Read Batak Karo LUKAS 7 Bible Online

LUKAS 7 - Batak Karo bible

LUKAS 7

¹Kenca dung Jesus ngajar man kalak si nterem, lawes IA ku Kapernaum.

²I je lit sekalak perwira Roma; keleng kal atena suruh-suruhenna. Suruh-suruhenna e paksana sakit dingen menam mate pe.

³Sanga ibegi perwira e kerna Jesus, isuruhna piga-piga peminpin-peminpin Jahudi ndahi Jesus guna mindo gelah ipepalemNa suruh-suruhenna e.

⁴E maka idahi peminpin-peminpin ndai me Jesus janah mindo alu meseksek nina, “O Tuhan, tuhu-tuhu patut kal perwira e isampatindu,

⁵sabap keleng kal atena bangsanta, janah ibahanna pe sada rumah pertoton man kami.”

⁶E maka berkat Jesus ras kalak ndai. Asum lanai ndauhsa Jesus i bas rumah perwira nari, isuruh perwira e teman-temanna ndahi Jesus guna ngataken, “O Tuan, olanai gia Kam latih. Kuakap labo aku metunggung ngalo-ngalo Kam i bas rumahku,

⁷bage pe la kuakap metunggung aku reh njumpai Kam. E maka katakenlah sengkebabah kal lah gia, tentu malem suruh-suruhenku e.

⁸Sabap aku pe lit nge perwira-perwira si ganjangen asangken aku, lit ka pe si teruhen asangken aku. Adi ningku man bana, ‘Lawes!’, lawes ia; adi ningku man si deban ‘Mari!’, reh ia, jadi adi man sekalak suruh-suruhen ningku, ‘Bahan bagenda!’, ibahanna pe minter.”

⁹Mamang ate Jesus asum ibegiNa kata e. JanahNa nulih kempak kalak si nterem si ngikutken IA nina, “Kukataken man bandu: Langa pernah Aku jumpa ras sekalak si bagenda kal belinna kinitekenna. I bas kalak Israel pe langa pernah Aku jumpa.”

¹⁰Kenca mulihken kerina si isuruh perwira ndai, idapetina suruh-suruhen e enggo malem.

¹¹Kenca si e, minter lawes Jesus ku sada kuta, gelarna Nain; ajar-ajarNa ras jelma si nterem ikut ras IA.

¹²Seh kenca IA i kerabangen kuta e, simbel IA ras rombongen si ngelanja kalak mate, ndarat i bas kuta e nari. Si mate e sekalak anak perana, e me anak sada diberu balu-balu. Nterem kal anak kuta ikut naruhkenca.

¹³Megogo dingen mekuah ate Tuhan Jesus ngidah nande si kepaten e, e maka nina man bana, “Ola kam tangis.”

¹⁴Ideheri dingen ijemak Jesus peti mait e, e maka ngadi si ngelanjasa. Nina Jesus, “O anak perana, Kukataken man bandu: kekeken!”

¹⁵E maka keke si mate ndai janah ngerana ia, jenari ibereken Jesus ia man nandena.

¹⁶Mbiar kalak e kerina, janah ipujina Dibata nina, “Enggo reh nabi si mbelin ku tengah-tengahta! Enggo reh Dibata mulahi bangsaNa!”

¹⁷E maka berita kerna Jesus mbar ku kerina taneh Judea ras ku daerah-daerah sekitarna.

¹⁸Kerina kejadin e seh man Johanes Peridiken perbahan ituriken ajar-ajarna. E maka idilo Johanes Peridiken dua kalak ajar-ajarna,

¹⁹jenari isuruhna duana ndahi Tuhan guna nungkun, “Kam kin si ikataken Johanes Peridiken si enggo ndeher kerehenna e, ntah itimai kami denga si deban?”

²⁰Kenca si dua kalak e jumpa ras Jesus, e maka nina, “Kami isuruh Johanes Peridiken nungkun man baNdu, ‘Kam kin si ikataken Johanes Peridiken si enggo ndeher kerehenna e, ntah itimai kami denga si deban?’ ”

²¹Paksa si e ka, ipepalem Jesus nterem kalak penakiten si erbage-bage persuina ras si setanen, janah ibahanNa jadi erpengidah kalak si pentang.

²²E maka erjabap Jesus man persuruhen Johanes Peridiken e, nina, “Mulihlah, janah turiken man Johanes Peridiken kai si enggo idah dingen ibegindu, e me: kalak pentang enggo erpengidah, si pangpangen enggo ngasup erdalan, si gadamen enggo malem, si pasek enggo erpemegi, si enggo mate nggeluh mulihi, janah Berita Si Meriah iberitaken man kalak musil. [56†]

²³Malem tuhu-tuhu ate kalak si tetap erkiniteken man bangKu.”

²⁴Kenca lawes persuruhen Johanes Peridiken ndai, ibenaken Jesus ngerana man kalak si nterem kerna Johanes Peridiken nina, “Asum idahindu mbaru enda Johanes Peridiken ku taneh si melungun, kai kin min atendu nehenenndu? Atendu kin ngenehen dukut si iole-oleken angin? Tentu lang!

