Read Batak Karo LUKAS 2 Bible Online

LUKAS 2 - Batak Karo bible

LUKAS 2

¹Paksa si e Agustus kepala pemerentahen Roma, nuruh kerina rayat si lit i bas daerah kekuasanna gelah isensus.

²Enda me sensus si pemena. Sanga si e, Kirenius me gubernur i Siria.

³E maka kerina kalak berkat ku kuta pengulihenna gelah isensus.

⁴Jusup pe berkat i kuta Nasaret i Galilea nari ku kuta Betlehem i daerah Judea, kuta ketubuhen Raja Daud; sabab Jusup kesusuren Daud kap.

⁵Jusup nuratken gelarna ras tunangenna Maria si enggo mehuli kulana.

⁶Kenca seh i Betlehem, seh me paksana ia mupus.

⁷E maka ipupusna me anakna sintua dilaki, ibalutina alu ampan janah ipepedemna i bas pelangkah sabap lanai lit ingan i bas rumah penginapen.

⁸I bas daerah e lit piga-piga kalak permakan sangana ngiani asuh-asuhen i mbalmbal.

⁹Rempet tedis sekalak malekat Tuhan ilebe-lebe permakan ndai, janah terang si rehna i bas Tuhan nari ersinalsal ku sekelewetna. Mbiar kal permakan-permakan e,

¹⁰tapi nina malekat man bana, “Ola mbiar: Aku reh maba Berita Si Meriah, si mereken keriahen si mbelin man kerina manusia.

¹¹Sendah i Kuta Daud enggo tubuh Juruselamat man bandu, e me Kristus Tuhan.

¹²Si jadi tanda kari man bandu e me: idapetindu kari anak-anak ibaluti alu uis, medem i bas pelangkah.”

¹³Rempet teridah nterem malekat Surga tedis ras malekat si ndai dingen rende muji Dibata,

¹⁴“Terpujilah Dibata i bas Surga si meganjangna. Janah dame i doni man manusia si ngena ateNa.”

¹⁵Kenca malekat-malekat mulihken ku Surga nina permakan sapih-sapih ia, “Ota lawes kita ku Betlehem ngenehen kejadin si lit i je, bagi ikatakan malekat Tuhan ndai man banta.”

¹⁶E maka pedas-pedas berkat permakan ndai janah idapetina Maria ras Jusup dingen idahna pe Anak e medem i bas pelangkah.

¹⁷Asum permakan-permakan ngidah Anak e, iturikenna man Jusup ras Maria kai si enggo ikataken malekat man bana kerna Anak e.

¹⁸Jenari iturikenna pe man kalak si deban, janah kemamangen kerina kalak si megi berita si ikataken permakan e.

¹⁹Tapi rukur Maria kerna erti kata e janah ibunikenna i bas ukurna.

²⁰Jenari mulih permakan-permakan janahna rende muji Tuhan, sabap kerina si enggo ibegina ras idahna payo bagi si ikataken malekat ndai man bana.

²¹Kenca umur waluh wari isunatkenna Anak ndai. Janah ibahanna gelarNa Jesus, e me gelar si enggo ibereken malekat ope denga IA lit i bas bertin. [16†]

²²Seh me paksana Jusup ras Maria ngelakoken lakon pembersihen rikutken kai si iaturken Musa. E maka ibabana Anak e ku Jerusalem gelah ipersembahken man Tuhan. [17†]

²³Sabap bagenda kap tersurat i bas kitap perentah-perentah Tuhan, “Kerina anak sintua dilaki arus ipersembahken man Tuhan.” [18†]

²⁴Bage pe ibabana ka nge man persembahen sada pasang ndukur ntah dua nderapati si nguda denga, rikutken si itetapken i bas kitap undang-undang Tuhan.

²⁵I bas paksa e lit i Jerusalem sekalak dilaki gelarna Simeon. Ia kalak bujur dingen si erkemalangen man Dibata, janah tertima-tima ia nandangi Keselamaten kalak Israel. Kesah Dibata nemani ia,

²⁶ngataken man bana maka la ia mate adi langa kin idahna Mesias si enggo ipadanken Tuhan.

