Read Batak Karo ULANGEN 19 Bible Online

ULANGEN 19 - Batak Karo bible

ULANGEN 19

¹“Kenca enggo ikernepken TUHAN Dibatandu rayat negeri si iberekenNa ateNa man bandu e, janah kenca ibuatndu kuta-kuta ras rumah-rumahna dingen enggo kam tading i negeri e, [99†]

²[2-3] bagi telukenlah daerah e. I bas tep-tep sada daerah litken sada kuta si la ndauhsa i bas kuta si deban nari, gelah adi lit kalak munuh banci ia kiam cebuni ku kuta e.

⁴Adi lit sekalak munuh alu la iarapna, janah si ibunuhna e labo musuhna banci ia kiam ku sada kuta i bas kuta si telu e, maka ia aman i je.

⁵Umpamana, lit dua kalak lawes ku kerangen nabah kayu. Sanga nabah kayu, sekalak i bas si dua e lepas kapakna i bas tangkena nari, dingen ngkenai temanna ndai seh mate; e maka banci ia kiam ku sada kuta i bas kuta si telu ndai gelah ia aman.

⁶Adi sada ngenca kuta ingan aman, banci jadi ndauhsa ku je, e maka keluarga si ertanggung jawab erbahan pembalasen i bas pembunuhen e banci kari nangkap si munuh e, janah perbahan rawana, ibunuhna kalak si la ersalah, sedangken kalak ndai munuh labo alu sengaja, sabap labo musuhna si ibunuhna e.

⁷Em sabapna maka kusuruh kam nerapken telu kuta.

⁸Adi ipebelang TUHAN Dibatandu daerahndu alu mereken man bandu kerina daerah si ipadankenNa sue ras si ikatakenNa man nini-ninindu,

⁹maka arus ipilihndu telu kuta nari. (Adi atendu keleng man TUHAN Dibatandu, nggeluh rikutken si iajarkenNa, janah ilakokenndu asa kai si kuperentahken man bandu wari enda, ibereken TUHAN man bandu kerina negeri e.)

¹⁰Lakokenlah e maka ola kam erdosa erkiteken ngukum mate kalak si la ersalah i negeri si ibereken TUHAN ateNa man bandu.

¹¹Tapi umpamakenlah lit sekalak nggempangi imbang-imbangna, dingen alu sengaja munuh imbangna e jenari lompat ia ku salah sada kuta e guna ndatken perlindungen.

¹²Adi bage soalna, peminpin-peminpin kutana jine nuruhsa gelah ia itangkap, jenari iendeskenna man keluarga si ertanggung jawab erbahan pembalasen i bas pembunuhen e, gelah banci ia ibunuh.

¹³Ola cidahken perkuah ate man bana. Bersihkenlah Israel i bas pembunuh si bage, gelah kam selamat.”

¹⁴“Ola piser baleng juma temanndu si balengen, si enggo itentuken nai-nai nari i negeri si ibereken TUHAN Dibatandu man bandu.” [100†]

¹⁵“La cukup adi sekalak saksi ngenca mbuktiken kejahaten sekalak jelma; si sitikna arus lit dua kalak saksi. [101†]

¹⁶Adi lit sekalak jelma atena meneken kalak si deban alu erbahan pengadun palsu kerna sada kejahaten,

¹⁷arus maka duana ia iadapken ku ingan ersembah, gelah iadili imam ras hakim si sanga ertugas paksa e.

¹⁸Arus maka manjar-anjar iselidiki hakim persoalen e. Adi pengadunna kerna temanna kalak Israel e terbukti palsu,

¹⁹ia arus iukum sue ras ukumen si arusna kin ialoken kalak si iadukenna e. Alu bage ibersihkenndu me kejahaten si bage rupana.

²⁰Kenca bage tentu kerina kalak si deban si megi kejadin e; mbiar ia, e maka ndigan pe lanai ilakoken kalak perbahanen si jahat e.

²¹Ola cidahken perkuah atendu i bas persoalen si bage rupana. Ukumen kalak si bage, e me kesah gancih kesah, mata gancih mata, ipen gancih ipen, tan gancih tan, ras nahe gancih nahe.” [102†]