nuratken kai si enggo ituriken man banta, e me si ituriken kalak si ngidah kejadin e tangtangna nari dingen meritakenca.

³Dage, perbahan enggo kupepayo alu megermet kerina kejadin e i bas mula-mulana nari, e maka mehuli kuakap adi kusuratken ka alu ratur man bandu.

⁴Kubahan e gelah tangkas man bandu, maka tuhu-tuhu nge kerina si enggo iajarken man bandu e.

⁵Asum Herodes jadi raja i taneh Judea, lit me i je sekalak imam, gelarna Sakaria; ia i bas terpuk Abia nari. Ndeharana Elisabet gelarna; ia pe kesusuren imam. [1†]

⁶Duana ia nggeluh rikutken ate Dibata ngena janah idalankenna kerina pedah ras Undang-undang Tuhan bagi patutna.

⁷Anakna la lit, perbahan si Elisabet la ertuah, janah duana ia enggo metua.

⁸I bas sada wari Sakaria sangana ndahiken dahin imam i lebe-lebe Dibata, rikutken giliren terpukna ndahiken dahin i bas kebaktin pelayanen si tep-tep wari.

⁹Rikutken kebiasan imam-imam, ibahan me tikam tanduk, e maka Sakaria me si terpilih bengket ku bas Kamar si Badia guna nutung kumenen i je.

¹⁰Jelma si nterem ertoto i darat seh dung kumenen e itutung.

¹¹Paksa si e, reh me malekat Tuhan ndahi Sakaria. Malekat e tedis arah kemuhen batar-batar ingan nutung kumenen.

¹²Ngidah malekat e, sengget dingen mbiar kal Sakaria.

¹³Tapi nina malekat man bana, “O, Sakaria ola kam mbiar! Pertotonndu enggo ibegiken Dibata. Ndeharandu Elisabet ipupusna me pagi sada anak dilaki. Bahan gelarna Johanes.

¹⁴Meriah dingen malem pagi atendu, janah kalak si deban pe meriah ukurna arah ketubuhenna.

¹⁵Ia jadi kalak si mbelin i lebe-lebe Tuhan. La banci inemna lau anggur tah pe inemen keras si deban. Mulai tubuhna pe ia enggo dem alu Kesah Si Badia. [2†]

¹⁶Arah ia nterem pagi kalak Israel mulihken erkemalangen man Tuhan Dibatana.

¹⁷Leben pagi ia reh asa Tuhan; ia megegeh dingen erkuasa bagi Nabi Elia. Idamekenna pagi bapa ras anak-anakna; ibahanna kalak jahat jadi bujur; alu bage isikapkenna man Tuhan bangsa si metunggung.” [3†]

¹⁸Ngaloi Sakaria man malekat ndai, “Kai dage tanda man bangku maka kueteh tuhu si ikatakenndu e? Sabap aku ras ndeharangku enggo metua.”

¹⁹Erjabap malekat, “Aku kap Gabriel suruh-suruhen Dibata. IsuruhNa aku ngerana ras kam guna peseh Berita Si Meriah enda man bandu. [4†]

²⁰Tapi la kam tek si kuberitaken enda, si tuhu-tuhu pagi jadi i bas paksana. Erkiteken si e e maka lanai kam banci ngerana, pekak kam seh idahndu jadi si kukataken ndai.”

²¹Paksa si e, tertima-tima kalak si nterem, janah mamang atena sabap ndekahsa akapna si Sakaria i bas Kamar si Badia.

²²Dungna kenca Sakaria ndarat lanai ia banci ngerana man kalak si nterem, e maka iangka kalak si nterem maka Sakaria enggo ngidah sada pengenehenen i bas Kamar si Badia e. Perbahan lanai banci ia ngerana, e maka ibahanna tanda-tanda alu tanna man kalak si nterem.

²³Kenca dung masa penugasenna i Rumah Pertoton e, mulih ia ku rumah.

²⁴Jenari mehuli me kula ndeharana Elisabet janah seh lima bulan ia la ndarat i rumah nari.

