Read Batak Karo ULANGEN 23 Bible Online

ULANGEN 23 - Batak Karo bible

ULANGEN 23

¹“Dilaki si enggo ikebiri ntah pe si enggo ikeret kelaminna la banci iatanken i bas perpulungen bangsa TUHAN.

²Anak si tubuh la erkiteken perjabun, ras kerina sinursurna, seh ku sundut pesepuluhken la banci iatanken i bas perpulungen bangsa TUHAN.

³Bangsa Amon ntah bangsa Moap, ras kerina sinursurna, aminna pe sundut pesepuluhken, la banci iatanken i bas perpulungen bangsa TUHAN. [109†]

⁴Sabap sanga kam ndarat i Mesir nari la ia nggit mere kam man ras minem. Iupahina si Bileam anak Beor, i kuta Petor nari i Mesopotami guna numpahi kam. [110†]

⁵Tapi la ibegiken TUHAN Dibatandu si Bileam. E maka isalihkenNa sumpahna ndai jadi pasu-pasu erkiteken keleng ateNa man bandu. [111†]

⁶Kidekah kam sada bangsa denga, ola ndigan pe isampatindu bangsa-bangsa enda, ntah erbahanca maka senang akapna.

⁷Ola igombangindu bangsa Edom, sabap keluargandu denga kap e. Ola igombangindu bangsa Mesir, erkiteken i negerina kam mbarenda tading.

⁸Adi sinursur bangsa si dua e, mulai i bas sundut si peteluken nari banci ia bengket ku bas perpulungen bangsa TUHAN.”

⁹“Sanga kam i bas ingan erkemah tupung paksa perang, jagai man bandu i bas asa kai si erbanca kam la bersih rikutken aturen agama.

¹⁰Adi sekalak dilaki lanai bersih erkiteken ernipi ia erlua-lua i bas berngi e, arus maka ndarat ia i bas ingan erkemah e nari, dingen tading i darat.

¹¹Karabenna ridilah ia, janah kenca sundut matawari maka banci ia mulihken ku bas ingan erkemah.

¹²Sikapkenlah sada ingan man kakus i darat ingan erkemah e.

¹³Baba ciken, maka adi atendu ku ture, banci ikurukndu lubang ras itamburindu ka.

¹⁴Jaga lah maka tetap badia inganndu erkemah e, sabap TUHAN Dibatandu ras kam i bas inganndu erkemah ngampang-ngampangi kam, gelah menang kam ngelawan musuh-musuhndu. Ola ban si la metunggung maka ola kam itadingken TUHAN.”

¹⁵“Adi sekalak budak kiam i bas mpuna nari ndahi kam mindo gelah ia ikawali, ola ulihkenndu ka ia man empuna.

¹⁶Banci ia tading i bas kutandu si ipilihna, janah ola bahan si la mehuli man bana.

¹⁷La banci kalak Israel pendahinna erlua-lua i bas rumah pertoton kalak perbegu, subuk ia dilaki ntah diberu. [112†]

¹⁸Duit si icariken alu dalan si bage pe, la banci ibaba ku rumah TUHAN Dibatandu jadi penggenepi sada sumpah. Ciga ate TUHAN man kalak si pendahinna erlua-lua i rumah pertoton kalak perbegu.

¹⁹Adi ipinjamkenndu sen ntah pangan, ntah kai gia si deban, man temanndu sapih-sapih kam bangsa Israel, ola bahan erbunga. [113†]

²⁰Kai si ipinjamkenndu e man bangsa si deban banci ibahanndu erbunga tapi la banci ibahanndu erbunga adi si minjam e sapih-sapih kam bangsa Israel. Ikutkenlah peraturen enda, maka TUHAN Dibatandu masu-masu kam i bas kerina si idahikenndu i bas negeri si nandangi iinganindu e.

²¹Adi kam erbahan perpadanen man TUHAN Dibatandu ola pelawen-lawen nehken perpadanenndu e, sabap lalap nge ituntut TUHAN padanndu e; e maka erdosa kam adi la isehkenndu padanndu e. [114†]

²²Labo erdosa adi la pe kam erban perpadanen man TUHAN,

²³tapi adi kam jine erpadan alu ukurndu ersuruh, inget nehken padanndu e.

²⁴Adi kam mentas arah sada dalan i bas peken anggur kalak, banci ipanndu buah anggur e asa besurndu, tapi la banci ibabandu tare ragandu ndarat i bas peken e nari.

²⁵Adi kam mentas arah dalan i bas juma kalak, banci iputikindu pagena man gugutenndu, tapi la banci sada ngkebena pe isabindu.”