Read Batak Karo LUKAS 11 Bible Online

LUKAS 11 - Batak Karo bible

LUKAS 11

¹Sekali jadi ertoto Jesus i bas sada ingan. Kenca dung IA ertoto nina sekalak ajar-ajarNa, “O Tuhan, ajari min kami ertoto bagi Johanes ngajari ajar-ajarna.”

²Ngaloi Jesus man ajar-ajarNa nina, “Adi ertoto kam nindulah, ‘O Bapa, Terpujilah gelarndu si Badia; Rehlah min KinirajanNdu,

³Bereken min man kami nakan cukup tep-tep wari.

⁴Alemi min dosa-dosa kami, bagi kami pe ngalemi kalak si ersalah kempak kami. Ola min kami ibaba Kam ku bas percuban.’ ”

⁵Tole nina Jesus man ajar-ajarNa, “Adi sekalak i bas kam lawes ku rumah temanndu i tengah berngi janah nindu, ‘O teman, kupinjam min rotindu telu ngkibul,

⁶sabap temanku si i bas perdalanen singgah ku rumahku janah la lit si man berenken man bana.’

⁷Banci jadi temanndu e erjabap i rumah nari, ‘Ola ganggundu aku! Pintun enggo ieruk, janah aku ras anak-anakku enggo medem. La terbahan aku keke guna merekenca man bandu.’

⁸Bage gia, Kukataken pe man bandu, aminna gia ia la keke mereken roti man bandu erkiteken ia temanndu, tapi perbahan la kam mela mindo alu meseksek, keke nge ia, iberekenna man bandu kai si iperlukenndu.

⁹Perbahan si e Kukataken man bandu: Pindolah tentu ngalo kam; daramilah, tentu idatndu; tuktuklah, tentu italangi pintun man bandu.

¹⁰Sabap ise si mindo ngalo kap, janah ise si ndarami idatna kap, bage pe ise si nuktuk pintun italangi kap.

¹¹Tentu la lit i bas kam selaku bapa mereken nipe man anakndu adi ipindona nurung.

¹²Ntah iberekenndu kacip gelang man bana adi ipindona tinaruh.

¹³Dagina, adi kam pe kalak si jahat ietehndu mereken si mehuli man anak-anakndu, apai denga ka Bapa si i Surga. Tentu iberekenNa nge man bandu Kesah si Badia man si mindo man baNa.”

¹⁴Sekali jadi ipelawes Jesus setan i bas sekalak pekak nari. Kenca ndarat setan e, ngasup ia ngerana. Ngidah si e mamang ate kalak si nterem.

¹⁵Tapi piga-piga kalak ngataken, “Balsebul, pengulu setan nge si mereken kuasa man baNa mpelawesken setan-setan.” [94†]

¹⁶Lit ka deba nidingi Jesus atena, e maka ipindona gelah ibahan Jesus sada tanda sengget si nusur i Surga nari. [95†]

¹⁷Tapi ieteh Jesus perukuren-perukuren kalak e, e maka nina, “Kerajan si lit i je perpecahen, la banci lang runtuh me kerajan e, jenari runtuhen pe rumah-rumahna.

¹⁸Dage, adi kerajan setan erbelah-belah ia sapih-sapih ia, tentu kerajan e la ndekah. Ikatakenndu maka Balsebul nge si mereken kuasa man bangKu guna pelawesken setan-setan.

¹⁹Adi bage kin carangKu pelawesken setan-setan, kuga dage teman-temanndu pelawessa? Temanndu e jinelah ertimbang kerna kam.

²⁰Labo Balsebul si mereken kuasa man bangKu, tapi Aku pelawesken setan-setan alu kuasa Dibata si nuduhken maka i tengah-tengahndu enggo ndeher Kinirajan Dibata.

²¹Adi sekalak si megegeh njagai rumahna alu senjata lengkap, tentu aman kerina erta-ertana.

²²Tapi adi reh kalak si gegehen ngelawan ia, italukenna ia janah irampasna me kerina senjata si lengkap si iarapken tuan rumah ndai, jenari ibagi-bagikenna man teman-temanna kai si enggo irampasna e.

²³Ise si la mihak Aku si tuhuna ngelawan Aku kap; ise si la ras Aku pepulungken, si tuhuna ia engkerapi kap.” [96†]

²⁴“Adi enggo ndarat setan i bas manusia nari, lawes ia, niari kerina taneh gurun pasir ndarami ingan ngadi. Adi la lit idatna ingan ngadi e maka nina i bas ukurna, ‘Mulihlah aku ku rumahku si enggo kutadingken.’

²⁵E maka mulihken ia, idapetina rumah e enggo bersih isapui dingen sikap.

²⁶Jenari lawes ia, idilona pitu setan si jahaten asa ia. E maka ringan ia kerina i bas rumah ndai seh maka si ibengketi setan e enggo keleken asang si tangtangna ndube.”

²⁷Kenca enggo ikataken Jesus si enda ndai, sekalak diberu i bas jelma si nterem e nari ngerana alu megang nina, “Malem tuhu-tuhu ate diberu si mupus dingen pebelin Kam!”

²⁸Tapi ngaloi Jesus, “Malemen tuhu-tuhu ate kalak si megiken Kata Dibata dingen ndalankenca!”