²⁵Nina Elisabet, “Dungna isampati Tuhan ka nge aku, janah ibahanNa aku lanai medungu i lebe-lebe jelma si nterem.”

²⁶Kenca enggo enem bulan Elisabet natang tuah, Dibata nuruh malekat Gabriel ku kuta Nasaret i daerah Galilea.

²⁷Gabriel isuruh ndahi sekalak singuda-nguda tergelar si Maria. Singuda-nguda e enggo ertunangen ras sekalak anak perana tergelar si Jusup, kesusuren Raja Daud. [5†]

²⁸Idahi malekat ndai Maria nina, “Mejuah-juah! Tuhan kap ras kam janah enggo iberekenNa pasu-pasuNa si mbelin man bandu!”

²⁹Sengget kal Maria megi kata malekat e, jenari nungkun i bas ukurna ntah kai erti kata e.

³⁰E maka nina malekat ndai man bana, “Ola kam mbiar, Maria, sabap enggo ibereken Dibata perkuah ateNa man bandu.

³¹Mehuli pagi kulandu janah ipupusndu sada anak dilaki, bahanlah gelarna Jesus. [6†]

³²IA pagi jadi kalak si mbelin dingen igelari pe Anak Dibata si Meganjangna kal. Tuhan Dibata pagi njadiken IA jadi Raja bagi ninina Daud, [7†]

³³janah IA me pagi raja man kesusuren Jakup seh rasa lalap; KinirajanNa la erkeri-kerin.”

³⁴Ngaloi Maria man malekat ndai, “Kuga banci jadi e man bangku, sabap aku singuda-nguda denga?”

³⁵Erjabap malekat nina, “Kesah Si Badia pagi nusur ku babondu janah kuasa Dibata ringan i bas kam. Perbahan si e me, maka anak si ipupusndu e pagi Badia janah igelari Anak Dibata.

³⁶Nehenlah kade-kadendu Elisabet. Ikataken kalak maka ia la banci mupus, tapi enggo peenem bulanken mehuli kulana, aminna gia ia enggo metua.

³⁷Sabap la lit si metahat i bas Dibata.” [8†]

³⁸Ngaloi Maria, “Kuendesken diringku man Tuhan. Janah jadilah i bas aku bagi si enggo ikatakenndu e!” Kenca bage itadingken malekat ndai ia.

³⁹Minter kenca si e, lawes Maria ku sada kuta i Judea i daerah si erdeleng-deleng.

⁴⁰I je lawes ia ku rumah Sakaria. Janah sanga ia bengket ku rumah e ikatakenna man Elisabet, “Mejuah-juah.”

⁴¹Asum ibegi Elisabet sora Maria, minter kemuit anak si lit i bas bertinna. Elisabet dem alu Kesah Si Badia.

⁴²E maka alu sora megang nina, “Kerina diberu, Kam me si mbelinna daten pasu-pasu! Ipasu-pasu gelah anak si ipupusndu!

⁴³Ise kin aku, maka nande Tuhan reh ndahi aku?

⁴⁴Sabap kenca kubegi sorandu, minter kemuit anak si lit i bas bertinku alu meriah ukur.

⁴⁵Malem tuhu-tuhu atendu sabap tek kam maka kai si iberitaken Tuhan man bandu tuhu-tuhu jadi.”

⁴⁶Nina Maria, “Tendingku muji Tuhan. [9†]

⁴⁷Meriah ukurku perbahan Dibata Penebusku.

⁴⁸Sabap enggo ingetNa aku, kawanNa si meteruk! Genduari nari kerina kalak ngataken maka aku daten tuah. [10†]

⁴⁹Sabap Dibata si Mada Kuasa ncidahken perbahanenNa man bangku. Badia me gelarNa.

⁵⁰IcidahkenNa perkuah ateNa man kalak si erkemalangen man baNa.

⁵¹IcidahkenNa KuasaNa alu perbahanen tanNa, janah iambatiNa gelah ola seh sura-sura kalak si meganjang ukurna.

