Read Batak Karo ULANGEN 14 Bible Online

ULANGEN 14 - Batak Karo bible

ULANGEN 14

¹“Kam anak-anak TUHAN Dibatandu kap. E maka sanga kam nangisi kalak mate, ola lukai badanndu, ola cukur buk si lit i bas perdempakenndu bagi perbahanen bangsa si deban. [72†]

²Kam sikerajangen TUHAN Dibatandu kap; ipilihNa kam jadi bangsaNa jine i tengah-tengah kerina bangsa-bangsa si nggeluh i doni enda.” [73†]

³“Asa kai rubia-rubia si ikataken TUHAN pantangen, ola pan.

⁴Rubia-rubia si enda banci ipanndu: lembu, biri-biri, kambing,

⁵belkih, biri-biri kerangen, kambing kerangen, balua; e me

⁶kerina rubia-rubia si erbelah silu-siluna, janah pe petegeti.

⁷Tapi rubia-rubia si la erbelah silu-siluna dingen la petegeti la banci ipanndu. E maka la banci ipanndu unta, kelinci, ntah marmut. Rubia-rubia enda pantangen. Aminna pe petegeti ia tapi la erbelah silu-siluna.

⁸Ola ipanndu babi. Pantangen e, erkiteken erbelah pe silu-siluna tapi la ia petegeti. Ola pan rubia-rubia enda janah ola kuit pe bangkena.

⁹Banci ipanndu kerina binurung si lit sirip ras sisikna,

¹⁰tapi asa kai si nggeluh i bas lau si la ersisik ras la ersirip la banci ipan; pantangen e.

¹¹Banci ipanndu perik-perik si la ipantangken.

¹²[12-18] Tapi enda kap perik si la banci ipanndu: rajawali, buk, kerina bangsa kuliki, liat-liat, kak, perik unta, camar, ondan, enggang, belibis, alingkupa, bengkik.

¹⁹Kerina serangga si erkabeng, pantangen; la banci ipan.

²⁰Serangga si la pantangen banci ipan.

²¹Ola pan rubia-rubia si mate alu la igeleh. Banci isuruhndu bangsa si deban si tading ras kam manca, ntah pe banci idayakenndu man bana. Tapi kam sikerajangen TUHAN Dibatandu kap; kam bangsaNa. Ola tanggerken anak biri-biri alu susu indungna.” [74†]

²²“Serapkenlah persepuluhen, e me sepersepuluh i bas ulih jumandu nari tep-tep tahun. [75†]

²³E maka lawes lah ku ingan si sada e si enggo ipilih TUHAN Dibatandu man ingan ersembah. I bas ingan e i adep-adepen TUHAN, panlah persepuluhen gandumndu, anggurndu, minak saitunndu ras anak si pemena i bas lembundu ras biri-birindu. Lakokenlah enda gelah banci kam erlajar rusur mehamat man TUHAN Dibatandu.

²⁴Adi persepuluhen i bas ulih latih bekas pemasu-masun TUHAN man bandu e ndauhsa iakapndu mabasa i bas rumahndu nari ku ingan ersembah, bagenda lah perbahanndu:

²⁵dayaken ulihndu latih e, e maka baba tukurna ku ingan ersembah si sada e.

²⁶Tukur lah alu e kai kam merincuh: daging lembu, anak biri-biri, anggur, bir; e maka i bas ingan e, i adep-adepen TUHAN Dibatandu, panlah si e kerina dingenndu ersenang-senang ras keluargandu.

²⁷Ola lupaken kalak Lewi si ringan i kutandu, erkiteken la lit ertana jine.

²⁸Tiap ujung tahun peteluken, babalah persepuluhen kerina ulih jumandu, kebenken e i bas kutandu.

²⁹Si enda man pangan kalak Lewi, erkiteken la lit ertana, bage pe kalak pertandang, anak melumang, ras diberu balu-balu si ringan i kutandu. Pelepas kalak enda reh muat kasa kai si iperlukenna. Lakokenlah enda gelah ipasu-pasu TUHAN Dibatandu kam i bas asa kai si idahindu.”