Read Batak Karo ULANGEN 12 Bible Online

ULANGEN 12 - Batak Karo bible

ULANGEN 12

¹“Enda me undang-undang si man ikutenkenndu kidekah geluhndu i bas negeri si ibereken TUHAN Dibata nu nini-ninindu man bandu. Begiken dage:

²I negeri si nandangi ibuatndu e, kernepken kerina ingan-ingan bangsa e nembah man dibata-dibatana, subuk i datas deleng-deleng si meganjang, i datas uruk-uruk, bage pe i teruh batang kayu mbelin.

³Runtuhken lah batar-batarna, sontarken lah seh getem tugu-tugu batuna si iakap kalak badia. Ciluk gambar berhala Asera, bulakken gana-ganana, gelah asa ndigan pe lanai ia isembah i bas ingan-ingan e. [68†]

⁴Ola sembah TUHAN Dibatandu bagi penembah kalak dibata-dibatana.

⁵TUHAN milihsa sada ingan i bas daerah suku-sukundu nari man inganndu ersembah muji gelar TUHAN. Ku ingan si sada e me bangsandu arus reh ngadap TUHAN ras ersembah man baNa.

⁶I je me kam mpersembahken persembahen tutungen ras persembahen gelehen si deban, persembahen persepuluhenndu, persembahenndu si khusus, pemere si ipadankenndu man TUHAN, persembahen ukur meriah, anak lembu ntah biri-birindu si pemena.

⁷I je me, i adep-adepen TUHAN Dibatandu si enggo masu-masu kam, kam ras keluargandu man ersenang-senang ngenanami kerina si mehuli si enggo idahikenndu.

⁸Adi enggo seh paksana e, lanai banci bagi si gelgel perbahanenndu. Seh asa genduari kerina kam biasa nembah bagi ate-atendu,

⁹sabap langa kam seh i negeri si nandangi ibereken TUHAN Dibatandu man bandu, i ja kam banci nggeluh alu dem kemalemen ate.

¹⁰Adi enggo ikeparindu Lau Jordan e, TUHAN meresa maka banci kam nggeluh ngiani negeri e. Ia si njagai kam, maka aman kam i bas musuh-musuhndu nari, gelah kam nggeluh alu dame.

¹¹TUHAN milihsa sada ingan ersembah man baNa. E maka arus ibabandu ku bas ingan e kerina si enggo kuperentahken man bandu: persembahen-persembahen tutungen ras persembahen gelehen si deban, persembahen persepuluhenndu, persembahenndu si khusus, pemere khusus si enggo ipadankenndu man TUHAN.

¹²Ermeriah ukurlah kam i adep-adepen TUHAN ras anak-anakndu, suruh-suruhenndu, ras kalak Lewi si tading i kutandu. Ingetlah maka kalak Lewi la lit tanehna jine.

¹³Ola persembahkenndu persembahenndu i bas ingan-ingan si ipilihndu jine.

¹⁴Tapi arus maka ipersembahkenndu e i bas ingan si sada, si ipilih TUHAN i bas sada daerah suku-sukundu nari. I bas ingan e saja ngenca kam banci mpersembahken persembahen tutungen ras ngelakoken lakon si deban si enggo kuperentahken man bandu.

¹⁵Tapi bebas kam nggeleh ras man asuh-asuhenndu i japa pe kam tading. Banci ipanndu asa buena ibereken TUHAN man bandu. Kerina kam subuk si bersih ras lang rikutken aturen agama, banci man daging ndai, bali ras pemanndu daging belkih ntah bedar.

¹⁶Tapi la banci ipanndu darehna; amburkenlah e ku taneh desken lau. [69†]

¹⁷La banci ipanndu i bas inganndu tading persembahen si ipersembahkenndu man TUHAN: persembahen persepuluhen i bas gandumndu, lau anggurndu, minak saitunndu, anak lembu ntah biri-birindu si pemena, pemere si ipadankenndu man TUHAN, persembahen ukurndu meriah, ntah persembahen-persembahen si debanna.

¹⁸I bas adep-adepen TUHAN Dibatandu, i bas sada ingan ersembah si ipilih TUHAN Dibatandu ngenca banci ipanndu persembahen-persembahen e, kam ras anak-anakndu ras suruh-suruhenndu bage pe ras kalak Lewi si tading i bas kutandu. Ermeriah ukur kam i je kerna kasa kai si enggo idahikenndu.

¹⁹Jaga, maka ola ilupakenndu kalak Lewi kidekah kam tading i negerindu.

²⁰Adi ipebelang TUHAN Dibatandu daerahndu rikutken si ipadankenNa, banci kam man daging i ja kam merincuh.

²¹Adi ingan ersembah e ndauhsa, e maka katawari kam merincuh, banci kam nggeleh lembu ntah biri-biri si ibereken TUHAN man bandu, janah banci ipanndu daging e i rumah bagi si enggo kukataken man bandu.

²²Tiap kalak, bersih ntah lang, banci man daging e bali ras pemanna daging belkih ntah balua.

²³Saja ngenca, la banci ipanndu daging si lit denga darehna, sabap kegeluhen lit i bas dareh e. E maka la banci ipanndu kegeluhen e radu ras dagingna. [70†]

²⁴Ola pan dareh, tapi amburkenlah ku taneh desken lau.

²⁵Adi ikutkenndu perentah enda, meriah kal ukur TUHAN, janah kerina jadi mehuli man bandu ras man sinursurndu.

²⁶Babalah persembahen ras pemere si ipadankenndu ku TUHAN, ku bas ingan ersembah si sada e.

²⁷Persembahkenlah i je persembahen-persembahen si arus itutung i das batar-batar TUHAN. Bage pe, persembahkenlah i je persembahen-persembahen, si man panganndu dagingna, tapi darehna arus iamburken ku babo batar-batar ingan persembahen e.

²⁸Ikutkenlah alu tutus asa kai si kuperentahken man bandu, maka kerina si mehuli jadi man bandu ras man sinursurndu seh rasa lalap, erkiteken kam ngelakoken si benar dingen si ngena ate TUHAN Dibatandu.”

²⁹“TUHAN Dibatandu ngkernepken bangsa-bangsa negeri e, sanga kam erperang rassa, gelah banci iciati ras iinganindu tanehna.

³⁰Kenca ikernepken TUHAN bangsa-bangsa e, jaga maka ola iikutkenndu bicara agama kalak e, sabap adi bage kena siding kematen kam. Ola kal icubakenndu mpelajari kuga cara kalak e ersembah man dibatana, alu tujun guna ngusih-ngusih ia.

³¹Ola sembah TUHAN Dibatandu seri ras penembahna dibata-dibatana, sabap sanga isembahna dibata-dibatana, ilakokenna perkara-perkara si melket si erbahanca nembeh ate TUHAN. Terlebih-lebih pe igelehna anak-anakna jadi persembahen i bas api i babo batar-batarna.

³²Lakokenlah kerina si enggo kuperentahken man bandu, ola kurangi sitik pe, ola tambahi kai-kai pe. [71†]