Read Batak Karo LUKAS 3 Bible Online

LUKAS 3 - Batak Karo bible

LUKAS 3

¹Tiberius enggo sepuluh lima tahun jadi Kepala Pemerentah Roma. Tupung si e Pontius Pilatus jadi gubernur i Judea, Herodes raja i Galilea. Janah sangana Pilipus jadi raja i daerah Iturea ras Trakhonitis; Lisanius jadi raja i Abilene,

²janah Annas ras Kayapas jadi Imam si Mbelin. Tupung e reh Kata Dibata man Johanes anak Sakaria, i taneh si mesawang.

³E maka isiari Johanes kerina daerah aluren Lau Jordan. Iberitakenna Berita i bas Dibata nari nina, “Jeralah i bas dosa-dosandu nari! Tandana kam enggo jera, kam arus iperidiken, gelah dosa-dosandu ialemi Dibata.”

⁴Bagi enggo isuratken Nabi Jesaya i bas kitapna, “Lit sekalak si erlebuh i taneh si mesawang nari, ‘Pesikap dalan Tuhan -- Pepinter dalanNa! [23†]

⁵Kelbung-kelbung arus itambusi, uruk-uruk ras deleng arus ipekendit dalan si meluk-eluk arus ipepinter janah si erlubang-lubang iperata.

⁶Kerina pagi manusia ngidah keselamaten si reh i bas Dibata nari!’ ”

⁷Nterem jelma reh ndahi Johanes gelah iperidikenna. E maka nina man kalak ndai, “O, kalak jahat, ise ngatakenca man bandu, maka banci kam pulah i bas ukumen Dibata si reh pagi? [24†]

⁸Cidahkenlah arah perbahanenndu tandana kam enggo jera i bas dosa nari. Ola nindu i bas ukurndu, ‘Abraham kap nini kami.’ Kukataken man bandu maka Dibata ngasup nge njadiken batu-batu enda jadi kesusuren Abraham. [25†]

⁹Kapak enggo sikap guna nabah batang kayu; kerina batang kayu si la mehuli buahna itabah janah iambekken ku bas api.” [26†]

¹⁰Nungkun kalak e man bana nina, “Kai dage si arus ibahan kami?”

¹¹Erjabap si Johanes, “Ise lit dua bajuna, arus iberekenna sada man kalak si la lit bajuna, bage pe ise si lit nakanna, arus ibagikenna.”

¹²Reh pe ku je kalak pengalo cuke, atena gelah iperidiken, jenari nungkun ia man Johanes nina, “O guru, kai arus ibahan kami?” [27†]

¹³Erjabap si Johanes, “Ola pindo buen asa si enggo itentuken.”

¹⁴Nungkun ka piga-piga tentera nina, “Kuga kami enda? Kai nge arus ibahan kami?” Ngaloi Johanes, “Ola ngerampas ntah ngataken salah man si la ersalah. Janah pebias-biaslah gaji si ibereken man bandu.”

¹⁵Erkiteken kalak si nterem e paksana nima-nimai dingen ngarapken kerehen Mesias si ipadanken Dibata, e maka mamang atena kerna Johanes dingen nungkun i bas ukurna ntah Johanes e kin Mesias si ipadanken e.

¹⁶E maka nina Johanes man bana kerina, “Aku mperidiken kam alu lau, tapi reh me sekalak si belinen asang aku. Ngosari nali sepatuNa pe labo aku metunggung. IA mperidiken kam pagi alu Kesah Si Badia ras api.

¹⁷Ndiruna enggo sikap i bas tanNa guna miari. Ipepulungna page si perngis ku bas lumbung, tapi lapung-lapungna itutungNa i bas api si la ernimpet-nimpet.”

¹⁸Alu erbage-bage pengajaren iberitaken Johanes Berita Si Mehuli i bas Dibata nari man jelma si nterem.

¹⁹Raja Herodes pe iajarkenna sabap iempoina Herodias ndehara seninana janah perbahan enggo melala kejahaten ibahanna. [28†]

²⁰E maka itambahi Herodes pe tole kejahatenna alu namaken Johanes ku bas rumah tutupen.

²¹Kenca kerina kalak si nterem iperidiken, Jesus pe iperidiken ka. Sanga Jesus ertoto talang me langit,

²²janah Kesah Si Badia nusur ku baboNa bagi nderapati. Terbegi pe sora i Surga nari nina, “Kam kap AnakKu si Kukelengi. Kam kap si ngena ateKu.” [29†]

²³Sanga Jesus mulai menaken dahinNa, umurna kira-kira telu puluh tahun. Rikutken pengakap kalak IA e me anak Jusup, anak Eli,

²⁴anak Mattat, anak Lewi, anak Melki, anak Jannai, anak Jusup,

²⁵anak Matatias, anak Amos, anak Nahum, anak Esli, anak Nagai,

²⁶anak Maat, anak Matatias, anak Simei, anak Josek, anak Joda,

²⁷anak Johanan, anak Resa, anak Serubabel, anak Sealtiel, anak Neri,

²⁸anak Melki, anak Addi, anak Kosam, anak Elmadam, anak Er,

²⁹anak Josua, anak Elieser, anak Jorim, anak Matat, anak Lewi,

³⁰anak Simeon, anak Juda, anak Jusup, anak Jonam, anak Eliakim,

³¹anak Malia, anak Menna, anak Matata, anak Natan, anak Daud,

³²anak Isai, anak Obed, anak Boas, anak Salmon, anak Nahesson,

³³anak Aminadap, anak Admin, anak Arni, anak Hesron, anak Peres, anak Juda,

³⁴anak Jakup, anak Isak, anak Abraham, anak Terah, anak Nahur,

³⁵anak Seruh, anak Rehu, anak Peleh, anak Heber, anak Selah,

³⁶anak Kenan, anak Arpaksat, anak Sem, anak Nuah, anak Lameh,

³⁷anak Metusalah, anak Enoh, anak Jaret, anak Mahalalel, anak Kenan,

³⁸anak Enos, anak Set, anak Adam, anak Dibata.