Read Batak Karo ULANGEN 22 Bible Online

ULANGEN 22 - Batak Karo bible

ULANGEN 22

¹“Adi idahndu lembu ntah biri-biri sapih-sapih kam kalak Israel pulah, ola pekulah-kulahndu la ietehndu, tapi tangkap, tegu man empuna. [104†]

²Tapi adi ndauh ingan empuna, ntah la ietehndu ise empuna, tegulah asuh-asuhen e ku rumahndu. Adi reh empuna ndaramisa bereken man bana.

³Bage ka lah perbahanndu adi ijumpaindu kelede, uis, ntah kai-kai si debanna si banci jadi bene i bas sapih-sapih kam kalak Israel.

⁴Adi guling kelede ntah lembu temanndu sapih-sapih kam kalak Israel; ola pelepas saja; sampatilah ia petedis asuh-asuhenna e mulihken.

⁵Diberu la banci make paken dilaki, bage pe dilaki la banci make paken diberu; sabap nembeh ate TUHAN Dibatandu man kalak si ngelakoken si bage.

⁶Adi jumpa kam asar perik i das batang kayu ntah i babo taneh, indungna sangana ngkeremken naruhna ntah anakna, ola tangkapndu indungna e.

⁷Banci ibuatndu anak perik e, tapi arus maka ipulahindu indungna, maka gedang umurndu ras malem atendu usur.

⁸Adi ipajekkenndu rumah mbaru, arus maka ibanndu bide ngkeleweti tarum rumah e. Adi bage la kam salah adi lit gia kalak mate ndabuh i das nari.

⁹Ola suan sinuan-sinuan si deban i bas peken anggurndu. Adi isuanndu, la banci ibuatndu ulih anggur ntah ulih sinuan-sinuan si deban ndai. [105†]

¹⁰Ola tenggalaken lembu radu ras kelede i bas sada pasangen.

¹¹Ola pake uis si ibahan tenunen wool campur benang.

¹²Tama rambu-rambuna i bas empatna suki pakenndu.” [106†]

¹³“Banci jadi lit sekalak dilaki ngempoi sekalak singuda-nguda, tapi dungna lanai atena bage ndeharana ndai.

¹⁴E maka ibahanna tuduhen palsu kerna ia, alu ngataken maka lanai bersih diberu e sanga ia erjabu.

¹⁵Adi jadi bage, ibuat orang tua diberu e lah sprei si kena dareh sanga kalak enda tang-tangna ersada kula. Icidahkenna e man runggun peminpin-peminpin kuta e jadi bukti maka diberu e bersih denga nge sanga ia erjabu.

¹⁶Bagenda lah nina bapa diberu e, ‘Kubere mbarenda anakku erjabu ras dilaki enda, tapi genduari lanai atena bage anakku.

¹⁷Ibanna tuduhen palsu kerna anakku, alu ngataken maka anakku enggo cemar maka ia erjabu. Tapi enda kap tandana maka anakku e la cemar; nehen lah bekas dareh i bas sprei sanga perjabunna e!’

¹⁸Kenca bage, ibuat peminpin-peminpin kuta e lah dilaki e, gelah ibalbali.

¹⁹Peminpin-peminpin kuta e ndenda dilaki e alu seratus duit pirak, janah duit e ibereken man bapa diberu e, sabap enggo ijuruken dilaki e sekalak singuda-nguda kalak Israel. I babo si e, diberu e tetap ka jadi ndeharana, janah la banci isirangkenna seh mate.

²⁰Tapi adi payo tuduhen e, janah la lit buktina maka diberu e langa cemar,

²¹ibaba peminpin-peminpin kuta e lah diberu ndai ku lebe-lebe rumah bapana, gelah i je ibenteri anak kutana ia seh mate. Sabap diberu e enggo ngelakoken perbahanen si erbanca mela akap bangsanta, erkiteken ia enggo ersada kula ras dilaki ope erjabu, sanga ia tading denga i rumah bapana. Alu bage me ibersihkenndu kejahaten si bagenda rupana.

²²Adi sekalak dilaki itunduk sangana ersada kula ras diberu kalak, arus maka duana ia ibunuh. Alu bage me ibersihkenndu kejahaten si bagenda.

²³Umpamakenlah lit sekalak dilaki tunduk i bas sada kuta sangana ersada kula ras sekalak singuda-nguda si enggo ertunangen ras kalak si deban.

²⁴Babandulah duana ku darat kuta, benteri alu batu ngayak mate. Singuda-nguda e arus mate sabap la ia serko mindo penampat, aminna gia ia lit i bas kuta, dingen banci minter ibegi kalak. Dilaki e arus mate erkiteken ersada kula ia ras sekalak singuda-nguda si enggo ertunangen. Alu bage me ibersihkenndu kejahaten si bagenda.

²⁵Umpamakenlah lit sekalak dilaki mperkosa sekalak singuda-nguda si enggo ertunangen i darat kuta. Adi bage si dilaki ngenca ibunuh.

²⁶Si diberu la banci ikekai pe, sabap si diberu e la erbahan dosa si patut iukum mate. Soal enda seri kap ras sekalak si ngerigep dingen munuh kalak si deban.

²⁷Dilaki e mperkosa diberu si enggo ertunangen e ndauh i bas ingan jelma nari, e maka adi serko pe ia mindo penampat labo lit si nampatisa.

²⁸Umpamakenlah lit sekalak dilaki terdat mperkosa sekalak singuda-nguda langa ertunangen. [107†]

²⁹Arus maka igalari dilaki e, emas unjuken lima puluh duit pirak man bapa diberu e, janah diberu e jadi ndeharana, sabap ipaksana singuda-nguda e ersada kula ras ia. La banci isirangkenna diberu e asa gedang geluhna.

³⁰Ise pe la banci njuruken bapana alu ersada kula ras ndehara bapana.” [108†]