Read Batak Karo LUKAS 17 Bible Online

LUKAS 17 - Batak Karo bible

LUKAS 17

¹Jenari nina Jesus man ajar-ajarNa, “La banci lang ndabuh kalak ku bas dosa arah erbage-bage dalan; tapi andiko cilaka kal si arah ia dalanna maka kalak ndabuh ku bas dosa. [136†]

²Ulin me irakuti batu penggilingen i bas kerahungna jenari iambekken ia ku lawit asangken kalak si kitik enda ibabaina erdosa.

³Jagailah dirindu! Adi erdosa seninandu, ajarkenlah ia. Janah adi robah ia, alemilah. [137†]

⁴Bage pe adi ersalah ia pitu kali sada wari nandangi kam, janah tep-tep ersalah, reh ia ndahi kam, janah nina, ‘Aku enggo robah, arus maka ialemikam ia.’ ” [138†]

⁵E maka nina rasul-rasul e man Tuhan, “Pegegehi min kiniteken kami.”

⁶Ngaloi Tuhan, “Adi lit kinitekenndu sengkebuah sabi lah gia, banci ikatakenndu man batang ara enda, ‘Meruahlah kam, suanken bandu i bas lawit!’, janah minter pe ikutkenna katandu e.”

⁷“Adi sekalak i bas kam lit suruh-suruhenna sangana nenggala ntah pe ermakan biri-biri. Mulih kenca ia i juma nari, minter kin idilondu ia man?

⁸Tentu lang! Tapi nindu, ‘Pesikap nakanku; erbenting kibul kam janah elai aku. Kenca aku elah, e maka banci kam man.’

⁹Ikatakenndu kin bujur man suruh-suruhenndu adi idalankenna kerina kewajipen e?

¹⁰Bage pe kam; adi enggo idalankenndu kerina kewajipenndu, nindulah, ‘Kami enda suruh-suruhen si la erguna, kewajipen kami ngenca idalanken kami.’ ”

¹¹I bas perdalanen Jesus ku Jerusalem, mentas IA arah perbatasen Samaria ras Galilea.

¹²Asum bengket IA ku bas sada kuta, reh sepuluh kalak gadamen njumpai IA. Si sepuluh kalak enda tedis i dauh-dauh nari,

¹³janah alu megang sora erlebuh ia nina, “O, Jesus! O, Tuhan! Mekuah min atendu kami.”

¹⁴Kenca idah Jesus kalak e nina, “To lawes, cidahken badanndu man imam.” I tengah dalan enggo malem penakit kalak enda ndai. [139†]

¹⁵Sekalak i bas si sepuluh kalak e, kenca idahna maka enggo mejelis kulana, mulihken, ia, ipujina Dibata alu sora megang.

¹⁶Erjimpuh ia i lebe-lebe Jesus janah ikatakenna bujur. Kalak si mulihken enda e me kalak Samaria.

¹⁷E maka nina Jesus, “Ma sepuluh kalak kin si malem ndai? I ja siwah kalak nari?

¹⁸Engkai maka kalak si lain bangsa enda ngenca mulihken ngataken bujur man Dibata?”

¹⁹Jenari nina Jesus man bana, “Kekeken to mulihken; kinitekenndu enggo erbahanca kam malem.”

²⁰Piga-piga kalak Parisi nungkun man Jesus kerna ndigan kin rehna Kerajan Dibata e. Erjabap Jesus, “Kinirajan Dibata labo reh alu tanda-tanda si banci iidah manusia.

²¹E maka labo beluh kalak ngatakenca, ‘Enda kap, mari nehen ku jenda,’ ntah pe, ‘Ah, adah i jah kap IA.’ Sabap Kinirajan Dibata e enggo kap i bas kam.”

²²Jenari nina man ajar-ajarNa, “Reh me pagi paksana maka mesikel kam ngidah sada wari i bas wari-wari Anak Manusia si isuruh Dibata, tapi la banci idahndu.

²³Ikataken kalak me pagi man bandu, ‘Nehenlah, i jenda kap IA!’, ntah, ‘I jah kap IA!’ Tapi ola kam ku je ngenehenca.

²⁴Sabap kerehen Anak Manusia persuruhen Dibata i bas warina, bali kap ras kilap si erbinar i langit ngencer i tampukna nari seh seh ku tampukna si deban.

²⁵Tapi ope denga reh warina e, la banci lang maka inanamiNa lebe melala kiniseran dingen itulak bangsa si genduari enda IA.

²⁶Bagi sanga Nuah nai, bage me pe pagi kerna kerehen Anak Manusia persuruhen Dibata e. [140†]

²⁷Kerina kalak, man, minem, sereh bage pe empo, seh warina Nuah bengket ku bas perahuna. Jenari reh banjir si mbelin janah kerina kalak mate gedap. [141†]

²⁸Bage me pe tupung paksa Lut. Kerina kalak man, minem, erbinaga, nukur, nuan-nuan bage pe majekken rumah. [142†]

²⁹Tapi i bas warina Lut nadingken Sodom, ipesusur Dibata me udan api ras kertah i langit nari si erbahanca jelma si nterem mate.

³⁰Bage me pe pagi jadi i bas warina Anak Manusia persuruhen Dibata ncidahken diriNa.

³¹Ise pagi paksa si e kundul-kundul pekesahken i darat, olanai ia bengket ku rumah muat erta-ertana; bage pe kalak si i juma olanai ia mulihken ku rumah ngelegi erta-ertana. [143†]

³²Ingetlah ndehara Lut! [144†]

³³Ise si mpertahanken kegeluhenna, ia kebenen geluhna si tuhu-tuhu; tapi kalak si kebenen geluhna, si tuhuna ia enggo mpertahanken kegeluhenna si tuhu-tuhu. [145†]

³⁴Kukataken pe man bandu, i bas berngi si e pagi lit dua kalak medem i bas sada ingan medem: sekalak ibuat, sekalak nari itadingken.

³⁵Dua kalak diberu sanga nutu, sekalak ibaba sekalak nari itadingken.” [

³⁶Dua kalak dilaki si i juma: sekalak ibaba, sekalak nari itadingken.]

³⁷E maka nungkun ajar-ajar man Jesus nina, “I ja e pagi jadi Tuhan?” Erjabap Jesus, “I ja lit bangke, i je pulung perik-perik si man bangke.”