Read Batak Karo ULANGEN 21 Bible Online

ULANGEN 21 - Batak Karo bible

ULANGEN 21

¹“Nggit maun ijumpai sekalak mate ibunuh i bas mbalmbal negeri si ibereken TUHAN Dibatandu man bandu, tapi la ieteh ise si munuhsa.

²Idahi peminpin ras hakim-hakimndu lah ku ingan e, gelah isibarina asa kai dauhna i bas ingan e nari ku tep-tep kuta si pedeher i je.

³Peminpin-peminpin kuta si ndeherna ku ingan mait e, arus milih sada lembu nguda si la pernah ipake erdahin.

⁴Lembu e arus iteguna ku sada ingan si langa pernah itenggalai ras langa pernah isuani, deherken lau anak si la pernah kerah launa; i bas ingan e me kerahung lembu e igeleh peminpin-peminpin e.

⁵Imam-imam suku bangsa Lewi pe arus ikut ku je, sabap arus maka ia mutusken perkara-perkara pembunuhen. TUHAN Dibatandu si enggo milih kalak enda guna ndahiken dahinNa ras mereken pasu-pasu i bas gelarNa.

⁶Kenca e kerina peminpin-peminpin si rehna i bas kuta si ndeherna ku ingan mait e ijumpai arus murihi tanna i babo lembu e,

⁷janahna ngerana nina, ‘Labo kami si munuhsa, janah la iteh kami ise si munuhsa.

⁸O, TUHAN alemilah min dosa bangsaNdu Israel, si ipulahiNdu i Mesir nari. Alemilah kami, ola salahken kami kerna pembunuhen kalak si la ersalah.’

⁹Alu bage, adi ilakokenndu kai si isuruh TUHAN, kam lanai isalahi kerna pembunuhen e.”

¹⁰“Sanga ibereken TUHAN Dibatandu man bandu kemenangen i bas peperangen e, janah itabanndu musuh-musuhndu,

¹¹nggit maka idahndu i bas tabanenndu e sekalak diberu mejile si ngena atendu, dingen iempoindu atendu.

¹²Baba ia ku rumahndu, suruh ia ncukur bukna ras ngkeret silu-siluna,

¹³bage pe ngganti uisna. Arus maka ia tading i rumahndu, nangisi orang tuana sada bulan dekahna; kenca bage maka ia banci iempoindu.

¹⁴Denggo adi lanai atendu bage ngenen ia, pelepas ia lawes alu bebas. La banci ibahanndu man bana desken man sekalak budak, la banci idayakenndu, sabap enggo ipaksandu ia ersada kula ras kam.”

¹⁵“Nggit maun lit sekalak dilaki dua ndeharana, duana ka mupus anak dilaki, tapi anak sintua la tubuh i bas ndeharana si ngenana kal atena e.

¹⁶Adi ibagikenna atena erta-ertana man anak-anakna, la banci ia rayo-ayo alu mereken hak anak sintua man anak si ipupus ndehara si ngena atena e.

¹⁷Arus maka iberekenna dua kali lipat man anak sintua, aminna pe ia la anak i bas diberu si ngena kal atena e. Sekalak bapa arus ngakui anakna sintua, ras arus mereken bagin man bana si kin hakna.”

¹⁸“Adi lit sekalak bapa lit anakna dilaki gutul, ngelawan, si la nggit ngikutken kata orang tuana, aminna pe enggo iukum orang tuana,

¹⁹arus maka itaruhken orang tuana ia ku adep-adepen peminpin kuta i bas inganna tading gelah anak e iadili.

²⁰Arus maka ikataken orang tuana bagenda, ‘Anak kami gutul, ngelawan, la ngikutken kata; dahinna mbuang-mbuang duit janah ia pemabuk-mabuk.’

²¹E maka kerina jelma dilaki i bas kuta e menteri ia alu batu ngayak mate. Alu bage me kam mbersihken kejahaten si bage rupana. Tiap kalak Israel si megi kejadin e tentu mbiar ia.”

²²“Adi sekalak jelma iukum mate kerna kejahatenna, janah igantung i das sada tiang,

²³ola pelepas mait e i je erberngi: mait e arus ikuburken i bas wari e ka sabap kalak mate si gantung i das sada tiang erbanca negeri e kena sumpah Dibata. Kuburkenlah mait e, gelah ola icemarkenndu negeri si ibereken TUHAN Dibatandu man bandu.” [103†]