Read Batak Karo LUKAS 23 Bible Online

LUKAS 23 - Batak Karo bible

LUKAS 23

¹Jenari tedis kerina anggota sidang e. Ibabana Jesus ngadap man Pilatus.

²Iadukenna Jesus nina, “Enggo tangkas man kami uga pemabaiNa bangsa kami papak. Iajuk-ajukna kalak gelah ola nggalar pajak man Pemerentah Roma janah ikatakenNa maka IA kap Kristus, Raja e.”

³Nungkun Pilatus man Jesus nina, “Kam kin Raja kalak Jahudi?” Erjabap Jesus, “Bagi katandu e me!”

⁴Jenari nina Pilatus man imam-imam si mbelin ras kalak si nterem, “La lit ku dat kesalahen kai pe i bas IA.”

⁵Tapi igegehi kalak ndai ngatakenca, “Iajuk-ajukNa kerina rayat taneh Jahudi alu pengajarenNa. Ibenakenna i Galilea janah genduari enggo seh ku jenda.”

⁶Kenca ibegi Pilatus si e, nungkun ia nina, “Kalak Galilea kin IA?”

⁷Kenca ietehna maka Jesus i taneh si ikuasai Herodes nari, e maka isuruhna Jesus ngadap man Herodes. Paksa si e Herodes pe i Jerusalem.

⁸Asum idah Herodes Jesus meriah kal ukurna. Sabap ndekah me ibegina berita kerna Jesus dingen mesikel ia ngidahsa. Ngarap pe ia ngidah Jesus erbahan tanda-tanda sengget.

⁹E maka melala penungkunenna man Jesus, tapi sengkebabah ranan pe la ijabap Jesus.

¹⁰Paksa si e pe, reh ku lebe imam-imam si mbelin ras guru-guru agama kalak Jahudi. Alu merawa-rawa ikatakenna pengadunna nandangi Jesus.

¹¹E maka Herodes ras tentera-tenterana mulai nggombang-gombangi dingen ngisak-ngisakken Jesus. Ipakekenna baju si mehaga man bana jenari isuruhna mulih ku Pilatus.

¹²Mulai i bas wari si ndai enggo erteman Herodes ras Pilatus. Ope denga si e la ia meriah.

¹³Kenca bage ipepulung Pilatus imam-imam si mbelin ras peminpin-peminpin bage pe kalak si nterem.

¹⁴Nina man kalak e, “Enggo ibabandu IA ngadap man bangku janah ikatakenndu maka iajariNa bangsa enda papak. Genduari enggo IA kuperiksa i lebe-lebendu, tapi la lit kudat salahNa bagi si ikatakenndu e.

¹⁵Herodes pe la lit idatna salahNa, e maka isuruhna IA mulihken man banta. Si tuhuna labo lit salahNa si sue ras ukumen mate.

¹⁶Perbahan si e, iligasi saja me IA jenari ibebasken.” [

¹⁷I bas tep-tep Wari Raya Paskah, Pilatus arus mulahi sekalak kalak tahanen man kalak si nterem.]

¹⁸Nina kalak si nterem e alu megang, “Bunuh IA! Pulahi Barabas man kami!” (

¹⁹Barabas enda ipenjaraken asum ia ikut i bas pemberontaken ras pembunuhen si jadi i bas kuta e.)

²⁰Ngerana ka Pilatus alu megang man kalak si nterem sabap atena mulahi Jesus.

²¹Tapi ngaloi kalak si nterem alu sora si megang nina, “Pakukenlah IA! Pakukenlah IA ku kayu persilang!”

²²Petelu kaliken ngerana Pilatus nina, “Kejahaten kai kin si tuhuna enggo ibahanNa? La kap lit kudat salahNa sue ras ukumen mate. Iligasi saja me IA jenari ipulahi.”

²³Tapi igegehi kalak e asa gangna sorana gelah Jesus ipakuken ku kayu persilang. Dungna menang me kalak si nterem e.

²⁴E maka iputusken Pilatus ukumen Jesus bagi pemindon kalak si nterem.

²⁵Ipulahina sekalak si ipindoken kalak si nterem, e me kalak si ipenjaraken erkiteken pemberontaken ras pembunuhen. Tapi Jesus iendeskenna man kalak si nterem gelah ibahanna bagi ate-atena.

²⁶Jesus ibaba ku darat kota. I tengah dalan simbel ras sekalak dilaki si atena bengket ku kota e, gelarna Simon i Kireni nari. Itangkap serdadu e ia, jenari ipaksana mersan kayu persilang Jesus janah erdalan ngikutken IA.

²⁷Nterem kal jelma si ngarakken Jesus. I bas si e lit piga-piga diberu; itangisi diberu e me Jesus.

