Read Batak Karo ULANGEN 20 Bible Online

ULANGEN 20 - Batak Karo bible

ULANGEN 20

¹“Adi lawes kam erperang ngelawan musuh-musuhndu ola kam mbiar, aminna gia idahndu gereta kuda ras kudana, dingen tenterana teremen asang kam. TUHAN Dibatandu, si enggo mulahi kam i Mesir nari, si nemani kam.

²Ope kam lawes erperang, sekalak imam reh ku lebe ngerana man tentera e,

³‘Begiken o kalak Israel! I bas wari enda lawes kam ku peperangen. Ola kam mbiar man musuhndu, ola kam gentar, ola bene ukurndu.

⁴TUHAN Dibatandu si ngarak-ngarak kam ras si mereken kemenangen man bandu.’

⁵Kenca bage maka ngerana me komendan pasuken man tentera e nina, ‘Lit kang i jenda si mbaru denga majekken rumah, tapi langa ibengketna i bas gelar TUHAN? Adi lit, arus ia lawes ku rumah. Banci jadi mate ia kari i peperangen; adi bage kalak si deban kari si mengket rumahna e i bas gelar TUHAN.

⁶Lit kang i jenda si mbaru denga nuan peken anggurna, tapi langa sempat iperanina? Adi lit, banci ia mulih ku rumah. Sabap nggit maka mate ia i peperangen erbanca kalak si deban ersenang-senang ngaloken lau anggurna.

⁷Lit kang i jenda si nandangi erjabu atena? Adi lit mulihlah ia ku rumah. Nggit maka mate ia ipertempuren, kalak si deban kari erjabu ras diberu si nandangi jadi ndeharana e.’

⁸Tole arus maka ikataken komendan pasuken man kalak e, ‘Lit i jenda si lanai ersemangat ban biarna? Adi lit mulih saja ia ku rumah. Nggit maka ilangketina kari maka mbiar ka temanna si deban.’

⁹Adi enggo dung komendan-komendan e ngerana, ipilih me peminpin-peminpin man tep-tep terpuk.

¹⁰Adi lawes kam merangi sada kuta, berekenlah lebe kesempaten man rayatna mindo ampun.

¹¹Adi italangina pintu gerbangna, mindo ampun ia, kerina ia jadi budakndu, janah ngelakoken kerja paksa man bandu.

¹²Tapi adi penduduk kuta e la nggit mindo ampun, tapi ilawanna kam, kepung lah kuta e alu tenterandu.

¹³Jenari, kenca ipelepas TUHAN Dibatandu kam naluken kuta e, bunuhilah asa kai dilaki si lit i je.

¹⁴Tapi diberu-diberu, danak-danak, asuh-asuhen, ras kerina barang-barang si deban si lit i je banci ibuatndu man bandu. Banci ipakendu kerina sikerajangen musuhndu; enggo kap ibereken TUHAN Dibatandu e man bandu.

¹⁵Bage me arusna perbahanenndu man tep-tep kuta si ndauh i bas negeri si nandangi iinganindu e.

¹⁶Tapi sanga kam naluken kuta-kuta i bas negeri si nandangi ibereken TUHAN Dibatandu bandu, bunuhlah kerina jelma si lit i je.

¹⁷Kernepken kerina rayatna: bangsa Heti, bangsa Amori, bangsa Kanaan, bangsa Peris, bangsa Hewi ras bangsa Jebusi, sue ras si isuruh TUHAN maka ilakokenndu.

¹⁸Bunuhlah rayat e kerina, gelah ola kam ibabaina erdosa man TUHAN alu ngajari kam ngelakoken perkara-perkara si mbau bagi si ilakokenna i bas ia ersembah man dibata-dibatana.

¹⁹Sanga iperangindu sada-sada kuta, ola tabah batang kayuna si buahna man pangan, aminna pe ndekah kam ngkepung kuta e. Panlah buahna tapi ola tabah batangna, sabap batang kayu e labo musuhndu.

²⁰Batang kayu si deban banci itabahndu guna ipakendu jadi bide guna ngepung kuta e, seh kuta e tertalukenndu.”