Read Batak Karo LUKAS 9 Bible Online

LUKAS 9 - Batak Karo bible

LUKAS 9

¹Idilo Jesus ajar-ajarNa si sepuluh dua kalak jenari iberekenNa kuasa man bana guna mpelawes setan-setan dingen pepalem penakit.

²Kenca bage isuruhNa ajar-ajar lawes meritaken kerna Kinirajan Dibata, janah pepalem kalak si penakiten.

³Nina Jesus man ajar-ajar e, “Ola kai pe baba i bas perdalanenndu, ola baba ciken, gajut-gajut, roti, duit, bage pe ola baba baju man osendu. [65†]

⁴Adi i bas sada kuta ialo-alo kalak kam kesilang i bas rumahna, i je saja kam ngayak kam berkat ku kuta si deban.

⁵Adi i bas sada kuta labo lit kalak ngalo-ngalo kam, tadingken kuta e, apusi abu si leket i bas nahendu. Enda pagi tanda bukti si jadi saksi man bana.” [66†]

⁶E maka lawes me ajar-ajar ndai, isiarina kuta-kuta janah iberitakenna Berita Si Meriah dingen ipepalemna kalak si penakiten.

⁷Herodes raja wilayah Galilea pe megi kerna kejadin e. Lanai ia tenang sabap lit piga-piga kalak ngatakenca, “Johanes Peridiken enggo nggeluh mulihi!” [67†]

⁸Deba ngatakenca maka Elia enggo reh, janah lit ka pe si ngatakenca maka sekalak i bas nabi-nabi si nai enggo nggeluh mulihi.

⁹Nina Herodes, “Enggo kusuruh itampul kalak takal Johanes, tapi ise dage ia, si rikutken beritana ngasup ngelakoken perbahanen-perbahanen si mbelin?” E maka idarami Herodes dalan gelah jumpa ras Jesus.

¹⁰Kenca mulih rasul-rasul ndai, iturikenna man Jesus kai si enggo ibahanna. Jenari ibabai Jesus rasul-rasul e lawes ku sada kuta gelarna Betsaida, ateNa gelah ia saja ngenca i je.

¹¹Tapi tereteh man jelma si nterem, e maka berkat ia ndapeti Jesus. Ialo-alo Jesus jenari iturikenNa kerna Kinirajan Dibata janah ipepalemNa kalak si penakiten.

¹²Asum wari nandangi gelap, reh ajar-ajar si sepuluh dua kalak ndahi Jesus, janah nina, “Suruhlah kalak enda lawes ku kuta-kuta i sekelewet enda gelah banci idaramina nakanna ras inganna medem, sabap ingan enda ingan si melungen.”

¹³Tapi ngaloi Jesus man ajar-ajar nina, “Kam lah mereken nakanna.” Nina ka ajar-ajar, “Si lit i bas kami lima ngkibul roti ras dua ikan ngenca. Pala lawes kami nukur nakan guna kalak si nterem enda?”

¹⁴Teremna jelma si i je dilaki lit kira-kira lima ribu kalak. Nina Jesus man ajar-ajarNa, “Suruhlah kalak si nterem e kundul, tep-tep terpuk teremna kira-kira lima puluh kalak.”

¹⁵Kerina si ikataken Jesus ilakoken ajar-ajar, isuruhna kalak si nterem kundul.

¹⁶Jenari ibuat Jesus roti si lima ngkibul ras ikan si dua ndai, janah ertoto IA ngataken bujur man Dibata. E maka icepik-cepikNa roti e jenari iberekenNa man ajar-ajar gelah ielakenna man kalak si nterem.

¹⁷Kerina ia man seh besur. Kenca elah, ipepulung ajar-ajar kerina si iba, buena lit sepuluh dua sumpit.

¹⁸Sekali jadi asum Jesus ertoto sisada-sisada, reh ajar-ajarNa ndahi IA. E maka isungkun Jesus ajar-ajar e nina, “Ise kin Aku nina kalak?”