²⁸Itulihken Jesus kempak diberu e, jenari nina, “O diberu-diberu Jerusalem! Ola tangisindu Aku, tapi tangisilah bandu ras anak-anakndu.

²⁹Sabap reh me pagi warina maka ikataken kalak, ‘Sangap kal diberu si la ertuah, si la pernah mupus dingen si la pernah pepinemken!’

³⁰Paksa si e pe ikataken kalak man deleng-deleng, ‘Runtuhlah, dabuhi min kami!’, janah man uruk-uruk nina, ‘Tamburi min kami!’ [177†]

³¹Sabap adi bagenda me perbahanen kalak nandangi kayu si meratah, apai denga ka nandangi kayu si kerah?”

³²Lit pe dua kalak nari ibaba kalak e, e me kalak si jahat guna iukum mate raduken Jesus.

³³Kenca seh kalak e i bas ingan si igelari “Takal-takal”, ipakukenna Jesus ku kayu persilang. Penjahat si dua kalak e pe ipakukenna ka, sekalak arah kemuhen Jesus, sekalak arah kawesNa.

³⁴Nina Jesus ertoto, “O Bapa, alemi min kalak enda, sabap la iangkana kai si ibahanna enda.” Ibagiken kalak e uis Jesus alu erbahan tikam tanduk. [178†]

³⁵Kalak si nterem tedis janahna ngenen-ngenen, janah peminpin-peminpin kalak Jahudi nokoh-nokohi Jesus nina, “Kalak si deban isampatiNa; pelepaslah IA mulahi baNa adi IA kin Mesias si ipadanken Dibata e.” [179†]

³⁶Perajurit-perajurit pe nokoh-nokohi Jesus; ideherina IA janah iberekenna anggur macem man baNa, [180†]

³⁷jenari nina, “Adi Kam kin Raja kalak Jahudi, pulahilah baNdu!”

³⁸I babo Jesus lit isuratken, “Enda me Raja kalak Jahudi.”

³⁹Sekalak i bas penjahat si ipakuken i je igombangina Jesus, nina, “Ma Kam kin Mesias si ipadanken Dibata e? Pulahilah baNdu dingen pulahi pe kami!”

⁴⁰Tapi ipandang sekalak nari ia nina, “La kin kam mbiar Dibata? Kita seri ukumenta ras IA.

⁴¹Adi kita ma bujur nge bagenda, sabap kita iukum sue nge ras perbahanenta. Tapi IA labo lit perbahanenNa si salah.”

⁴²Jenari nina man Jesus, “O Jesus, inget aku asum Kam reh pagi jadi Raja!”

⁴³Ngaloi Jesus man bana, “Kukataken man bandu maka sendah me kam ras Aku i Pardis.”

⁴⁴Kira-kira pukul sepuludua matawari lanai ersinalsal janah gelap kerina negeri e seh pukul telu.

⁴⁵Kire-kire Rumah Pertoton merigat erbelah dua. [181†]

⁴⁶Serko Jesus alu megang soraNa nina, “O Bapa, ku bas tanNdu Kuendesken tendingKu!” Kenca ikatakenNa si e, mate IA. [182†]

⁴⁷Asum idah kepala perajurit kai si enggo jadi ipujina Dibata nina, “Tuhu-tuhu IA la ersalah!”

⁴⁸Kalak si nterem si pulung i je ngenen-ngenen, mulih ku rumahna nemtemi bana kenca idahna kai si enggo jadi e.

⁴⁹Kerina teman-teman Jesus, ikut pe diberu-diberu si enggo ngikutken IA i Galilea nari, i dauh-dauh nari ia tedis ngenehen kejadin e kerina. [183†]

⁵⁰ [50-51] Lit i je sekalak gelarna Jusup. Asalna i kuta Arimatea i taneh Judea nari. Ia kalak bujur dingen ihamati kalak si nimai kerehen Kinirajan Dibata. Aminna gia anggota Sidang Mahkamah Agama, tapi ia la setuju keputusen ras tindaken Mahkamah e.

⁵¹

⁵²Lawes ia ngadap man Pilatus guna mindo mait Jesus.

⁵³Kenca ipesusurna mait e ibalutina alu uis mbentar. Jenari itamakenna ku bas kuburen si itukak i bas lingling batu kuburen si langa pernah ipake.

⁵⁴Wari e wari Jumat; jam persikapen wari Sabat nandangi seh.

⁵⁵Diberu-diberu si ngikutken Jesus i Galilea nari e ikut ras Jusup. Iperdiatekenna kuburen e, janah idahna pe kuga mait Jesus itamaken ku bas kuburen e.

⁵⁶Kenca bage mulih ia ku rumah nikapken rempah-rempah si merim ras minak wangi guna mait Jesus. I bas wari Sabat la ia banci erdahin bagi si iperentahken Undang-undang. [184†]