Read Batak Karo LUKAS 6 Bible Online

LUKAS 6 - Batak Karo bible

LUKAS 6

¹Sekali jadi rembang tupung wari Sabat mentas Jesus arah juma gandum. Iputiki ajar-ajar ruhi gandum e, ipiyuina alu tanna, jenari ipanna buahna. [46†]

²Piga-piga kalak Parisi nungkun, “Engkai maka ibahanndu si la banci ilakoken rikutken peraturen agamanta i bas wari Sabat?”

³Erjabap Jesus man kalak Parisi e, “La kin iogendu kuga perbahanen Daud asum ia ras teman-temanna melihe? [47†]

⁴Bengket ia ku bas rumah Dibata, ibuatna roti si ipersembahken man Dibata, ipanna janah iberekenna pe man teman-temanna. Rikutken peraturen-peraturen agamanta ise pe la banci man roti e, seakatan imam-imam.” [48†]

⁵Tole nina Jesus, “Anak Manusia si isuruh Dibata, IA kap Tuhan si engkuasai wari Sabat e.”

⁶I bas wari Sabat si debanna ka bengket Jesus ku bas rumah pertoton, i je ngajar IA. I je lit kalak tanna si kemuhen enggo kesip perban mate serapen.

⁷Piga-piga kalak Parisi ras guru-guru agama ndarami kesalahen Jesus gelah lit dalanna ngaduken IA. E maka iperdiatekenna kal Jesus ntah mawen ipepalemNa kin kalak sakit i bas wari Sabat.

⁸Tapi ieteh Jesus perukuren kalak ndai, e maka nina man kalak si mate serapen tanna e, “Mari tedis kam ku lebe enda!” Keke ia, jenari tedis ia arah lebe.

⁹E maka nina Jesus man kalak si nterem, “Kusungkun kam; rikutken peraturen agamanta kai kin banci si bahan i bas wari Sabat? Erbahan si mehuli ntah si jahat? Nampati geluh manusia ntah munuh?”

¹⁰Ipernehen Jesus kerina jelma si lit ikelewetNa jenari nina man kalak si mate serapen tanna sembelah, “Pepinter tanndu.” E maka ipepinterna tanna janah minter malem.

¹¹Tapi merawa kal ate kalak Parisi ras guru-guru agama, e maka arih-arih ia kerina ntah kai banci ibahanna nandangi Jesus e.

¹²Paksa si e, lawes Jesus ku datas sada uruk-uruk; i je IA ertoto man Dibata seh terang wari.

¹³Kenca terang wari, idiloNa ajar-ajarNa, jenari ipilihNa sepuluh dua kalak i bas si e nari, si igelariNa rasul, e me:

¹⁴Simon (igelari pe Petrus) ras seninana Andreas; Jakup ras Johanes, Pilipus, Bartolomeus,

¹⁵Matius ras Tomas, Jakup anak Alpius, Simon (si igelari pe Pejuang),

¹⁶Judas anak Jakup, Judas Iskariot si ndayaken Jesus.

¹⁷Ngincuah Jesus ras rasul-rasul e kerina, jenari ngadi IA i bas ingan si kendit. I je lit ka piga-piga ajar-ajarNa si deban ras nterem jelma reh i belang-belang daerah Judea ras i Jerusalem nari, bage pe i kuta Tirus ras Sidon nari si i tepi lawit.

¹⁸Reh ia kerina guna megiken pengajaren Jesus dingen mindo gelah penakitna ipepalem. Kalak si setanen pe reh janah penakitna ipepalem.

¹⁹Kerina kalak erpala-pala njemak Jesus, sabap lit Kuasa ndarat i bas IA nari dingen pepalem ia kerina.

²⁰Kenca bage, ipernehen Jesus ajar-ajarNa, jenari nina, “Ketuahen me kam, o kalak musil, sabap man bandu me Kinirajan Dibata.

²¹Ketuahen kam si melihe genduari, sabap ibesuri me kam. Ketuahen kam si tangis genduari, sabap tawa me kam pagi.

²²Ketuahen kam adi segat ate kalak kam janah itulak dingen iisak-isakken ras ikatakenna kam jahat erkiteken Anak Manusia si isuruh Dibata! [49†]

²³Meriahlah ukurndu dingen ersurak-suraklah i bas paksa si e, erkiteken pemere si mbelin isikapken man bandu i Surga. Sabap nini-ninina pe nai bage perbahanenna man nabi-nabi. [50†]

²⁴Tapi, cilaka me kam kalak bayak, sabap enggo ialokenndu kepuasen i bas geluhndu.

²⁵Cilaka me kam si besur genduari; sabap melihe kam pagi! Cilaka me kam si tawa genduari; sabap ceda atendu dingen tangis kam pagi!

²⁶Cilaka me kam adi kerina kalak muji kam; sabap nini-ninina pe nai bage perbahanenna man nabi-nabi perguak.”

