Read Batak Karo LUKAS 8 Bible Online

LUKAS 8 - Batak Karo bible

LUKAS 8

¹La ndekahsa kenca si ndai isiari Jesus kota-kota ras kuta-kuta, iberitakenNa Berita Si Meriah kerna Kinirajan Dibata. Ajar-ajar si sepuluh dua kalak ikut ras IA,

²bage pe piga-piga diberu si enggo ipepalemNa i bas setan ras penakit-penakit nari, e me: Maria (si igelari Magdalena) si enggo ipelawes pitu setan i bas ia nari; [60†]

³Johana ndehara Kusa menteri Herodes, Susanna bage pe nterem diberu-diberu si deban. Diberu-diberu enda ndai me si nampati Jesus ras ajar-ajarNa alu erta-ertana.

⁴Nterem kalak rehen i kuta-kuta nari ndahi Jesus, e maka asum pulung ia kerina ituriken Jesus perumpaman enda nina,

⁵“Sekalak perjuma lawes ku juma ngambur benih. Asum ia ngambur benih ndai, deba ndabuh ku dalan, e maka idedehi kalak jenari reh perik-perik manganisa seh keri.

⁶Deba ka ndabuh ku taneh si erbatu-batu, kenca turah, la ndekahsa kerah ia, sabap kerah taneh e.

⁷Lit ka deba ndabuh ku tengah peren duri; turah raduken peren duri e, tapi iasak peren duri e benih ndai seh mate pe.

⁸Tapi deba ndabuh ku taneh si mehumur, mehuli perturahna, jenari erbuah seratus kali ganda.” Kenca ituriken Jesus si e, e maka nina, “Begikenlah adi lit kin cupingndu!”

⁹E maka nungkun ajar-ajar Jesus man baNa kerna maksud ras tujun perumpaman ndai.

¹⁰Erjabap Jesus nina, “Man bandu enggo ibereken pemeteh kerna rahasia Kinirajan Dibata; tapi man kalak si deban ituriken alu perumpaman, e maka aminna gia ipernehenna, tapi labo idahna, aminna gia ibegikenna tapi labo iangkana.” [61†]

¹¹“Bagenda me antusenna perumpaman ndai. Benih ndai e me kata Dibata.

¹²Benih si ndabuh ku dalan iandingken man kalak si megiken berita e, ibegikenna, tapi reh Iblis muat kata e i bas ukurna nari gelah ola ia tek dingen terkelin.

¹³Benih si ndabuh ku taneh si erbatu-batu iandingken man kalak si megiken berita e, ibegikenna dingen ialokenna alu meriah ukur. Tapi la mbages uratna, kentisik ngenca ia tek. Reh kenca percuban minter ia murtad.

¹⁴Benih si ndabuh ku peren duri, iandingken man kalak si megiken berita e, tapi aru atena janah jadi kalak bayak atena. Ersenang-senang atena i bas doni enda. Kerina si e nindih ia seh maka buahna la sempat metua.

¹⁵Benih si ndabuh ku taneh si mehumur iandingken man kalak si megiken berita e, ibegikenna, ibunikenna i bas ukurna si mehuli dingen tetap, janah megenggeng ia seh erbuah.”

¹⁶“Labo lit kalak nagani lampu jenari itutupina alu tumba ntah pe itamakenna ku teruh ingan medem. Tentu itamakenna ku ingan sangket gelah terang iakap kalak si bengket ku bas. [62†]

¹⁷Sabap kerina si terbuni teridah nge pagi janah kerina rahasia terbongkar dingen tangkas nge pagi. [63†]

¹⁸Megermetlah kam kerna kai si ibegindu; sabap kalak si enggo lit i bas ia man bana itambahi tole. Tapi kalak si la lit kai pe i bas ia si iakapna lit i bas ia pe ibuat i bas ia nari.” [64†]

¹⁹Nande Jesus ras senina-seninaNa reh ndahi IA, tapi perbahan teremna jelma i je, e maka la terbahanca jumpa.

²⁰Tapi lit sekalak si ngatakenca man Jesus nina, “NandeNdu ras senina-seninaNdu tedis i darat, atena njumpai Kam.”

²¹E maka nina Jesus man kalak si nterem, “NandengKu ras senina-seninangKu, e me kalak si megiken dingen si ngikutken Kata Dibata.”

²²I bas sada wari idatasi Jesus ras ajar-ajarNa sada perahu, janah nina Jesus man ajar-ajarNa, “Ota ku lepar ah.” E maka berkat ia.

²³Asum kalak e erlayar, tunduh Jesus. Rempet rembus angin meter ku dano e, janah mulai bengket lau ku bas perahu si erbahanca kalak e i bas bahaya tuhu-tuhu.

²⁴E maka iingeti ajar-ajar me Jesus nina, “O Guru, Guru! Cilaka kita!” Keke Jesus, isergangiNa angin ras galumbang si merawa ndai. Angin ras galumbang e minter jeneng kal.

²⁵Kenca bage nina Jesus man kalak ndai, “Engkai maka kam mbiar? I ja kinitekenndu?” Tapi mamang ate ajar-ajar dingen mbiar pe ia, janah nina sapih-sapih ia, “Ise kin ndia IA? IperentahkenNa angin ras galumbang, janah angin ras galumbang e pe patuh nandangi perentahNa.”

²⁶Terus Jesus ras ajar-ajarNa erlayar ku Gerasa pekepar-kepar ras daerah Galilea.

²⁷Seh kenca Jesus idaraten, reh me sekalak dilaki i kuta nari njumpai IA. Dilaki enda ndai setanen. Enggo ndekah ia la ruis dingen lanai ia i rumah, tapi ringan ia i tengah-tengah kuburen.

