Read Batak Karo ULANGEN 25 Bible Online

ULANGEN 25 - Batak Karo bible

ULANGEN 25

¹Mungkin lit dua kalak Israel lawes ku pengadilen ngaduken perkarana. Kenca iadili ieteh maka sekalak ersalah sekalak nari lang.

²Adi ukumen si ersalah ndai ukumen balbal, ipelangkem hakim ia lebe, e maka ibalbali. Piga kali ia arus ibalbali e, ngenen kesalahenna.

³Banci ia ibalbali empat puluh kali, tapi la banci lebih. Adi lebih asang si e, ia enggo ipekitik i lebe-lebe jelma si nterem. [124†]

⁴Ola sompel babah lembu si sangana ngerik.” [125†]

⁵“Adi dua kalak si ersenina tading ras-ras, sekalak i bas si dua e mate alu la lit nadingken sada pe anak dilaki; adi bage ndehara si enggo mbalu e la banci sereh man kalak si deban, i darat keluarga e. Rutang seninana ndai ngelakomanganisa. [126†]

⁶Anakna sintua si dilaki si ipupus kalak enda, ikira jadi anak seninana si enggo mate ndai; alu bage tetap lit sinursurna i Israel.

⁷Tapi adi seninana ndai la nggit ngelakomanganisa, iadap diberu e lah peminpin-peminpin kuta alu ngataken, ‘Senina perbulangenku la nggit ertanggung jawab. La ia nggit mereken sinursur man seninana i tengah-tengah bangsa Israel.’ [127†]

⁸Kenca bage peminpin-peminpin kuta ndilo ia jenari ngerana man bana. Adi tetap denga ia la nggit ngelakomangani diberu seninana e,

⁹ijumpai diberu si enggo mbalu e lah i adep-adepen peminpin-peminpin kuta, ibuatna sembelah selopna, icidurina ayo senina perbulangenna e nina, ‘Enda me jadina man kalak si la nggit mereken sinursur man seninana.’

¹⁰Keluargana e itandai i Israel ‘keluarga kalak si enggo itangtangi selopna.’ ”

¹¹“Adi dua dilaki sangana rubati, jenari sekalak i bas si dua e reh ndeharana nampatisa alu mecek kelamin imbang dilakina e,

¹²ola cidahken perkuah ate man ndeharana e; keret saja tanna.

¹³ [13-14] Ola kam nipu adi kam mpergunaken timbangen ntah sukat-sukat. [128†]

¹⁵Pakelah timbangen tah sukat-sukat si bujur, gelah gedang umurndu i negeri si ibereken TUHAN Dibatandu man bandu.

¹⁶Nembeh ate TUHAN man kalak penipu.”

¹⁷“Inget kuga perbahanen bangsa Amalek sanga kam reh i Mesir nari. [129†]

¹⁸La ia mbiar ngenen Dibata, e maka sanga kote dingen latih iakapndu iserangna kam i pudi nari, janah ibunuhina kerina kalak si merap arah pudi.

¹⁹E maka, adi enggo ibereken TUHAN Dibatandu man bandu negeri e, janah enggo aman kam ibahanna i bas kerina musuh-musuhndu si lit i kelewetndu, arus maka ibunuhndu kerina bangsa Amalek, gelah ise pe ola nari ngingetsa. Ola lupa si e!”