²⁹Asum jelma si nterem ngkeleweti Jesus, iteruskenNa ngerana nina, “Andiko jahatna jelma si genduari! Ipindona tanda sengget, tapi sada pe la ibereken man bana seakatan tanda sengget Nabi Juna. [97†]

³⁰Sabap bagi Nabi Juna jadi tanda man kalak Niniwe, bage me pe Anak Manusia si isuruh Dibata jadi sada tanda man bangsa si genduari. [98†]

³¹I bas wari pendungi pagi i lebe-lebe Pengadilen Dibata keke Ratu negeri Selatan nuduhken kelepaken kalak jaman enda. Sabap lako megiken kepentaren Salomo, Ratu ndai enggo reh erdalan i bas tampuk doni nari. Tapi i jenda genduri lit kalak si belinen asangken Salomo! [99†]

³²I bas wari pendungi pagi i lebe-lebe Pengadilen Dibata keke kalak Niniwe ras bangsa si genduari enda. Iaduken kalak Niniwe me pagi bangsa si genduari, sabap kalak Niniwe jera i bas dosana nari asum ibegina pengajaren Nabi Juna; janah Kukataken man bandu maka si tuhuna lit i jenda si belinen asa Nabi Juna!” [100†]

³³“Labo lit kalak nagani lampu, jenari itamakenna i teruh ingan si terligen ntahpe nutupisa alu tumba; tapi itamakenna nge ku nahe lampu, gelah sinalsalna nerangi kalak si bengket ku bas. [101†]

³⁴Matandu kap lampu i bas badanndu. Adi matandu sehat, kerina badanndu terang; tapi adi matandu la sehat, kerina badanndu gelap. [102†]

³⁵E maka jagalah gelah terang si lit i bas kam ola jadi gelap.

³⁶Adi kerina badanndu terang, lanai lit bagin si gelap, e maka sempurna nge terangna, bali ras isalsali terang lampu kam.”

³⁷Kenca dung Jesus ngerana, iundang kalak Parisi IA man ku rumahna. E maka bengket Jesus ku rumah e, jenari kundul dingen man.

³⁸Mamang ate kalak Parisi e asum iperdiatekenna Jesus la erburih ope denga man.

³⁹Tapi nina Tuhan man bana, “O kalak Parisi, tuhu iburihindu cangkir ras pinggan e arah darat, tapi arah bas dem alu rampasen ras kejahaten.

⁴⁰O kalak lenge! Ma kin Dibata nge si njadiken si arah darat e bage pe si njadiken si arah bas e?

⁴¹Si lit i bas mangkuk ras piringndu e nge arus iberekenndu man kalak musil. Alu bage kerina enggo bersih man bandu.

⁴²Tapi andiko, cilaka kal kam o kalak Parisi: Ipersembahkenndu sepersepuluh i bas ulihndu nuan-nuan nari: jera, sere, ras gule-gulen; tapi la ibahanndu bujur man manusia dingen la atendu keleng Dibata. Tapi e nge si tuhuna si arus ilakokenndu alu la ngelupaken si debanna. [103†]

⁴³Andiko, cilaka kal kam o kalak Parisi! Atendu ngkunduli kursi-kursi si arah lebe i bas rumah pertoton dingen atendu iperkuanken kalak kam i tengah dalan alu mehamat.

⁴⁴Andiko, cilaka kal kam! Sabap kam bagi kuburen si la ertanda; kalak si erdalan arah datasna la meteh maka e kuburen.”

⁴⁵Ngaloi sekalak guru agama Jahudi nina, “O Guru, alu kataNdu si bage, kami pe enggo ikenaiNdu.”

⁴⁶Ngaloi Jesus, “Kam pe cilaka nge o guru-guru agama! Iberekenndu baban si mberat man kalak seh maka la ngasup ia mabasa, tapi kam jine alu sada jari pe la kam nggit ngkuitsa baban e.

⁴⁷Andiko, cilaka kal kam! Ipekena kam kuburen nabi-nabi si enggo ibunuh nini-ninindu.

⁴⁸Alu bage enggo tangkas maka setuju kam ras si ibahan nini-ninindu nai; sabap nini-ninindu munuh nabi-nabi e janah kam erbahan kuburenna.

⁴⁹Arah kepentarenNa maka nina Dibata, ‘Kusuruh pagi reh nabi-nabi ras rasul-rasul ndahi ia; piga-piga pagi ibunuhna janah si deban isiksana.’

⁵⁰E maka bangsa si genduari enda ituntut pagi perbahan dareh nabi-nabi si enggo ibunuh mula-mula tembe doni nari,

⁵¹e me pembunuhen i bas Abil nari seh ku pembunuhen Sakaria si ibunuh i kelang-kelang batar-batar persembahen ras Rumah Tuhan. Kukataken man bandu maka kalak jaman enda la banci la iukum pagi erkiteken perbahanenna e. [104†]

⁵²Andiko guru Undang-undang, cilaka kal kam! Enggo ibuatndu kunci pemeteh; tapi kam jine la bengket ku bas janah kam jine erbahanca maka kalak la banci bengket ku bas!”

⁵³Kenca lawes Jesus i bas ingan e nari, guru-guru Undang-undang ras kalak Parisi lalap ndarami salah Jesus. Isungkunna erbage-bage soal guna nidingi Jesus arah rananNa.

⁵⁴I bas si e iusahakenna gelah salah jabap Jesus, maka banci IA iaduken rikutken kesalahenNa e.