Read Batak Karo ULANGEN 1 Bible Online

ULANGEN 1 - Batak Karo bible

ULANGEN 1

¹Isi kitap enda e me kata-kata Musa man bangsa Israel sanga kalak enda i taneh si mesawang arah Timur Lau Jordan. I bas paksa si e bangsa Israel sangana i Baluren Lau Jordan deher Sup, kelang-kelang kuta Paran ras kuta Topel, Laban, Haserot ras Disahab. (

²Sepuluh sada wari dekahna erdalan i Deleng Sinai nari ku Kades-Barnea mentasi deleng-deleng negeri Edom.)

³I bas wari pemena bulan sepuluh sada, tahun peempat puluhken kenca bangsa Israel nadingken Mesir, ituriken Musa me kerina kai si man turinken man bangsa Israel, bagi si iperentahken TUHAN man bana.

⁴Si enda jadi kenca italuken TUHAN si Sihon e me raja bangsa Amori si erkuasa i kuta Hesbon bage pe Raja Og i Basan nari si erkuasa i kuta-kuta Astarot ras Edrei. [1†]

⁵Sanga bangsa Israel i Timur Lau Jordan, i bas daerah Moap, ibenaken Musa me nerangken undang-undang Dibata ras ajaren-ajarenNa. Nina Musa,

⁶“Sanga kita i Deleng Sinai nina TUHAN Dibatanta man banta, ‘Enggo ndekah kam tading i Deleng Sinai enda.

⁷Tangtangi kemahndu, teruskenlah perdalanenndu. Laweslah ku deleng-deleng bangsa Amori ras ku kerina daerah-daerah sekelewetna, e me Baluren Lau Jordan, ku uruk-uruk ras berneh-berneh kempak daerah Selatan ras ku tepi Lawit Tengah. Laweslah ku negeri Kanaan, terus ku lepar deleng-deleng Libanon seh ku Lau Eprat si mbelin e.

⁸Aku, TUHAN enggo erpadan mereken kerina taneh e man nini-ninindu Abraham, Isak, Jakup, ras man sinursurna. To ingani taneh e.’ ”

⁹Nina Musa man bangsa Israel, “Sanga kita i Deleng Sinai denga kukataken man bandu, ‘Mberatca tanggung jawabku adi aku saja ngenca minpin kam. La terdalanken aku sisada.

¹⁰Enggo ijadiken TUHAN Dibatandu kam bali ras bintang-bintang i langit teremna.

¹¹Mbera-mbera TUHAN, Dibata nini-ninindu nambahi kam seribu kali lipat nari, janah malem atendu ibahanNa bagi ipadankenNa.

¹²Tapi kuga ningku sisada mersansa tanggung jawab si mberat guna ndameken pekarandu.

¹³E maka pilihilah piga-piga kalak i bas tep-tep sukundu nari si bujur, beluh, erpengalamen gelah kuangkat ia jadi pengulundu.’

¹⁴Payo akapndu maka e me cara si mejilena.

¹⁵E maka kuangkat kalak si bujur ras erpengalamen si ipilihndu i bas tep-tep suku nari jadi pengulu-pengulundu. Lit si ertanggung jawab guna seribu kalak, guna seratus kalak, guna lima puluh kalak, guna sepuluh kalak. Pegawai man suku-suku pe kuangkat.

¹⁶I bas paksa si e kuperentahken man pengulu-pengulu e, ‘Perdiateken lah pekara si turah i tengah-tengah bangsandu. Timbanglah tep-tep pekara alu bujur, subuk kerna sukundu jine ntah pe kerna bangsa si deban si tading ras kam.

¹⁷Ola kam rayo-ayo i bas keputusenndu; seri lah pengidahndu i bas ngadili tep-tep kalak, subuk ise pe kalakna. Ola kam mbiar man ise pe, sabap keputusen si ibahanndu i bas Dibata nari kap rehna. Pekara si la terputuskenndu endesken lah man bangku maka kuputusken.’

¹⁸I bas paksa e ka pe kuperentahken ka nge kai si patut ibahanndu.”

¹⁹“Enggo silakoken perentah TUHAN Dibatanta. Sitadingken Deleng Sinai, sidalani gurun pasir si mbelang. Melala kebiaren i tengah dalan sanga kita ku deleng-deleng negeri bangsa Amori. Kenca kita seh i Kades-Barnea,

²⁰[20-21] ningku man bandu: Enggo kap kam seh ku deleng-deleng negeri Amori, si ibereken TUHAN Dibatanta man banta. Nehenlah, negeri e enggo iendesken TUHAN Dibatandu man bandu. To ingani lah negeri e, sue ras si iperentahken TUHAN Dibata nini-ninindu man bandu. Ola mbiar ras ola aru atendu.