²⁵Jadi, kai dage nehenenndu? Sekalak si mejile uisna? Tentu lang, sabap kalak si mejile uisna dingen nggeluh mewah inganna i bas istana raja nge.

²⁶Katakenlah, kai dage nehenenndu? Sekalak nabi? Payo, Kukataken pe man bandu maka si enggo idahndu e lebihen asa sekalak nabi.

²⁷Sabap kerna Johanes Peridiken enggo isuratken i bas Pustaka Si Badia, ‘Nina Dibata: Kusuruh persuruhenKu leben asa Kam, ia kap nikapken dalan man baNdu.’ ” [57†]

²⁸Tole nina Jesus, “Kukataken man bandu maka i doni enda la lit pernah manusia belinen sangken Johanes Peridiken. Tapi si kitikna i bas Kinirajan Dibata belinen asangken Johanes Peridiken.”

²⁹Kerina kalak si nterem: pengalo cuke, si megi pengajaren Johanes Peridiken ngakui kebenaren Dibata, dingen enggo pe ialokenna peridin arah Johanes. [58†]

³⁰Tapi kalak Parisi ras guru-guru agama nulak rencana Dibata nandangi dirina, dingen la ia nggit iperidiken Johanes Peridiken.

³¹Tole nina Jesus, “Dage alu kai nge banci Kuumpamaken manusia si genduari enda? Ras kai nge ia bali?

³²Kalak si genduari enda bali ras anak-anak si erguro-guro i tengah kesain. Nina sada terpuk man terpuk si deban, ‘Enggo ipalu kami gendang guro-guro tapi la kam landek! Enggo iendeken kami lagu tangis-tangis, tapi la kam tangis!’

³³Sabap Johanes Peridiken enggo reh, la ia ikut man-man i bas pesta dingen la inemna anggur, janah ikatakenndu, ‘Setanen ia!’

³⁴Reh ka Anak Manusia si isuruh Dibata, ikut IA man ras minem i bas pesta, janah nindu, ‘Nehenlah! IA sekalak si rangap dingen peminem-minem; meriah IA ras pengalo cuke bage pe kalak si enggo terbuang i tengah-tengah jelma si nterem nari!’

³⁵Tapi amin bage pe, kepentaren Dibata nge si payo. E lit buktina i bas kerina kalak si ngalokenca.”

³⁶Sekalak i bas kalak Parisi nari ngundang Jesus man ku rumahna. Lawes Jesus ku rumah e janah kundul IA man i je.

³⁷I bas kuta e lit sekalak diberu perdosa. Ibegina berita maka Jesus sangana man i rumah kalak Parisi e, e maka reh ia, ibabana sada botol marmar minak merim. [59†]

³⁸Tedis ia i pudi Jesus deher naheNa, tangis ia seh litap pe nahe Jesus ibahan iluhna, jenari isapuina alu bukna. Iemaina nahe Jesus dingen iminakina alu minak si merim ndai.

³⁹Ngidah si e mecekurak ukur kalak Parisi si ngundang Jesus ndai nina, “Adi tuhu-tuhu kin IA nabi, tentu ietehNa nge ise diberu si njemak IA e dingen kalak si kuga kin ia. Tentu ietehNa maka diberu enda kalak perdosa.”

⁴⁰E maka nina Jesus man bana, “O, Simon, lit ateKu Kukataken man bandu.” Ngaloi Simon, “Katakenlah Guru.”

⁴¹E maka nina Jesus, “Lit me dua kalak rutang man kalak si peraihken duit. Sekalak rutang lima ratus duit pirak sekalak nari rutang lima puluh duit pirak.

⁴²Duana kalak enda lanai ngasup nggalari utangna e, e maka isasapken perutangenna e utangna ndai. Adi bage, si apai nge i bas si dua kalak enda ndai si lebih erkeleng ate nandangi perutangenna e?”

⁴³Erjabap Simon, “Kuakap kalak si mbuena utangna isasapken.” Ngaloi ka Jesus, “Payo jabapndu e.”

⁴⁴E maka erkusur Jesus man diberu e, jenari nina man Simon, “Idahndu kin diberu enda? Reh Aku ku rumahndu, la iberendu lau man pemurihi nahengKu, tapi ia enggo iburihina nahengKu alu iluhna dingen isapuina alu bukna.

⁴⁵La iemandu Aku, tapi ia la erngadi-ngadi ngema nahengKu.

⁴⁶La iminakindu takalKu alu minak, tapi ia enggo iminakina nahengKu alu minak si merim.

⁴⁷Perbahan si e, Kukataken man bandu maka dosana si melala enggo ialemi! Sabap melala icidahkenna kekelengen. Tapi kalak si sitik ialemi tentu kekelengenna pe sitik.”

⁴⁸E maka nina Jesus man diberu e, “Dosandu enggo ialemi!”

⁴⁹Kalak si deban si ras Jesus kundul i je nungkun i bas ukurna nina, “Ise kin kalak enda maka banci ialemiNa dosa?”

⁵⁰Tole nina Jesus man diberu ndai, “Kinitekenndu erbahanca kam terkelin. Mulihlah alu mejuah-juah!”