¹⁹Erjabap ajar-ajar nina, “Lit si ngatakenca Kam kap Johanes Peridiken. Deba ngatakenca maka Kam kap Elia. Janah lit ka pe si ngatakenca maka Kam kap sekalak i bas nabi-nabi si nai si enggo nggeluh mulihi.” [68†]

²⁰Nungkun ka Jesus nina, “Kam kuga nindu? Ise kin akapndu Aku?” Erjabap Petrus nina, “Kam kap Mesias si ipadanken Dibata.” [69†]

²¹Jenari ilarang Jesus ajar-ajarNa ngataken si e man ise pe.

²²Tole nina Jesus, “Anak Manusia si isuruh Dibata la banci la ngenanami mbue kiniseran, janah itulak peminpin-peminpin, imam-imam si mbelin, bage pe guru-guru Undang-undang. IA ibunuh jenari keke i bas wari si peteluken.”

²³Janah nina Jesus man bana kerina, “Ise atena ikut ras Aku arus maka ipersilahangna dirina, ipersanna kayu persilangna tep-tep wari janah ikutkenna Aku. [70†]

²⁴Sabap ise si mpertahanken kegeluhenna, bene kap kegeluhenna, tapi ise si bene kegeluhenna erkiteken Aku terkelin me. [71†]

²⁵Kai kin gunana man sekalak jelma aminna gia bana kerina doni enda tapi bene ia ntah pe iukum? Tentu la lit!

²⁶Adi sekalak jelma mela ia ngakuken Aku ras pengajarenKu, Anak Manusia si isuruh Dibata pe pagi mela ngakuken kalak si bage sanga Anak Manusia e reh alu kemulian si mbelin bage pe alu kemulian Bapa ras kemulian malekat-malekat si badia.

²⁷Inget katangKu enda! I bas si pulung enda lit piga-piga kalak si la ia mate adi langa kin idahna Kinirajan Dibata.”

²⁸Kira-kira seminggu kenca ituriken Jesus kerna kiniseran ras kematenNa, ibabaNa Petrus, Jakup ras Johanes berkat ku das sada uruk guna ertoto. [72†]

²⁹Asum Jesus ertoto, salih ayoNa dingen uisNa jadi mbentar ersinalsal.

³⁰Rempet lit i je dua kalak dilaki, e me Musa ras Elia ercakap-cakap ras Jesus.

³¹Duana ikeleweti sinalsal kemulian Surga. Ercakap-cakap ia duana ras Jesus kerna kematen Jesus si lanai ndekah jadi i Jerusalem sue ras si enggo iaturken Dibata.

³²Paksa e Petrus ras temanna si dua kalak munduk-unduk seh tunduh pe. Janah asum ia keke idahna ersinalsal kemulian Jesus, ras si dua kalak ndai tedis ras IA.

³³Asum berkat ate si dua kalak ndai nadingken Jesus nina Petrus man Jesus, “O Guru! Malem kal ate kami i jenda. Ibahan kami saja telu sapo-sapo, sada man baNdu, sada man Musa, janah sada nari man Elia.” (Tapi si tuhuna la ierti Petrus kai si ibelaskenna e.)

³⁴Sanga Petrus ngerana denga, reh embun ngelinggemi ia kerina. Perbahan e mbiar ajar-ajar.

³⁵Terbegi pe sora i bas embun e nari nina, “Enda me AnakKu si enggo Kupilih. Begikenlah IA.” [73†]

³⁶Asum terbegi sora e, Jesus nari ngenca i je idah ajar-ajar. Kerina kejadin si enggo idahna e irahasiakenna janah la iturikenna man ise pe.

³⁷Pepagina asum Jesus ras ajar-ajarNa si telu kalak ndai nusur i das uruk nari, nterem kal kalak reh njumpai IA.

³⁸Sekalak i bas jelma si nterem e erlebuh man Jesus nina, “O, Guru! Ngarap aku maka iperdiatekenNdu min anakku enda, sabap e ngenca anakku.

³⁹Adi iseluki setan e ia, rempet ia nderkuh, idampes-dampeskenna bana dingen rugup-ugup babahna. Mesui kal atena ibahan setan e janah menam-menam lanai erleka setan e ras ia.

⁴⁰Enggo kupindoken man ajar-ajarNdu gelah ipelawesna min setan e, tapi la ia ngasup.”

⁴¹Nina Jesus man kerina kalak si i je, “O, kam kalak si la erkiniteken dingen si enggo papak, asa kai nari dekahna Aku ras kam? Asa kai nari dekahna Aku tahan ras kam?” Jenari nina man bapa anak e, “Baba kujenda anakndu e.”