²²Tapi reh kam ndahi aku nindu, ‘Madin sisuruh lebe piga-piga kalak ngenensa maka banci ikatakenna man banta dalan si mejilena, ntah kuta si kuga kin lit i je.’

²³Teridah maka mehuli perukuren e. E maka kupilih sepuluh dua kalak, sekalak i bas tep-tep suku nari.

²⁴Lawes kalak enda ku deleng-deleng e, seh pe ku berneh-berneh Eskol, e maka iselidikina.

²⁵Ibuatna piga-piga buah man pangan, ibabana e mulih man banta, janah ilaporkenna, maka tuhu mehumur taneh si ibereken TUHAN Dibatanta e.

²⁶Tapi mberontak kam man perentah TUHAN Dibata, la kam nggit ku je. [2†]

²⁷Jungut-jungut kam sapih-sapih kam i bas kemah-kemahndu nindu, ‘Segat ate TUHAN ngenen kita; e maka ibabana kita ndarat i Mesir nari, guna ngendesken kita man bangsa Amori maka ibunuhna kita.

²⁸Kai gunana kita ku jah? Mbiar kita. Nina kalak si isuruh kita e, maka gegehen kalak ah ndai asang kita, gedangen ia asang kita. Ia pe ringan i bas kuta-kuta si bentengna seh ku langit. Raksasa kap si idahna i jah!’

²⁹Tapi ningku man bandu, ‘Ola mbiar man bangsa e.

³⁰TUHAN Dibatandu si mabai kam. Ia pagi erperang guna kam, bali ras si enggo idahndu ilakokenNa i Mesir

³¹ras i gurun pasir mbarenda. Enggo idahndu kuga ia maba kam gedang-gedang dalan seh ku ingan enda alu selamat bali ras sekalak bapa maba anakna.’ [3†]

³²Tapi kai pe ningku, lalap kam la tek man TUHAN Dibatandu, [4†]

³³aminna gia lalap Ia erdalan arah lebendu tupung kam ndarami inganndu erkemah. Adi berngi, Ia erdalan arah lebendu i bas binangun api, janah suari i bas binangun embun guna nuduhken dalan man bandu.”

³⁴“Ibegi TUHAN kam jungut-jungut e maka merawa ia. Ersumpah Ia nina, [5†]

³⁵‘Kam angkaten si jahat enda la lit sekalak pe banci bengket ku negeri si mehumur si enggo Kupadanken man nini-ninindu.

³⁶Kalep anak Jepune ngenca bengket. Ia tetap erkemalangen man bangKu, e maka Kubereken man bana ras man sinursurna taneh si enggo isiarina e.’

³⁷Erkiteken kam, aku pe itembehi TUHAN nina, ‘Kam pe la banci bengket ku negeri e, Musa.

³⁸Tapi pegegehilah ukur juak-juakndu si Josua anak Nun. Ia si naruhken bangsa Israel bengket ngiani taneh e.’

³⁹Kenca bage nina TUHAN man banta kerina, ‘Anak-anakndu si kitik denga, si langa meteh bujur ras salah, si nindu jadi tabanen musuh-musuhndu pagi, ia nge pagi mengketi negeri e. Kubereken negeri e man bana, gelah inganina.

⁴⁰Adi kam, erkusurlah, mulihkenlah erdalan ku gurun pasir ngikuti dalan kempak Teluk Akaba.’ ”

⁴¹“Nindu njabapsa i bas paksa si e, ‘Enggo kami erdosa man TUHAN o Musa. Bage gia iperang kami ate kami negeri e genduari bagi si iperentahken TUHAN Dibatanta.’ Erkiteken si e ersikap kam kerina erperang, sabap iakapndu mesunah naluken negeri si erdeleng-deleng e.

⁴²Tapi nina TUHAN man bangku, ‘Persingeti lah kalak enda maka ola iperangna, sabap Aku labo ras ia, ola kari ia italuken musuh-musuhna.’

⁴³Kukataken man bandu kai si ikataken TUHAN, tapi la diatendu. Ilawanndu TUHAN, janah alu ukur meganjang erbaris kam lawes ku negeri si erdeleng-deleng e.

⁴⁴E maka luar bangsa Amori si ngiani uruk-uruk e, iserangna kam. Nterem kal ia, bali ras wani. Iayak-ayakna kam seh ku Horma, janah italukenna i deleng-deleng negeri Edom.

⁴⁵Nderkuh kam mindo penampat man TUHAN, tapi la kam ibegiken TUHAN ras la diateNa pe.

⁴⁶E me sabapna maka bage dekahna kam tading i Kades.”