²⁷Alu ibabai Kesah Dibata bengket ia ku Rumah Pertoton. Asum Jesus, anak si kitik e ibaba orang tuaNa ku bas Rumah Pertoton gelah ilakoken man bana kai si enggo itentuken rikutken ajaren agama,

²⁸ialo-alo janah iangkip Simeon me IA, ikatakenna bujur man Dibata nina,

²⁹“Genduari o Tuhan, enggo isehkenNdu padanNdu. Malem ateku aminna mate pe aku.

³⁰Sabap enggo kuidah alu matangku jine, penampat si rehna i bas Kam nari.

³¹Penampat si isikapkenNdu man kerina bangsa,

³²bali ras terang si ersinalsal man bangsa si deban, gelah reh ndahi Kam e me terang si mereken kemulian man bangsaNdu Israel.” [19†]

³³Mamang ate Jusup ras Maria megi si ikataken Simeon kerna Anak e.

³⁴Ipasu-pasu Simeon ia, jenari nina man Maria, “Anak enda enggo itetapken Dibata maka erkiteken IA nterem kalak Israel guling tah pe tedis. IA pagi jadi tanda i bas Dibata nari, si itulak nterem kalak, janah

³⁵alu bage jadi tangkas me kerina perukuren-perukuren si terbuni. Kam o Maria, ceda pagi atendu. Tempa-tempa itebak pedang pagi pusuhndu.”

³⁶Lit sekalak nabi diberu si enggo metua kal. Gelarna Hanna, anak si Panuel i bas suku Aser nari. Pitu tahun dekahna ia erjabu.

³⁷Anna enggo mbalu, umurna genduari 84 tahun, la pernah nadingken Rumah Tuhan. Suari berngi ia muji Tuhan, alu ertoto ras erpuasa.

³⁸Asum Simeon masu-masu Anak e reh Anna ndeheri Jesus ikatakenna bujur man Dibata, janah iturikenna kerna Anak e, man kerina kalak si nimai-nimai warina Jerusalem ibebasken Dibata.

³⁹Kenca dung ilakokenna kerina rikutken si iaturken i bas perentah Tuhan, mulihken me ia ku kutana e me Nasaret i daerah Galilea. [20†]

⁴⁰Anak e reh belinna dingen reh gegehna; pentar IA janah tetap ipasu-pasu Dibata.

⁴¹Tep-tep tahun orang tua Jesus berkat ku Jerusalem guna ngerayaken Wari Paskah. [21†]

⁴²Kenca umur Jesus sepuluh dua tahun, berkat Ia teluna ngerayaken Wari Paskah bagi biasana.

⁴³Kenca dung perayan e, mulih ia, tapi Jesus tading i Jerusalem. Orang tuana la meteh kerna si e.

⁴⁴Iakapna kin Jesus sangana erdalan ras kalak si nterem si mulih i Jerusalem e nari. Kenca erdalan sada wari e maka idaramina ku kade-kadena ras teman-temanna.

⁴⁵Perbahan lalap la ia jumpa, e maka mulihken Jusup ras Maria ku Jerusalem ndaramisa.

⁴⁶I bas wari si peteluken idapetina Jesus kundul ras guru-guru agama Jahudi i bas Rumah Pertoton. Ibegiken Jesus pengajaren guru-guru e janah isungkuniNa pe.

⁴⁷Janah adi nungkun guru-guru e man baNa mamang ate kalak kerina megi jabapNa si dem kepentaren e.

⁴⁸Orang tuana pe mamang atena ngidah IA, jenari nina nandeNa man baNa, “O Anakku, ngkai maka bagenda perbahanenNdu man kami? Aku ras bapandu enggo ndarami Kam alu aru ate.”

⁴⁹Erjabap Jesus man bana, “Engkai maka idaramindu Aku? La kin ietehndu Aku arus i rumah BapangKu?”

⁵⁰Tapi la iangka nande ras bapaNa kai si ikatakenNa e.

⁵¹Jenari mulih IA radu ras orang tuaNa ku Nasaret; ibegikenNa kata orang tuaNa. Kerina si enggo jadi enda itimbangken nandeNa i bas ukurna.

⁵²Jesus pe reh belinna dingen reh tambahna pemetehNa, janah reh tambahna pe ngena ate Dibata ras manusia man baNa. [22†]