Read Batak Karo LUKAS 24 Bible Online

LUKAS 24 - Batak Karo bible

LUKAS 24

¹Erpagi-pagi si lampas i bas wari Minggu, berkat diberu-diberu e ku kuburen. Ibabana rempah-rempah si merim si enggo isikapkenna.

²Idapetina batu si nutupi lubang kuburen e enggo igulingken.

³E maka bengket ia ku bas; tapi lanai i je mait Tuhan Jesus.

⁴Asum kalak e tedis i je dingen mamang atena, rempet tedis i deherna dua kalak dilaki, uisna terang ersinalsal.

⁵Mbiar kal diberu-diberu e, e maka nembah mungkuk ia seh ku taneh. Tapi nina si dua kalak e man bana, “Engkai maka idaramindu Kalak si nggeluh i tengah-tengah kalak si enggo mate?

⁶IA lanai i jenda; IA enggo ipekeke. Ingetlah kai si enggo ikatakenNa man bandu asum IA i Galilea denga, e me, [185†]

⁷‘Anak Manusia si isuruh Dibata la banci lang iendesken man kalak perdosa, ipakuken ku kayu persilang janah i bas wari peteluken nggeluh mulihi.’ ”

⁸Kenca bage i inget diberu-diberu e kai si enggo ikataken Jesus.

⁹Jenari mulih ia i kuburen nari, e maka iturikenna kerina kejadin enda man ajar-ajar si sepuluh sada bage pe man ajar-ajar si deban.

¹⁰Gelar diberu-diberu e: Maria Magdalena, Johana ras Maria nande Jakup. Bage pe diberu-diberu si deban si ikut ras kalak enda nurikenca man rasul-rasul e.

¹¹Tapi la tek rasul-rasul e. Iakapna maka kai si ikataken diberu-diberu e guak saja.

¹²Tapi keke Petrus jenari kiam ia ku kuburen. Asum itungkirna ku bas, uis mbentar balut mait e nari ngenca idahna, lain si e kai pe la lit. E maka mulih ia ku rumah dingen mamang atena kerna kai si enggo jadi e.

¹³I bas wari e pe lit dua kalak ajar-ajar Jesus lawes ku sada kuta. Gelar kuta e Emaus. Kuta e kira-kira sepuluh sada kilometer i Jerusalem nari. [186†]

¹⁴I tengah dalan ercakap-cakap ia duana kerna kerina si enggo jadi e.

¹⁵Asum ia ercakap-cakap, reh me Jesus ndeheri ia dingen erdalan ras.

¹⁶Idah si dua kalak e nge Jesus, tapi la itandaina.

¹⁷Nina Jesus man bana duana, “Kerna kai nge si icakapkenndu janah erdalan e?” Jengang kalak e janah teridah i bas ayona maka ceda atena.

¹⁸Sekalak i bas ia gelarna Keleopas ngaloi man Jesus nina, “Ntah kam kal nge ngenca kalak pertandang i Jerusalem si la meteh kerna kejadin-kejadin i bas wari-wari si perpudi enda?”

¹⁹“Kai kin e?” nina Jesus nungkun. Erjabap kalak e, “Kerna kai si enggo jadi man Jesus kalak Nasaret e. IA sekalak nabi janah erkuasa i bas kata ras perbahanen subuk iakap Dibata bage pe kerina manusia.

²⁰Tapi IA enggo idudurken imam-imam si mbelin ras kalak si erkuasa gelah iukum mate. IA ipakuken ku kayu persilang.

²¹Pada hal enggo iarapken kami maka IA me si mbebasken bangsa Israel. Tapi i babo si e kerina sendah me petelu wariken kenca kejadin e.

²²Lit ka pe piga-piga teman kami si diberu si erbahanca kami sengget. Ndai erpagi-pagi si lampas lawes ia ku kuburen,

²³tapi lanai lit i je idapetina mait Jesus. Jenari mulihken ia janah iturikenna maka ia enggo ngidah malekat-malekat. Ikataken malekat-malekat e man bana maka Jesus nggeluh kap.

²⁴Kenca bage piga-piga kalak teman kami lawes ku kuburen. Idapetina payo kal bagi si ikataken diberu-diberu e. Tapi la idahna Jesus.”

²⁵Jenari nina Jesus man si dua kalak e, “Bodoh kal kam tuhu dingen mesera kal iakapndu tek nandangi kai si ikataken nabi-nabi.

²⁶Ma kin Mesias si ipadanken Dibata e arus ngenanami kiniseran e janah alu bage bengket kemulianNa?”

