Read Batak Karo LUKAS 12 Bible Online

LUKAS 12 - Batak Karo bible

LUKAS 12

¹Asum enggo pulung jelma meribu-ribu kalak seh maka enggo rincet-incet ia kerina, perlebe ngerana Jesus man ajar-ajarNa nina, “Metengetlah kam nandangi ragi kalak Parisi, e me biakna si pekulah-kulah. [105†]

²Kerina si terligen teridah kap pagi, janah kerina rahasia ipetangkas kap pagi. [106†]

³Kai pe si enggo ikatakenndu i bas gelap terbegi nge pagi i bas terang, janah kai pe si enggo ikusikkenndu ku cuping kalak i bas kamar si tertutup imomoken nge man jelma si nterem.”

⁴“O temanku, kukataken man bandu: ola kam mbiar nandangi kalak si ngasup munuh badan tapi kenca si e lanai ngasup erbahan kai pe.

⁵Kukataken man bandu ise arusna si man kebiaren: Mbiarlah kam man Dibata, si kenca munuh, lit ka kuasaNa ngambengkenca ku bas naraka. Ingetlah, tuhu-tuhu lah min kam erkemalangen man Dibata!

⁶Ma kin idayaken kalak lima cipcip alu dua sen saja? Amin bage gia labo sada pe ilupaken Dibata.

⁷Buk takalndu pe kerina enggo ibeligaiNa. E maka ola kam mbiar, sabap ergan kap kam asa cipcip.”

⁸“Kukataken man bandu, ise si ngakuken Aku i lebe-lebe manusia ia ajar-ajarKu, Anak Manusia si isuruh Dibata pe pagi ngakuken ia i lebe-lebe malekat Dibata.

⁹Tapi ise la ngakui maka ia ajar-ajarKu i lebe-lebe manusia, Anak Manusia si isuruh Dibata pe pagi mersoken ia i lebe-lebe malekat Dibata.

¹⁰Ise si pengeranana nimbak Anak Manusia si isuruh Dibata, ia banci ialemi, tapi kalak si nggombangi Kesah Si Badia la banci ialemi. [107†]

¹¹Adi iaduken kalak kam ku Pengadilen Agama, ntah ku pemerentah ntah ku kalak si erkuasa, ola aru atendu kerna kuga kam mpertahanken dirindu, ntah pe kerna si arus ikatakenndu. [108†]

¹²Sabap paksa si e pagi iajari Kesah Si Badia nge kam kerna kai arus ikatakenndu.”

¹³Sekalak i bas jelma si nterem e ngerana nina, “O Guru, katakenlah man seninangku maka erbagi kami kerna erta-erta si itadingken bapa kami.”

¹⁴Ngaloi Jesus man bana, “O senina, ise kin ngangkat Aku guna ngerunggui kam duana? Labo dahinKu mbagiken erta-ertandu.”

¹⁵Tole nina Jesus man bana kerina, “Jaga dingen metengetlah maka ola kam merangap nandangi kai pe; sabap kegeluhen manusia si tuhu-tuhu labo erpalasken erta-erta si lit i bas ia, aminna uga gia ia bayakna.”

¹⁶E maka ituriken Jesus man jelma si nterem e perumpaman enda, “Lit me sekalak bayak, melala kal ulih jumana.

¹⁷E maka rukur ia nina, ‘Lanai siat lumbung ingan ulih jumangku e kerina. Kuga nge ndia kubahan?’

¹⁸Nina ka i bas ukurna, ‘Bagenda kubahan: Kuruntuhken lumbungku enda, jenari kupajekken si tergalangen; i je me pagi kutamaken ulih jumangku ras kerina erta-ertangku.

¹⁹Kenca bage ningku i bas ukurku: Malem atendu, o tendingku! Sabap melala enggo ergun-gun erta-ertandu, cukup guna piga-piga tahun. Pesenangkenlah man bandu, man dingen minemlah.’

²⁰Tapi nina Dibata man bana, ‘O, bodoh! I bas berngi enda kam arus mate; man ise nge kerina erta-erta si enggo ipepulungndu e?’ ”

²¹Tole nina Jesus, “Bagenda me jadina nandangi kalak si pepulung kinibayaken man dirina jine, tapi la bayak i bas adep-adepen Dibata.”

²²Kenca bage nina Jesus man ajar-ajarNa, “Perbahan si e Kukataken man bandu: ola aru atendu kerna nakan si iperlukenndu i bas geluhndu ntah pe kerna uis si iperlukenndu guna dagingndu.

²³Sabap ergan nge geluhndu asa pangan, dingen ergan pe badanndu asa uis.

²⁴Nehenlah perik kak: la merdang, la rani, la lit lumbungna; tapi bage gia man nge ia ibahan Dibata. Kam ndauh ergan asa perik-perik e.

²⁵Ise kin i bas kam ngasup pegedangken umurna alu aru ate?

²⁶Adi labo kam ngasup erbahan si kitik e pe, ngkai maka aru atendu kerna kai-kai si debanna?

²⁷Nehenlah perturah bunga ncole, labo ia ertenun ntah pe erbahan uisna. Tapi kukataken man bandu maka raja Salomo si bage kal bayakna labo lit uisna bagi bunga enda jilena. [109†]

²⁸Dibata nge si erbahanca mejile dukut-dukut i mbalmbal -- dukut-dukut si sendah lit, pagi iambekken ku bas api. Makin lebihen kam iuisiNa? Andiko, kitikna kinitekenndu!

