Read Batak Karo ULANGEN 18 Bible Online

ULANGEN 18 - Batak Karo bible

ULANGEN 18

¹“Suku Lewi, e me suku imam, sitik pe la ngalo taneh i bas Israel jadi baginna. Tapi ia nggeluh i bas pemere ras persembahen si ibereken man TUHAN.

²La lit taneh sikerajangenna, bagi suku-suku si deban; baginna e me kinihamaten jadi imam TUHAN sue ras si ipadanken TUHAN. [93†]

³Adi lit kalak mpersembahken lembu ntah biri-biri, maka imam-imam ngaloken paha lebena, tulan rahangna, ras beltekna.

⁴Bagin si pemena i bas gandum, anggur, minak saitun ras mbulu biri-biri, e pe jadi bagin imam-imam.

⁵TUHAN milih suku Lewi i tengah-tengah suku-sukundu si deban gelah suku e ndahiken ndahin TUHAN selaku imam seh asa lalap.

⁶Tiap kalak Lewi banci reh i bas tep-tep kuta Israel nari ku ingan ersembah si sada e, adi bage atena,

⁷dingen pe banci erdahin i je selaku imam TUHAN Dibatana bali ras kalak Lewi si deban si erdahin i je.

⁸Pangan si man alonkenna bali buena ras imam-imam si deban. Banci isimpanna kai pe si itenahken keluargana man bana.”

⁹“Kenca kam seh ku negeri si ibereken TUHAN Dibatandu man bandu, ola ikutken perbahanen-perbahanen si mbau i bas bangsa-bangsa si lit i je.

¹⁰Ola persembahken anak-anakndu i bas api i babo batar-batar persembahenndu. Ola pelepas bangsandu ertendung, ngoge tanda-tanda, ntah mpergunaken mangmang, [94†]

¹¹ntah make guna-guna, janah ola pediat ia nungkun man begu kalak si enggo mate. [95†]

¹²Nembeh ate TUHAN Dibatandu man kalak si ngelakoken perbahanen si mbau e. E me pe sabapna maka ipelawesNa bangsa-bangsa e i bas negeri e nari sanga kam ngasak ku je.

¹³Setialah man TUHAN alu bulat ukurndu.” [96†]

¹⁴Kenca bage nina Musa, “I bas negeri si nandangi iinganindu e, rayat si i je ngikutken pedah-pedah kalak ertendung, ngoge tanda-tanda. Tapi ilarang TUHAN kam ngelakoken si bage.

¹⁵Tapi isuruh TUHAN pagi man bandu sekalak nabi bali ras aku, i bas bangsandu nari, janah arus iikutkenndu ia. [97†]

¹⁶I bas wari sanga kam pulung i Deleng Sinai mindo kam maka olanai ibegindu TUHAN ngerana tole, bage pe olanai min iidahndu api kemulianNa, sabap mbiar kam mate perban si e.

¹⁷Erkiteken si e nina TUHAN man bangku, ‘Mehuli kal pemindonna e.

¹⁸Kusuruh pagi man bana sekalak nabi si seri ras kam i bas tengah-tengah bangsana nari; Kukataken pagi man bana kai si man katankenna. Janah iturikenna pagi man bangsa e asa kai si Kuperentahken.

¹⁹Ngerana ia i bas gelarKu, janah Kuukum asa kai kalak si la nggit ngikutken ia. [98†]

²⁰Tapi adi lit sekalak nabi si pang ngerana i bas gelarKu sedangken la Kuperentahken ia ngerana, arus maka mate ia erkiteken si e. Bage ka pe, asa kai nabi si ngerana i bas gelar dibata-dibata si deban arus mate erkiteken si e.’

²¹Nggit maka nungkun pusuhndu, kuga nge metehsa maka si iberitaken sekalak nabi la i bas TUHAN nari.

²²Adi lit sekalak nabi ngerana i bas gelar TUHAN, tapi la jadi bagi si ikatakenna e, tentu beritana e labo berita TUHAN. Nabi e ngerana i bas gelarna jine, e maka ola kam mbiar man bana.”