Read Batak Karo ULANGEN 10 Bible Online

ULANGEN 10 - Batak Karo bible

ULANGEN 10

¹“Nina TUHAN man bangku, ‘Pahati dua lambar batu bagi si mbarenda, janah bahan sada peti kayu ingan munikenca. Kenca bage reh lah kam ngadap Aku ku das deleng enda,

²gelah Kusuratken i babo batu si dua lambar e, kai si enggo Kusuratken i babo batu si iperperkenndu mbarenda, kenca bage tamakenndu lah e ku peti ndai.’

³E maka kubahan sada peti i bas kayu si mejile nari, ras kupahat ka dua lambar batu bagi si tangtangna mbarenda, jenari kubaba ku das deleng e.

⁴Kenca bage isurati TUHAN batu si dua lambar ndai; kata-katana bali ras si enggo isuratkenNa i bas papan batu si pemena mbarenda, e me Sepuluh Perentah si enggo i iberekenNa man bandu, sanga Ia ngerana i bas api nari paksa kam pulung i deleng e. Ibereken TUHAN man bangku papan batu si dua e,

⁵e maka nusur aku i das deleng e nari. Kenca bage, sue ras perentah TUHAN, kutamaken batu si dua lambar ndai ku bas peti si enggo kusikapken e, janah mulai i bas paksa e nari i je me batu e. (

⁶Bangsa Israel nadingken sumur-sumur bangsa Jaakan e, e maka lawes ia ku Mosera. I Mosera me Harun mate ras ikuburken. Anakna Eleasar nggantiken ia jadi imam. [56†]

⁷I jenari lawes bangsa Israel ku Gudgot e maka ku Jotbata, ingan si melala i je lau.

⁸I bas paksa e, itangkuhken TUHAN suku Lewi njagai Peti Perpadanen e, ndahiken dahin TUHAN selaku imam dingen masu-masu bangsa Israel i bas gelar TUHAN. E me tugas kalak e seh ngayak genduari. [57†]

⁹E me sabapna maka suku Lewi la dat taneh bagi suku-suku si deban; si ialokenna e me kehamaten jadi imam-imam TUHAN, bagi si enggo ipadanken TUHAN Dibatandu.)

¹⁰Empat puluh wari empat puluh berngi dekahna aku tading i das deleng e, bali ras perbahanenku si tang-tangna mbarenda. Ibegiken TUHAN aku sekali nari, janah setuju Ia maka la kam ikernepkenNa. [58†]

¹¹Kenca bage isuruhNa aku lawes mabai kam, gelah banci man bandu taneh si enggo ipadankenNa man nini-ninindu.”

¹²“Genduari o, bangsa Israel, begikenlah kai si ituntut TUHAN Dibatandu man bandu: Sembah lah TUHAN; dahiken kerina si iperentahkenNa. Kelengi lah Ia; dahi lah dahinNa alu bulat ukurndu,

¹³dingen ikutken kerina undang-undangNa. Kubereken undang-undangNa man bandu sendah tama kesangapen man bandu.

¹⁴Langit si meganjangna kal pe TUHAN empuna. Doni ras kerina isina pe TUHAN kap empuna.

¹⁵Tapi mbelin kal kekelengen TUHAN man nini-ninindu, e maka ipilihNa kam i bas kerina bangsa-bangsa nari; janah seh asa genduari pe kam tetap denga bangsa pilihenNa.

¹⁶E maka mulai genduari nari, erkemalangenlah man TUHAN olanai mekeng.

¹⁷TUHAN Dibatandu, ganjangen kap asa kerina dibata-dibata ras gegehen asa kerina kuasa-kuasa si deban. Ia kap Dibata si mbelin dingen mbisa, janah si nasa lit mbiar man baNa. La Ia rayo-ayo ras la Ia nggit ngalo sogok. [59†]

¹⁸IjagaNa tuhu-tuhu maka kebujuren idalanken nandangi anak-anak melumang ras man diberu balu-balu. Ia erkeleng ate man kalak pertandang si ringan i tengah-tengah bangsanta, janah iberekenNa pangan ras uis.

¹⁹E maka cidahkenlah kekelengen man kerina pertandang, erkiteken kam pe mbarenda kalak pertandang nge i Mesir.

²⁰Erkemalangenlah kam man TUHAN Dibatandu janah Ia saja lah sembah. Setialah man baNa, janah adi kam erpadan, erpadanlah i bas gelarNa saja.

²¹Puji lah Ia, sabap Ia kap Dibatandu; enggo iidahndu alu matandu jine, perkara-perkara si mbelin ras mejin si ibahanNa man gunandu.

²²Sanga nini-ninindu lawes ku Mesir, pitu puluh kalak ngenca ia. Tapi genduari enggo bali ras bintang-bintang i langit bilangenndu ibahan TUHAN Dibatandu.” [60†]