²⁸Asum idahna Jesus serko ia, nembah-erjimpuh i lebe-lebe Jesus janah alu sora megang nina, “O Jesus, Anak Dibata si Meganjangna, kuga ateNdu aku ibahanNdu? Kupindo maka Ola aku iukumNdu!”

²⁹Enda ikatakenna perbahan isuruh Jesus setan e ndarat i bas ia nari. Enggo megati ia ikuasai setan e, seh maka aminna gia ia enggo ipenjaraken janah tanna ras nahena iiket alu rante, banci denga ka nge iretapkenna rante e, jenari ibaba setan ia ku ingan si mesawang.

³⁰E maka isungkun Jesus ia nina, “Ise gelarndu?” Erjabap ia, “Gelarku Meribu-ribu,” sabap melala setan si neluki ia.

³¹Ipindoken setan-setan e man Jesus gelah ola ia ipelawesNa ku bas kelbung si mbages.

³²I bas mbalmbal i ture-ture uruk e, lit me sada rarasen babi sangana nungke-nungke. E maka ipindoken setan-setan e man Jesus gelah ibere Jesus min ia kerina lawes neluki babi-babi e. Pemindonna enda ibere Jesus.

³³Kenca bage, ndarat me setan-setan ndai bas dilaki e nari, jenari iselukina babi-babi e. Kerina babi si sada rarasen ndai minter kiamen janah megulang, ndabuhen ku dano mate gedap kerina i je.

³⁴Kenca idah permakan babi ndai kai si enggo jadi e, kiam ia jenari iturikenna kejadin e ku kuta-kuta sekelewetna.

³⁵E maka rehen kalak ngenehen kai si enggo jadi. Idahina Jesus janah idapetina kalak si enggo itadingken setan ndai kundul i deher Jesus; enggo ruis ia dingen enggo jore ukurna. E maka mbiar kalak enda ndai kerina.

³⁶Kalak si enggo ngidah kejadin e, nuri-nuri man kalak si reh ndai kuga dalanna maka kalak si setanen ndai enggo malem.

³⁷E maka kerina kalak si i bas daerah Gerasa e mindo man Jesus gelah itadingkenNa min daerah e, sabap tuhu-tuhu mbiar ia kerina. Perbahan si e, idatasi Jesus perahu jenari lawes IA.

³⁸Kalak si enggo itadingken setan ndai mindo man Jesus gelah ia ikut. Tapi isuruh Jesus ia lawes nina,

³⁹“Mulihlah kam ku rumahndu janah beritakenlah kai si enggo ibahan Dibata man bandu.” E maka lawes ia isiarina kuta e janah iberitakenna kai si enggo ibahan Jesus man bana.

⁴⁰Kenca seh ka Jesus i lepar, ialo-alo jelma si nterem IA, sabap kerina enggo tertima-tima.

⁴¹E maka reh me sekalak pengulu rumah pertoton gelarna Jairus. Isembahna nahe Jesus janah ipindokenna gelah Jesus reh ku rumahna,

⁴²sabap anakna narus mate. Anakna e diberu, umurna kira-kira sepuluh dua tahun janah ia anak sada-sada. Asum erdalan Jesus ku rumah Jairus, siasak-asaken jelma si nterem ndeheri IA.

⁴³Lit i je sekalak diberu enggo sepuluh dua tahun dekahna bluding rusur. Enggo keri erta-ertana guna pertambarna man dokter-dokter, tapi la lit sekalak pe si ngasup pepalem ia.

⁴⁴Ideherina Jesus i pudi nari dingen idadapna rambu-rambu uis Jesus, janah paksa e pe minter ngadi dareh e.

⁴⁵E maka nungkun Jesus nina, “Ise si ndadap Aku?” Perbahan la lit kalak si ngaku, e maka nina Petrus, “O Guru, nterem kap jelma i kelewetNdu janah siasak-asaken ndeheri Kam.”

⁴⁶Tapi nina Jesus, “Lit kap sekalak si ndadap Aku, sabap Kugejap lit kuasa ndarat i bas Aku nari.”

⁴⁷Asum ieteh diberu ndai maka kai si enggo ibahanna e la terbuniken, e maka reh ia ku lebe, nggirgir ia, janah erjimpuh nembah man Jesus. I lebe-lebe jelma si nterem iturikenna kai sabapna maka idadapna Jesus ras kerna penakitna si minter malem e.

⁴⁸E maka nina Jesus man diberu e, “O anakKu, kinitekenndu enggo nampati kam, mulihlah alu ermeriah ukur.”

⁴⁹Sanga Jesus ngerana denga, reh me sekalak si maba berita i rumah pengulu e nari. Nina man Jairus, “Anakndu ndai enggo mate, man kai nari ngelatihi Guru enda?”

⁵⁰Tapi kata e ibegi Jesus, e maka nina man Jairus, “Ola kam mbiar, tek sajalah, malem nge kari anakndu e.”

⁵¹Kenca seh Jesus i rumah, ise pe la ibereNa ikut ras IA ku bas selain Petrus, Johanes, Jakup ras bapa dingen nande anak e.

⁵²Kerina kalak si i je erceda ate dingen nangisi anak e. Tapi nina Jesus, “Ola kam tangis; anak enda labo mate, tunduh saja nge ia!”

⁵³Itawai kalak ndai Jesus, sabap ietehna nge maka anak e enggo mate.

⁵⁴Tapi ijemak Jesus tan anak ndai, janah nina alu sora megang, “O beru, kekeken!”

⁵⁵E maka erkesah anak ndai mulihken janah minter ia keke. Jenari isuruh Jesus gelah ibere man anak e.

⁵⁶Jengang orang tuana, tapi ipedahi Jesus gelah ola iturikenna man ise pe kai si enggo jadi e.