Read Batak Karo ULANGEN 17 Bible Online

ULANGEN 17 - Batak Karo bible

ULANGEN 17

¹Ola persembahken man TUHAN Dibatandu lembu tah biri-biri si lit cacatna; ciga ate TUHAN persembahen si bage rupa.

²Adi lit ibegindu maka i bas sada kuta, lit kalak, subuk dilaki ntah diberu erdosa man TUHAN janah enggo ngelanggar perpadanenna ras TUHAN,

³alu nembah dingen erdahin guna dibata-dibata si deban, ntah matawari ntah bulan, ntah bintang-bintang, sada perbahanen si ertentangen ras perentah TUHAN. [87†]

⁴Adi lit ibegindu berita si bagenda rupana, selidiki lah lebe mehuli-mehuli. Adi payo maka si jahat e enggo jadi i Israel,

⁵babalah kalak si bage ndarat kuta, batu-batui ngayak mate.

⁶Tapi, kalak si bage banci iukum mate adi lit dua kalak tah lebih saksi; ia la banci iukum mate adi sada ngenca saksi. [88†]

⁷Saksi-saksi e mbatu-batuisa si pemena, e maka kenca bage kalak si deban kerina, alu bage enggo iambekkenndu kejahaten enda. [89†]

⁸Banci jadi maka lit perkara-perkara si meserasa mutuskenca i bas sada ingan umpamana: kalak sibunuh-bunuhen, situntut-tuntuten kerna erta-erta, siluka-lukan, bage pe perkara pembunuhen tapi la ieteh sengaja ntah lang, e maka laweslah ku ingan ersembah si sada e si enggo itentuken TUHAN.

⁹Adapkenlah perkara e man imam-imam kalak Lewi ras man hakim si ertugas paksa e, suruhlah ia erbahan keputusen.

¹⁰Ia mutusken perkara e, janah lakokenlah rikutken keputusenna e.

¹¹Aloken lah keputusenna ras ikutken lah kai nina seh ku bas soal si kitik-kitikna pe.

¹²Ise si pang nimbak hakim ntah imam si sanga ertugas paksa si e arus ibunuh. Alu bage iaguindu kejahaten enda i bas Israel nari.

¹³E maka kerina kalak megi si enda jadi mbiar, janah ise pe lanai pang ngelakoken si bage.”

¹⁴“Kenca enggo idatndu taneh si ate TUHAN Dibatandu ibereken man bandu, janah kam enggo tading i je, nggit mawen maka merincuh ka kam lit rajandu bagi bangsa-bangsa sekelewetndu. [90†]

¹⁵Jaga maka kalak si ipilihndu atendu jadi raja e, kalak si enggo ipilih TUHAN. Arus maka ia ipilih i bas bangsandu nari, ola bahan bangsa si deban jadi rajandu.

¹⁶Raja e la banci melala kudana guna ipake tenterana, la banci isuruhna rayat nukur kuda ku Mesir, sabap enggo ikataken TUHAN maka bangsaNa ndigan pe lanai banci mulihken ku Mesir. [91†]

¹⁷La banci melala ndeharana, sabap e banci erbahanca ia nundalken TUHAN. La banci ipebayakna bana alu pirak ntah emas. [92†]

¹⁸Sanga ia jadi raja arus maka lit ibahanna sada salinen kitap undang-undang ras pengajaren Dibata si isalin i bas aslina nari si isimpan imam-imam kalak Lewi.

¹⁹Kitap e arus ndeher rusur ras ia ras iogena gedang-gedang geluhna, gelah alu bage erlajar ia pehaga TUHAN ras ngikutken perentah-perentah si lit i bas kitap e alu tutus.

²⁰Si enda guna njagai ia maka ola iakapna ia ganjangen asang temanna kalak Israel si deban. Tole pe njagai ia gelah ola sitik pe la ikutkenna perentah-perentah TUHAN. Alu bage maka banci ia erkuasa ertahun-tahun, dingen kesusurenNa merentah Israel ersundut-sundut.”