Read Batak Karo ULANGEN 16 Bible Online

ULANGEN 16 - Batak Karo bible

ULANGEN 16

¹“Rayakenlah wari Paskah i bas bulan Abib guna pehaga TUHAN, Dibatandu. Sabap i bas sada berngi i bas bulan e kap, ipulahi TUHAN kam i Mesir nari. [81†]

²Laweslah ku ingan ersembah si sada e; gelehlah i je sada lembu ntah biri-biri man pangan Paskah guna pehaga TUHAN Dibatandu.

³Sanga ipanndu pangan e, ola ipanndu roti si itama ragi. Pitu wari dekahna kam man roti si la itama ragi, bagi perbanndu sanga kam nadingken Mesir alu merudu-rudu. Panlah roti e, roti si igelari roti kiniseran, gelah kidekah geluhndu lalap ingetndu wari sanga kam ndarat i Mesir nari, ingan kiniseran e.

⁴Kidekah si pitu wari e ise pe la banci i negerindu muniken ragi i bas rumahna; daging asuh-asuhen si igeleh karaben i bas wari si pemena e arus maka ipan i bas berngi e kang.

⁵ [5-6] Geleh lah rubia-rubia Paskah e i bas ingan ersembah si sada e; la banci i bas ingan si deban i negeri si ibereken TUHAN Dibatandu man bandu. Lakokenlah e sanga sundut matawari; i bas paksa e kap kam nai nadingken Mesir.

⁷Tanggerken lah daging e, jenari pan i bas ingan ersembah si sada e; jenari mulihlah pepagina ku rumahndu.

⁸Kenca si e, enem wari dekahna arus ipanndu roti si la tama ragi. Janah i bas wari si pepituken, pulunglah ersembah man TUHAN Dibatandu janah ola kam erdahin i bas wari e.”

⁹“Beligai pitu minggu i bas kam menaken rani gandumndu. [82†]

¹⁰Kenca bage maka bahanlah Kerja Rani, guna pehaga TUHAN Dibatandu, alu maba persembahen ukur meriah man baNa. Buena rikutken pasu-pasu si iberekenNa man bandu.

¹¹Ermeriah ukurlah i adep-adepen TUHAN radu ras anak-anakndu, suruh-suruhenndu, ras kalak Lewi, kalak pertandang, anak melumang, ras diberu balu-balu, si tading i kutandu. Lakoken e i bas ingan ersembah si sada e.

¹²Jaga maka tetap iikutkenndu perentah-perentah enda; ola lupa maka nai kam jadi budak i Mesir.”

¹³“Kenca enggo dung ierikndu gandumndu, ras kenca enggo dung iperehndu anggurndu, rayaken lah Wari Raya Sapo-sapo pitu wari dekahna. [83†]

¹⁴Ermeriah ukurlah ras anak-anakndu, suruh-suruhenndu, ras kalak Lewi, kalak pertandang, anak melumang, ras diberu balu-balu, si tading i bas kutandu.

¹⁵Pehagalah TUHAN Dibatandu alu ngerayaken wari raya enda pitu wari dekahna i bas ingan ersembah si sada e. Ermeriah ukurlah erkiteken TUHAN enggo masu-masu peranin ras pendahinndu.

¹⁶Kerina dilaki i bas bangsandu arus reh nembah TUHAN ku ingan ersembah si sada e telu kali i bas sada tahun, e me: paksa Paskah, paksa Kerja Rani, ras i bas paksa Wari Raya Sapo-sapo. Sekalak-sekalak arus maba persembahen,

¹⁷rikutken kengasupenna, sue ras pasu-pasu si enggo ibereken TUHAN Dibatandu.”

¹⁸“Angkatlah hakim-hakim ras pegawai-pegawai si deban i bas tep-tep kuta si ibereken TUHAN Dibatandu man bandu, gelah kalak enda ngerunggui rayat alu la rayo-ayo.

¹⁹Arus maka kalak enda bujur dingen rembang tengah carana ngadili. La banci ia ngaloken sogok, sabap pemere erbahanca pentang mata, aminna pe ia kalak pentar dingen kalak bujur, janah e erbahanca ia erbahan keputusen si salah. [84†]

²⁰Arus maka tetap bujur dingen adil kam, gelah banci inganindu negeri si ibereken TUHAN Dibatandu man bandu janah banci kam tetap nggeluh i je.

²¹Adi ipajekkenndu batar-batar persembahen man TUHAN Dibatandu, ola pajekken i duruna gana-gana Dewi Asera si ibahan i bas kayu nari. [85†]

²²Ola sada pe pajekken tugu i bas batu nari man ingan ersembah man berhala, erkiteken nembeh kal ate TUHAN si bage. [86†]