Read Batak Karo LUKAS 22 Bible Online

LUKAS 22 - Batak Karo bible

LUKAS 22

¹Wari Raya Roti la erragi si igelari Paskah enggo ndeher. [166†]

²Imam-imam si mbelin ras guru-guru agama Jahudi ndarami dalan guna munuh Jesus, sabap mbiar ia kalak si nterem.

³Judas, si igelari Iskariot sekalak i bas ajar-ajar si sepuluh dua kalak, ikuasai Iblis ukurna.

⁴E maka lawes ia, jenari arih-arih ia ras imam-imam si mbelin bage pe pengulu Rumah Pertoton kerna kengasupenna ndudurken Jesus man kalak e.

⁵Meriah kal ukur kalak e janah erpadan ia mereken duit man Judas Iskariot.

⁶Judas setuju kerna si e. Jenari idaramina me kesempaten si cocok guna ndudurken Jesus alu la ieteh kalak si nterem.

⁷Seh me Wari Raya Roti si La Itama Ragi. I bas wari e kerina kalak nggeleh biri-biri guna man-man Paskah.

⁸Isuruh Jesus Petrus ras Johanes nina, “To pesikap pangan Paskah man banta gelah ras-ras kita man.”

⁹Nungkun kalak e nina, “I ja atendu isikapken kami?”

¹⁰Erjabap Jesus, “Begiken! Seh kenca kam kari i bas kuta ah, jumpa kam ras sekalak dilaki si maba lau tare tambe. Ikutken ia ku rumah.

¹¹Sungkun kari si mada rumah e, Guru nungkun bandu, ‘Kamar si apai banci Kupake ras ajar-ajarKu guna man-man Paskah?’

¹²E maka ituduhkenna kari man bandu sada kamar si mbas i datas loteng, si enggo sikap. I je me sikapken kerina si perlu guna ngerayaken Paskah.”

¹³E maka lawes me Petrus ras Johanes. Idapetina kerina bagi si enggo ikataken Jesus man bana, jenari isikapkenna pangan guna Paskah e.

¹⁴Kenca seh jam man, kundul Jesus ras rasul-rasul e.

¹⁵Nina Jesus man kalak e, “Mesikel kal aku ngerayaken Paskah ras kam ope denga Aku ngenanami kiniseran.

¹⁶Sabap lanai bo pagi kupan e seh Wari Paskah si tuhu-tuhu i bas Kinirajan Dibata.”

¹⁷Jenari ibuat Jesus calung, itotokenNa ngataken bujur man Dibata, e maka nina man ajar-ajarNa, “Buat enda, jenari bagi-bagiken i bas kam kerina.

¹⁸Sabap lanai bo pagi kuinem anggur enda, genduari nari seh ngayak kerehen Kinirajan Dibata.”

¹⁹Kenca bage ibuatNa roti, ertoto IA ngataken bujur man Dibata. Icepik-cepikNa roti e jenari iberekenNa man rasul-rasul nina, “Enda me dagingKu [si ibereken man gunandu. Bahanlah bagenda guna peringet-ingeten man bangKu.”

²⁰Bage me pe, kenca elah man e ibereken Jesus calung nina, “Arah calung enda Dibata erbahan Padan si Mbaru si iesahken alu darehKu si mambur man gunandu.] [167†]

²¹Tapi, nehenlah! Sekalak si ndudurken Aku i bas meja enda ras Aku. [168†]

²²Sabap Anak Manusia si isuruh Dibata la banci lang mate bagi si enggo itetapken Dibata. Tapi andiko, cilaka me kalak si ndudurkenca e!”

²³Jenari mulai me ajar-ajar e sisungkun-sungkunen ntah ise kin i bas ia si atena erbahan bage.