²⁷“Tapi man bandu si megiken Aku, Kukataken, Kelengilah imbang-imbangndu, mehulilah perbahanenndu man kalak si ernembeh ate nandangi kam,

²⁸pasu-pasu kalak si numpahi kam, janah totokenlah kalak si erbahan la mehuli man bandu.

²⁹Adi iparap kalak pipindu sembelah, bereken pe parapna pipindu si sembelah nari. Adi ibuat kalak bajundu, bereken pe ras bajundu si deban.

³⁰Adi lit kalak mindo man bandu, berekenlah, janah adi enggo i bas ia olanai pindo mulihken.

³¹Bahanlah man kalak si deban bagi atendu ngena ibahanna man bandu. [51†]

³²Adi kalak si engkelengi kam ngenca ikelengindu, kai nge dalanna maka kam dat pasu-pasu? Kalak perdosa pe keleng nge atena kalak si engkelengi ia.

³³Adi man kalak si mehuli perbahanenna bandu ngenca ibahanndu mehuli kai nge dalanna maka kam dat pasu-pasu? Kalak perdosa pe bage nge perbahanenna.

³⁴Adi man kalak si ngasup ersimulih ngenca ipinjamkenndu kai nge dalanna kam dat pasu-pasu? Kalak perdosa pe ipinjamkenna nge man kalak perdosa, janah ialokenna pe mulihken asa si iberekenna e.

³⁵Tapi kam, kelengilah imbang-imbangndu janah mehulilah perbahanenndu man bana; pinjamken janah ola arapken mulih. Alu bage maka ialokenndu pagi upahndu si mbelin janah kam jadi anak-anak Dibata si Meganjangna. Sabap Dibata mehuli nge man kalak si la ngataken bujur bage pe man kalak si jahat.

³⁶Mekuah atendu bagi ate Bapandu mekuah!”

³⁷“Ola isalahkenndu kalak si deban, maka kam pe pagi la isalahken Dibata; ola ukum kalak si deban, maka kam pe pagi la iukum Dibata; alemilah kalak si deban, maka kam pagi ialemi Dibata.

³⁸Berelah kalak si deban, maka kam pe pagi ibere Dibata; ialokenndu me pagi sada persukaten si dem, sada bagin si sampur si itungtungken ku bas tanndu asa ngasup kam ngalokenca. Sukat-sukat si ipakendu e ka nge isukatken man bandu.”

³⁹Jenari ituriken Jesus ka perumpaman enda, “Sekalak si pentang labo ngasup negu-negu kalak pentang; sabap adi bage duana me ia ndabuh ku parik. [52†]

⁴⁰Bage pe labo lit murid belinen asa guruna; tapi adi murid enggo tammat pelajarenna, bali me ia ras guruna. [53†]

⁴¹Engkai maka idahndu rintep si i bas mata seninandu, tapi beloti si i bas matandu la igejapndu?

⁴²Kuga nindu ngatakenca man seninandu, ‘O, senina, bere maka kuagui rintep si i bas matandu,’ tapi beloti si i bas matandu la iidahndu? O, kalak pekulah-kulah, agui lebe beloti si lit i bas matandu, sabap kenca bage maka banci terang pengidahndu guna ngagui rintep si lit i bas mata seninandu.”

⁴³“Labo lit batang kayu si mehuli erbuahken si la mehuli, bage pe labo lit batang kayu si la mehuli erbuahken si mehuli.

⁴⁴Kerina batang kayu itandai arah buahna; sabap labo iputikkenndu buah ara i bas dukut-dukut si erduri nari, ntah pe ipepulungndu buah anggur i bas batang bungke rimbang nari. [54†]

⁴⁵Kalak si bujur tentu ndarat i bas ia nari si mehuli, reh i bas pusuh peratenna si mehuli nari; janah kalak si jahat ndarat me kejahaten i bas pusuh peratenna si jahat nari. Sabap kai si ibelasken kalak arah babahna, e reh i bas pusuh peratenna nari.” [55†]

⁴⁶“Engkai maka kam erlebuh man bangKu, ‘O Tuhan, O Tuhan,’ adi labo ikutkenndu kai si Kukataken man bandu?

⁴⁷Ise si reh ku Aku, si megiken katangKu dingen si ngikutkenca -- bali ras ise ia banci ipeseri? -- Kukataken man bandu.

⁴⁸IA bali ras sekalak si erbahan rumah: Ikalina taneh mbages seh jumpa batu, janah i babo batu e me ipajekkenna palas rumah e. E maka adi reh banjir ras lau mbelin nderpa rumah e, la mugur pe ibahanna, sabap rumah e seh kal teguhna.

⁴⁹Janah ise si megi katangKu tapi la ikutkenna, bali ia ras sekalak si erbahan rumah si la erpalas; e maka adi reh banjir nderpa rumah e, minter runtuh mesangat pe runtuhna.”