⁴²Sanga anak e ibaba ndahi Jesus, nggirgir ia dingen idampes-dampeskenna bana. Tapi isergangi Jesus setan e dingen ipepalemNa anak ndai. Kenca malem iberekenNa mulihi man bapana.

⁴³Mamang ate jelma si nterem erkiteken Kuasa Dibata si mbelin e. Asum kemamangen denga jelma si nterem kerna kerina perbahanen Jesus nina Jesus man ajar-ajarNa,

⁴⁴“Begikenlah dingen pegermetkenlah kai si Kukataken man bandu. Anak Manusia si isuruh Dibata iendesken pagi ku bas kuasa manusia.”

⁴⁵Tapi la ieteh ajar-ajar kai ertina si ibelasken Jesus e. La tangkas man bana ertina, e maka la iangkana. Janah nungkunsa man Jesus pe la ia pang.

⁴⁶Turah me persoalen i bas perukuren ajar-ajar, e me kerna ise kin si mbelinna i bas ajar-ajar e. [74†]

⁴⁷Tapi ieteh Jesus kai si iukurken ajar-ajar e, e maka idiloNa sekalak danak-danak, ipetedisNa deherken IA,

⁴⁸jenari nina man ajar-ajarNa, “Ise si ngaloken danak-danak enda i bas gelarKu ia me kap si ngaloken Aku; bage pe ise si ngaloken Aku, labo Aku saja ialokenna, tapi ialokenna pe IA si nuruh Aku. Sabap ise si kitikna kal i bas kam kerina, ia me si mbelinna.” [75†]

⁴⁹E maka ngaloi Johanes man Jesus nina, “O, Guru, lit idah kami sekalak si mpelawes setan i bas gelarNdu. Perbahan labo ia bengket i bas terpukta enda, e maka ilarang kami ia.”

⁵⁰Ngaloi Jesus man Johanes ras ajar-ajar si deban nina, “Ola ambati ia, sabap ise si la ngelawan kam, temanndu kap.”

⁵¹Asum enggo ndeher paksana Jesus iangkat Dibata ku Surga, e maka itetapkenNa ukurNa guna lawes ku Jerusalem.

⁵²Isuruhna piga-piga kalak persuruhenNa ngelebei IA. Lawes persuruhen ndai, bengket ia ku sada kuta kalak Samaria guna nikapken ingan kesilang man Jesus.

⁵³Tapi kalak Samaria e la nggit ngalo-ngalo Jesus, sabap tujun perdalanen Jesus e me kap ku Jerusalem.

⁵⁴Asum ibegi Jakup ras Johanes berita e, e maka nina man Jesus, “O Guru, setuju Kam adi isuruh kami api nusur i langit nari ngkernepken kalak Samaria e?” [76†]

⁵⁵Erkusur Jesus janah ipandangNa Jakup ras Johanes.

⁵⁶Jenari lawes ia kerina ku kuta si deban.

⁵⁷Sanga Jesus ras ajar-ajarNa nerusken perdalanenNa, lit sekalak dilaki ngerana man Jesus nina, “Kuikutken nge Kam aminna ku ja gia Kam lawes.”

⁵⁸Ngaloi Jesus man bana, “Serigala lit liang inganna, perik-perik pe lit asarna, tapi Anak Manusia si isuruh Dibata la lit inganNa pekesahken pe.”

⁵⁹Man sekalak si deban nina Jesus, “Ikutken Aku.” Tapi ngaloi ia man Jesus nina, “O Bapa, mulih aku lebe ngkuburken bapangku.”

⁶⁰Ngaloi Jesus, “Pelepaslah kalak mate ngkuburken si matena; tapi kam, to lawes beritakenlah kerna Kinirajan Dibata.”

⁶¹Nina ka sekalak si deban man Jesus, “O Tuan, ateku maka ikut ras Kam, tapi mulih aku lebe erkata man keluargangku.” [77†]

⁶²Ngaloi Jesus man bana, “Kalak si enggo njemak tenggala, jenari ngenen ia ku pudi, kalak si bage la erguna i bas Kinirajan Dibata.”