²⁴Turah me perubaten i bas ajar-ajar kerna ise kin si mbelinna i bas ia. [169†]

²⁵Nina Jesus kalak e, “Raja bangsa-bangsa si la nandai Dibata erbahan mesui ate bangsana janah si erkuasa ibahan gelarna ‘Teman Kalak si nterem.’ [170†]

²⁶Tapi kam ola bage; kalak si mbelinna i bas kam arus jadi si kitikna, janah si atena jadi peminpin arus bali ras suruh-suruhen. [171†]

²⁷Apai kin ergan kalak si kundul man asangken kalak si ngelai ia? Tentu kalak si kundul. Tapi Aku i tengah-tengahndu bagi kalak si ngelai kap. [172†]

²⁸Kam enggo ras Aku nggengken kerina kiniseranKu.

²⁹Bali ras Bapa enggo mereken man bangKu Kinirajan e, Kubereken ka pe man bandu Kinirajan e.

³⁰Banci kam ikut man ras minem ras Aku i bas KinirajanKu. Janah man bandu ibereken pagi ingan kundul jadi pemerentah guna ngadili suku Israel si sepuluh dua.” [173†]

³¹“O, Simon, Simon! Begikenlah! Iblis enggo iijinken ncubai kam kerina bagi kalak si miari gandum.

³²Tapi enggo Kutotoken kam Simon, gelah kinitekenndu ola nimpet. Janah adi enggo kam jera, pegegehilah senina-seninandu gelah tetap kinitekenna.”

³³Ngaloi Petrus, “O Tuhan, aku enggo pang ku bas penjara ntah pe mate ras Kam.”

³⁴Ngaloi Jesus, “O Petrus, Kukataken man bandu: Ope tekuak manuk enggo ipersokendu Aku telu kali.”

³⁵Tole nina Jesus man ajar-ajarNa, “Asum Kusuruh kam mbaru enda lawes alu la maba dompet, gajut-gajut ntah sepatu, lit kin si kurangenndu tupung e?” [174†]

³⁶Erjabap kalak e, “La lit kai pe si kurang.” Nina Jesus, “Tapi genduari ise lit dompetna ntah gajut-gajutna, babalah. Bage pe ise si langa lit pedangna, idayakennalah uisna guna nukur pedang.

³⁷Kukataken man bandu maka i bas Pustaka Si Badia lit tersurat ‘IA iperseri ras kalak jahat’ la banci la jadi man Bangku. Sabap si tersurat i bas Pustaka Si Badia kerna Aku sangana terjadi.” [175†]

³⁸Nina ajar-ajar, “O Tuhan! Enda dua pedang.” Ngaloi Jesus, “Enggo me bias.”

³⁹Kenca bage itadingken Jesus kuta e. Bagi biasana lawes IA ku Uruk Seton ras ajar-ajarNa.

⁴⁰Kenca seh i bas ingan e nina man ajar-ajarNa, “Ertotolah gelah ola kam kena percuban.”

⁴¹Jenari iserapken Jesus baNa i bas ajar-ajar e nari, dauhna asa gegeh mbenterken batu. I je erjimpuh IA dingen ertoto,

⁴²nina, “O Bapa, adi banci pedauh min calung kiniseran enda i bas Aku nari. Tapi labo peratenKu, peratenNdulah jadi.” [

⁴³Teridah me man baNa sekalak malekat i Surga nari si pegegehi IA.

⁴⁴Perbahan bage getemna pusuhNa, e maka reh gegehna IA erbebe i bas pertotonNa seh maka panasNa naktaken ku taneh bagi taktak dareh.]

⁴⁵Kenca dung IA ertoto mulihken IA ndahi ajar-ajarNa. IdapetiNa ajar-ajar e tunduh perbahan cedana atena.

⁴⁶Jenari nina Jesus man kalak e, “Engkai maka kam tunduh? Kekeken janah ertotolah gelah ola kam kena percuban.”

⁴⁷Sanga Jesus ngerana denga, reh sada rombongen kalak nterem. Judas, sekalak i bas ajar-ajar si sepuluh dua kalak, mabai rombongen e. Ideheri Judas e Jesus jenari iemana.