⁵²IpeterukNa raja-raja si erkuasa, janah ipeganjangkenNa kalak si meteruk. [11†]

⁵³Kalak si melihe ibesuriNa alu kerina si mehuli, janah kalak bayak isuruhNa lawes ngambe-ngambe.

⁵⁴IngetNa padan si enggo ibahanNa ras nini-nininta, janah reh IA nampati kalak Israel kawanNa.

⁵⁵La IA lupa ncidahken perkuah ateNa man Abraham, bage pe man kerina kesusurenna seh rasa lalap.” [12†]

⁵⁶Kira-kira telu bulan dekahna Maria ringan i rumah Elisabet; e maka mulih ia ku rumahna.

⁵⁷Enggo seh paksana Elisabet mupus, e maka ipupusna me sada anak dilaki.

⁵⁸Kenca ibegi anak kutana ras kade-kadena maka enggo icidahken Tuhan perkuah ateNa si mbelin e man bana, e maka kerina ia ermeriah ukur ras Elisabet.

⁵⁹Kenca sada minggu umur anak e, reh ka ia kerina nunatken anak ndai. Ate kalak ndai Sakaria ibahan gelarna, seri ras gelar bapana. [13†]

⁶⁰Tapi nina nandena, “Ola! Gelarna e me Johanes.”

⁶¹Nina kalak ndai man Elisabet, “Tapi la kap lit gelar e i bas jabunta.”

⁶²E maka ibahan kalak ndai tanda man Sakaria guna nungkun ntah ise bahan gelar anak e.

⁶³Ipindo Sakaria me sada batu tulis, jenari isuratkenna, “Gelarna e me Johanes.” Mamang ate kalak ndai kerina.

⁶⁴Paksa si e pe minter Sakaria mulihi ngerana, jenari ipujina Dibata.

⁶⁵Kerina kalak si deherken rumahna mbiar, janah berita kerna kejadin e mbar ku belang-belang daerah deleng-deleng Judea.

⁶⁶Kerina kalak si megi berita e ngukuri kejadin e, janah nungkun, “Jadi kai nge ndia pagi anak e?” Enggo tangkas maka kuasa Tuhan ras ia kap.

⁶⁷Sakaria, bapa Johanes dem alu Kesah Si Badia. Iturikenna kata Dibata nina,

⁶⁸“Marilah sipuji Tuhan, Dibata kalak Israel IA reh ndahi bangsana janah mulahisa.

⁶⁹IberekenNa man banta Penebus si erkuasa e me kesusuren kawanNa si Daud.

⁷⁰Bagi enggo ikatakenNa nai-nai nari arah nabi-nabiNa si Badia,

⁷¹erpadan IA mulahi kita i bas musuh-musuhta nari, bage pe i bas kuasa kalak si er elem-elem man banta.

⁷²IkatakenNa maka icidahkenNa nge perkuah ateNa man nini-nininta, janah ingetNa padanNa si Badia.

⁷³ [73-74] Enda me padanNa ras nininta Abraham, asum ersumpah IA maka ipulahiNa kita i bas musuh-musuhta nari, gelah lanai kita mbiar ersembah man baNa.

⁷⁴

⁷⁵IbahanNa kita Badia dingen bujur ilebe-lebeNa, i bas gedang-gedang geluhta.

⁷⁶O, anakku, kam pagi igelari Nabi Dibata Si Meganjangna kal. Kam reh leben asa Tuhan, guna nikapken dalan man baNa; [14†]

⁷⁷guna mpebetehken man bangsaNa, maka bangsa-bangsa e pagi itebusi alu nasapken dosa-dosana.

⁷⁸Dibatanta perkeleng dingen dem perkuah ate. IsehkenNa pagi man banta sinalsal Keselamaten.

⁷⁹Janah isalsalina pe ku kerina kalak si ringan i bas kegelapen e me awih kematen, IA mabai kita erdalan ku bas kegeluhen si dame.” [15†]

⁸⁰Anak ndai reh belinna dingen ertambahna ukurna. Ia ringan i taneh si mesawang seh paksa maka terang-terangen icidahkenna bana man kalak Israel.