Read Batak Karo ULANGEN 15 Bible Online

ULANGEN 15 - Batak Karo bible

ULANGEN 15

¹“Tep-tep ujung tahun pepituken, sasapken lah utang kalak si rutang man bandu.

²Bagenda perbahanenndu: Ise si minjamken duit man temanna kalak Israel, arus nasapken utang e. Arus maka la icubakenna pe mindosa sabap TUHAN jine enggo ngataken utang e isasapken.

³Banci ipindondu utang kalak pertandang, tapi la banci ipindondu utang kalak si sada bangsa ras kam.

⁴ TUHAN si masu-masu kam i negeri si iberekenNa man bandu, e maka sada pe la lit kam kalak musil,

⁵adi iikutkenndu Ia dingen alu tutus ngelakoken kasa kai si kuperentahken wari enda.

⁶TUHAN si masu-masu kam rikutken si ipadankenNa. Ipinjamkenndu pe duitndu man melala bangsa-bangsa si deban, tapi la kam perlu minjam i bas bangsa si apai nari pe. Kam erkuasa nandangi melala bangsa-bangsa, tapi la lit sada bangsa pe si ngkuasai kam.

⁷I bas kuta-kuta si ibereken TUHAN Dibatandu man bandu, adi lit i je sapih-sapih kam kalak Israel si kekurangen, ola kam nggeluh erbana-bana, tapi sampatilah ia. [76†]

⁸Tapi melumbar lah, dingen berelah ia minjam asa si iperlukenna.

⁹Ola tulak adi atena minjam man bandu, aminna pe tahun nasapken utang enggo ndeher. Ola kal pelepas perukuren si jahat e turah i bas ukurndu. Adi la kam nggit mereken pinjamen man bana, erlebuh ia ku TUHAN ngelawan kam e maka ipersalahken TUHAN kam.

¹⁰Bereken man bana alu melumbar ras dem keriahen ukur, gelah ipasu-pasu TUHAN kam i bas kerina si idahikenndu.

¹¹Lit nge rusur kalak Israel si musil dingen si kekurangen, e maka kuperentahken man bandu maka melumbar kam man bana.” [77†]

¹²“Adi sekalak temanndu bangsa Israel, dilaki tah diberu, ndayaken bana man bandu jadi budak, arus ibebaskenndu ia kenca ia erdahin ras kam enem tahun. Kenca seh tahun si pepituken arus maka ibebaskenndu ia. [78†]

¹³Sanga ia ibebaskenndu ola pelawesndu ia ngambe-ngambe.

¹⁴Bereken lah man bana alu melumbar kai si enggo idatndu arah pemasu-masun TUHAN: biri-biri, gandum, anggur.

¹⁵Inget lah maka kam pe nai budak nge i Mesir, tapi ibebasken TUHAN Dibatandu kam. E me sabapna maka kubereken man bandu genduari perentah enda.

¹⁶Tapi banci jadi budakndu e la nggit lawes. Banci jadi keleng atena nandangi kam ras keluargandu, puas akapna tading ras kam.

¹⁷Adi bage babalah ia ku pintun rumahndu, tupuklah cupingna i je, alu bage ia enggo jadi budakndu kidekah geluhna. Bage ka lah perbahanenndu man budakndu si diberu pe.

¹⁸Ola kam jungut-jungut adi ibebaskenndu budakndu, sabap enggo kap ia erdahin ras kam enem tahun dekahna dua kali lipat pendahinna asang kalak ngemo. Lakokenlah enda, maka ipasu-pasu TUHAN Dibatandu kam i bas kerina si idahikenndu.”

¹⁹“Serapkenlah man TUHAN Dibatandu asa kai jenggi lembu dingen bajar biri-biri si pemenana tubuh. Ola sada pe lembu enda ipakendu erdahin, ola sada pe biri-biri e iguntingndu mbuluna. [79†]

²⁰Tiap tahun ipanndulah e, kam ras keluargandu, i bas ingan ersembah si sada e i adep-adepen TUHAN.

²¹Tapi adi rubia-rubia si iserapken e lit cacatna, umpamana pengkar, ntah pentang, ntah cacat si deban si mekelek, la banci ipersembahkenndu e man TUHAN Dibatandu.

²²Rubia-rubia si bage banci i rumah ipanndu. Kerina kam subuk si bersih ras lang rikutken aturen agama, banci manca desken pemanndu daging belkih ntah balua.

²³Tapi darehna ola pan, arus maka iamburkenndu ku taneh desken lau.” [80†]