Read Batak Karo ULANGEN 11 Bible Online

ULANGEN 11 - Batak Karo bible

ULANGEN 11

¹“Kelengilah TUHAN Dibatandu. Ikutkenlah gelgel undang-undangNa.

²Ingetlah genduari kai si enggo ipelajarindu kerna TUHAN arah pengalamenndu ras Ia. Kam nge, labo anak-anakndu, si ngalamisa. Enggo iidahndu kuga belinna kemulian TUHAN, kuga gegehNa, ras mbisaNa,

³bage pe tanda-tanda kuasa si ibahanNa. Enggo iidahndu kai si ibahanNa man raja Mesir ras negerina. [61†]

⁴Enggo iidahndu kuga pengkernepken TUHAN tentera Mesir ras kerina kuda bage pe geretana alu nggedapken kalak e i Lawit Merah, sanga ia ngayaki kam. [62†]

⁵Enggo idahndu kai si ibahan TUHAN man bandu i gurun pasir ope denga kam seh i jenda.

⁶Ingetndu kai si ibahanNa man Datan ras man Abiram anak Eliap suku Ruben. I lebe-lebe mata kerina kalak nganga taneh jenari itelenna ia, radu ras keluargana, kemahna, bage pe kerina suruh-suruhen ras asuh-asuhenna. [63†]

⁷Tuhu, kam me si enggo ngidah kerina perkara-perkara si mbelin si enggo ibahan TUHAN.”

⁸“Ikutkenlah kerina undang-undang si enggo kubereken man bandu wari enda, gelah ngasup kam ngepari lau e, ngiani taneh si nandangi ibengketindu.

⁹Janah cawir metua kam i bas negeri si mehumur ras melala asilna e, si ipadanken TUHAN maka iberekenNa man nini-ninindu ras man sinursurna.

¹⁰Taneh si nandangi iinganindu e, la seri ras taneh Mesir inganndu nggeluh mbarenda. I Mesir adi atendu merdang, terpaksa kam latih erdahin pepaler lau ku juma e.

¹¹Tapi adi taneh si nandangi iinganindu e, e me taneh deleng-deleng ras berneh-berneh, taneh si usur kena udan.

¹²TUHAN Dibatandu si pekena-kena taneh e ras njagaisa gedang-gedang tahun.

¹³Dage ikutkenlah perentah si enggo kubereken man bandu wari enda; kelengi lah TUHAN Dibatandu janah dahiken lah dahinNa alu bulat ukurndu. [64†]

¹⁴Adi ilakokenndu e, ipesusurNa udan ku tanehndu e rikutken perluna i bas paksa musim erbunga ras erbuah, gelah lit gandum, anggur ras minak saitun man gunandu,

¹⁵bage pe dukut man gagaten asuh-asuhenndu. Datndu kerina pangan si apai pe atendu.

¹⁶Jaga maka ola kam papak ibabai kalak i bas TUHAN nari lako nembah ras erdahin man dibata-dibata si deban.

¹⁷Adi ilakokenndu e, nembeh TUHAN man bandu. IbanNa kelegon gelah kerah kal tanehndu, maka kai pe la turah. E maka mate kam minter i je, aminna gia taneh si iberekenNa man bandu taneh si mehuli.

¹⁸Inget lah perentah-perentah enda dingen ergaken lah. Iketkenlah e i bas tanndu, pakeken lah e i bas perdempakkenndu maka lalap ingetndu. [65†]

¹⁹Ajarken man anak-anakndu. Cakapken lah kerna si e subuk sanga kam i rumah ntah i bas perdalanen, ntah sanga kam ngadi-ngadi, ntah sanga kam erdahin.

²⁰Suratken undang-undang e i bas binangun pintun rumahndu ras pintun gerbangndu.

²¹Adi bage nggedang umurndu ras anak-anakndu i bas taneh si ipadanken TUHAN Dibatandu merekenca man nini-ninindu. Kam tetap nggeluh i je, kidekah lit denga langit i babo doni enda.

²²Ikutkenlah alu tutus undang-undang si enggo kubereken man bandu, e me: kelengi TUHAN Dibatandu, lakoken kerina perentah-perentahNa, janah setialah man baNa.

²³Adi bage ipelawesNa kerina bangsa-bangsa e adi kam mengketi daerah e. Iinganindu me taneh bangsa-bangsa si belinen ras gegehen asang kam.

²⁴Kasa taneh si idedehndu jadi sikerajangenndu. Daerahndu mulai i gurun pasir i Selatan nari seh ku deleng-deleng Libanon arah Utara. I Lau Eprat nari arah Timur seh ku Lawit Tengah arah Barat. [66†]

²⁵Amin ku japa pe kam lawes i bas negeri e, TUHAN Dibatandu si erbanca maka mbiar rayat negeri e man bandu, rikutken si ipadankenNa. Janah ise pe la ngasup ngalang-ngalangi kam.

²⁶I bas wari enda kupepilihken man bandu pasu-pasu tah sumpah.

²⁷Kam ipasu-pasu, adi iikutkenndu perentah-perentah TUHAN Dibatandu si kubereken man bandu wari enda,

²⁸tapi kam kena sumpah adi la iikutkenndu perentah-perentah e, tapi nilah kam guna nembah man dibata-dibata si deban si la pernah isembahndu gelgel nari.

²⁹Kenca itaruhken TUHAN kam ku negeri si nandangi iinganindu e, momokenlah pasu-pasu i datas Deleng Gerisim nari, tapi momokenlah sumpah i datas Deleng Ebal nari. [67†] (

³⁰Ingan deleng si dua e arah Barat Lau Jordan i bas daerah bangsa Kanaan si ringan i Baluren Lau Jordan. Inganna kempak Barat, la ndauhsa i bas batang kayu More deherken kuta Gilgal.)

³¹Nandangi ikeparindu me Lau Jordan guna ngiani negeri si ibereken TUHAN Dibatandu man bandu. Adi enggo man bandu ras iinganindu negeri e,

³²jaga maka tetap kam ngikutken kerina undang-undang si kubereken man bandu wari enda.”