²⁷Jenari iterangken Jesus man si dua kalak e kai si enggo isuratken i bas Pustaka Si Badia kerna IA, mulai i bas kitap-kitap Musa ras kerina kitap nabi-nabi.

²⁸Kenca seh kalak e ku kuta si man dahinna, Jesus tempa-tempa nerusken perdalanenNa.

²⁹Tapi si dua kalak e mindo alu meseksek nina, “I jendalah kita sendah, sabap wari enggo ben nandangi gelap me.” E maka bengket Jesus ku rumah janah tading IA ras kalak ndai.

³⁰Ibuat Jesus roti, ikatakenNa bujur man Dibata jenari icepik-cepikNa janah iberekenNa man kalak e.

³¹Kenca bage minter terang pengidah si dua kalak e janah itandaina Jesus. Tapi i je ka minter lanai iidahna Jesus.

³²Nina si dua kalak e sapih-sapih ia, “Ma malem kal tuhu ateta dingen ergiah-giah ukurta asum IA ngerana ras kita i gedang-gedang dalan dingen iterangkenNa man banta kerna isi Pustaka Si Badia?”

³³Keke ia duana dingen minter mulihken ku Jerusalem. I je idapetina ajar-ajar si sepuluh sada kalak pulung ras teman-temanna si deban. [187†]

³⁴Nina si pulung e ngalo-ngalo ia, “Tuhu-tuhu Tuhan enggo nggeluh mulihken! Enggo icidahkenNa baNa man Simon.”

³⁵Jenari si dua kalak e pe nuriken, kai si enggo jadi i tengah dalan janah kuga ia enggo nandai Tuhan asum icepik-cepikNa roti.

³⁶Asum kalak ndai ercakap-cakap kerna kejadin e, rempet tedis Tuhan i tengah-tengahna janah nina, “Mejuah-juah man bandu.”

³⁷Sengget dingen mbiar kal kalak e. Iakapna maka ia ngidah begu.

³⁸Tapi nina Tuhan man bana, “Engkai maka kam mbiar? Engkai maka turah ukur la tetap i bas kam?

³⁹Nehenlah tanKu ras nahengKu. Perdiateken, ma idahndu Aku nge enda. Dadaplah Aku gelah ietehndu maka adi begu labo lit daging ras tulanna bagi iidahndu lit i bas Aku.”

⁴⁰Asum IA ngerana e icidahkenNa tanNa ras naheNa man kalak e.

⁴¹Tapi langa denga kalak e tek perbahan ia dem alu keriahen dingen mamang denga atena; e maka nungkun Tuhan nina, “Lit pangan i bas kam?”

⁴²Ibereken kalak ndai man baNa sada potong ikan si enggo ipanggang.

⁴³Ibuat Jesus ikan e jenari ipanNa i lebe-lebe kalak ndai.

⁴⁴Jenari nina Tuhan man kalak ndai, “Kai si enggo jadi enda enggo Kukataken nai man bandu asum Aku ras kam denga e me: Kerina si isuratken kerna Aku i bas Undang-undang Musa ras surat nabi-nabi bage pe i bas Masmur enggo jadi kap.”

⁴⁵Kenca bage ibuka Tuhan perukuren kalak e gelah iangkana si tersurat i bas Pustaka Si Badia.

⁴⁶Nina man kalak ndai, “Lit kap tersurat maka Mesias si ipadanken Dibata e arus ngenanami kiniseran, janah i bas wari si peteluken arus keke i bas si mate nari.

⁴⁷Bage pe i bas gelarNa berita kerna jera ras pengalemi dosa arus ipeseh man kerina bangsa, ibenaken i Jerusalem nari.

⁴⁸Kam me jadi saksi si enda kerina.

⁴⁹Janah Aku jine nuruhsa man bandu kai si enggo ipadanken BapangKu. Tapi arus itimaindu i bas kuta enda seh nusur kuasa i datas nari man bandu.” [188†]

⁵⁰Jenari ibabai Jesus kalak e ku darat kuta, seh ku Betani. I je iangkatNa tanNa janah ipasu-pasuNa kalak e. [189†]

⁵¹Asum IA masu-masu, sirang IA ras kalak e; iangkat IA ku Surga.

⁵²Nembah erjimpuh kalak e man baNa, jenari meriah kal ukurna mulih ku Jerusalem.

⁵³Gedang-gedang wari ipujina Dibata i bas Rumah Pertoton.