²⁹Dage, ola aru atendu, ola gulut ukurndu kerna pangan ras inemenndu.

³⁰(Sabap kalak si la nandai Dibata nge si aru atena kerna si e.) Ieteh Bapandu nge maka iperlukenndu si e.

³¹Arus maka buen kam rukur kerna Kinirajan Dibata gelah kerina si debanna pe ibereken Dibata ka man bandu.”

³²“Ola kam mbiar, o rarasen si kitik sabap meriah ukur Bapandu mereken Kinirajan man bandu.

³³Dayaken kerina erta-ertandu jenari bereken duitna man kalak musil. Bahanlah dompetndu si nteguh janah pepulunglah kinibayakenndu i Surga. I je la urak beliganna sabap la ibengketi penangko ntah pe ipan ngetnget.

³⁴Sabap i ja erta-ertandu i je pe ukurndu.”

³⁵“Tetap min kam erbenting kibul dingen ersinalsal pe lampundu. [110†]

³⁶Bagi sekalak budak si nimai tuanna mulih i bas kerja erdemu bayu nari min kam. Asum reh tuan e dingen nuktuk pintun, minter italangina. [111†]

³⁷Sangap me budak si idapeti tuanna erjaga-jaga nimai ia mulih. Kukataken man bandu, erbenting kibul me tuan e, isuruhna budak e kundul jenari kuskas ia ngelaisa.

³⁸Sangap me budak e adi idapeti tuanna ia erjaga-jaga aminna gia tuan e mulih tengah berngi ntah pe tekuak manuk.

³⁹Ingetlah katangKu enda: Adi ieteh tuan rumah katawari penangko reh, tentu erjaga-jaga ia dingen la ipelepasna rumah e ibongkar. [112†]

⁴⁰Bage pe kam, tetaplah min erjaga-jaga sabap Anak Manusia si isuruh Dibata reh i bas paksa si la arapndu.”

⁴¹Nina Petrus man Jesus, “O Tuhan, man kami saja kin iturikenNdu perumpaman e, ntah man kerina manusia?”

⁴²Erjabap Tuhan, “Ise dage budak si pentar dingen tutus? IA me ipercayaken tuanna jadi kepala budak si deban guna mbagiken pangan man budak e kerina i bas paksana.

⁴³Sangap me budak si asum mulih tuanna idapetina ia sangana ndalanken tugasna!

⁴⁴Kukataken man bandu, tuhu-tuhu iangkat tuan e me ia jadi pengawas i bas kerina erta-ertana.

⁴⁵Tapi adi nina budak e i bas ukurna, ‘Tuanku ndekah denga nge maka mulih,’ jenari ipekpekina budak si deban si dilaki ras si diberu, mangani dingen minem ia seh mabuk.

⁴⁶Jenari alu la iarapna rempet reh tuanna. Ibunuh tuanna ndai ia janah bali ibahanna ras kalak si la patuh.

⁴⁷Budak si meteh sura-sura tuanna, tapi la ia ersikap dingen la ibahanna bagi si ngena ate tuanna, ia mekelek iligasi.

⁴⁸Tapi budak si la meteh sura-sura tuanna, jenari ibahana kesalahen seh maka arus ia iligasi, budak e la mekelek iligasi. Sabap kalak si enggo ibereken man bana melala, i bas ia nari ituntut melala. Bage me pe man kalak si iendesken man bana melala, i bas ia nari ipindo ka melala.”

⁴⁹“Aku reh namaken api ku doni enda; mehuli kal adi api e enggo gara!

⁵⁰Aku pagi ngaloken peridin si tertentu, janah kuga sedakna pusuhku ope denga si e enggo erkedungen! [113†]

⁵¹Akapndu kin maka Aku reh ku doni enda maba dame? Kukataken man bandu, labo maba dame, tapi pertentangen.

⁵²Genduari nari terjadi pertentangen i bas si lima kalak sada jabu, telu kalak ngelawan dua, janah si dua kalak ngelawan telu.

⁵³Bapa ngelawan anakna si dilaki janah anak si dilaki ngelawan bapana; nande ngelawan anakna si diberu, janah anak si diberu ngelawan nandena; simetua ngelawan permainna janah permain ngelawan simetuana.” [114†]

⁵⁴Tole nina Jesus man jelma si nterem, “Adi idahndu reh embun i Barat nari, minter ikatakenndu, ‘Udan atena,’ janah tuhu bage. [115†]

⁵⁵Bage pe adi igejapndu rembus angin i Selatan nari, minter ikatakenndu, ‘Las me wari,’ janah tuhu bage.

⁵⁶O, kalak pekulah-kulah! Ietehndu ertina tanda-tanda i bas doni ras i bas langit. Tapi ngkai maka la iangkandu tanda-tanda masa si genduari enda?”

⁵⁷“Engkai maka la itetapkenndu i bas ukurndu kai arus ibahanndu? [116†]

⁵⁸Adi kam iaduken imbangndu dingen ibabana ku pengadilen, cubakenlah asa ngasupndu erdame ras ia asum kam i bas perdalanen denga gelah ola kam isehkenna ku lebe-lebe hakim, janah hakim nerahken kam ku polisi, jenari itamaken polisi kam ku bas penjara.

⁵⁹Kukataken man bandu maka labo kam ndarat i bas penjara e nari, adi langa kin igalarindu utangndu seh bali.”