⁴⁸Tapi nina Jesus, “O, Judas, alu ema enda kin kam ndudurken Anak Manusia si isuruh Dibata?”

⁴⁹Asum idah ajar-ajar ras Jesus kai si nandangi jadi nina man Jesus, “O Tuhan, ilawan kami ia alu pedang enda?”

⁵⁰Jenari sekalak ajar-ajar e minter ngelawan sekalak suruh-suruhen Imam si Mbelin seh maka retap cupingna si arah kemuhen.

⁵¹Tapi nina Jesus, “Enggo me.” Jenari idadap Jesus cuping kalak ndai jenari ipepalemNa.

⁵²E maka ngerana Jesus man imam-imam si mbelin, pengulu Rumah Pertoton ras peminpin-peminpin Jahudi si reh ku IA nina, “Iakapndu kin Aku enda sekalak pengerampok maka reh kam maba pedang ras perpalu?

⁵³Tep-tep wari Aku ras kam i bas Rumah Pertoton janah labo Aku itangkapndu. Tapi enda me paksa si cocok man bandu, asum kuasa kegelapen erkuasa.” [176†]

⁵⁴Jenari itangkap kalak si reh e Jesus janah ibabana ku rumah Imam si Mbelin. Petrus ngikutisa i dauh-dauh nari.

⁵⁵I tengah kesain lit kalak pegara api janah kundul kalak e i kelewetna cudu. Petrus pe ku je kundul.

⁵⁶Sekalak juak-juak diberu ngidah Petrus kundul i deher api e. Ipepayona kal jenari nina, “IA pe teman Jesus kap!”

⁵⁷Tapi merso Petrus nina ngaloi, “O bibi, la kutandai pe IA!”

⁵⁸La ndekahsa kenca si e, lit ka kalak si deban ngidah ia janah nina, “Kam pe temanNa kap!” Tapi ngaloi Petrus, “Lang teman, aku labo!”

⁵⁹Kira-kira sada jam kenca si e, lit kalak si deban ngerana alu tegas nina, “Enggo pasti ia pe pengikutNa, sabap ia pe kalak Galilea!”

⁶⁰Tapi ngaloi Petrus, “La kueteh kai si ikatakenndu e!” Asum Petrus ngerana denga minter tekuak manuk.

⁶¹Jenari itulihken Tuhan kempak Petrus. Inget Petrus pe maka enggo ikataken Tuhan man bana, “Ope denga tekuak manuk i bas berngi enda, enggo ipersokenndu Aku telu kali.”

⁶²E maka lawes Petrus ndarat janah tangis ia perbahan ceda atena.

⁶³Kalak si erjaga nggombang-gombangi Jesus dingen mekpeki IA.

⁶⁴Itutupina ayo Jesus jenari nina, “Kataken, ise si mekpek Kam?”

⁶⁵Melala denga pe cekurak si deban ibelaskenna man Jesus.

⁶⁶Kenca terang wari pulung me pertua-pertua kalak Jahudi, imam-imam si mbelin ras guru-guru agama. Jenari ibabana Jesus ku lebe-lebe Pengadilen Agama.

⁶⁷Nina kalak e, “Kataken man kami, Kam kin Mesias si ipadanken Dibata?” Erjabap Jesus, “Adi Kukataken pe man bandu, labo kam tek.

⁶⁸Janah adi Kusungkun pe kam, labo ka ijabapndu.

⁶⁹Tapi mulai genduari nari Anak Manusia si isuruh Dibata kundul arah kemuhen Dibata si Mada Kuasa.”

⁷⁰Nina kalak ndai kerina, “Dage, Kam kin Anak Dibata?” Erjabap Jesus, “Bagi katandu e me!”

⁷¹Jenari nina kalak e, “Kita lanai perlu saksi! Enggo si begi kai si ikatakenNa.”