Read Batak Karo ULANGEN 26 Bible Online

ULANGEN 26 - Batak Karo bible

ULANGEN 26

¹“Adi enggo ikuasaindu negeri si ibereken TUHAN Dibatandu man bandu janah enggo kam ringan i je,

²tep-tep iperanindu jumandu, bagin si pemena si iperanindu arus itamakenndu ku bas sumpit, jenari arus ibabandu ku ingan ersembah si sada e. [130†]

³Dahilah imam si sanga erdahin i bas paksa si e, janah kataken man bana, ‘Ngaku aku man TUHAN Dibatangku maka enggo aku bengket ku negeri si ipadankenNa man nini-nini kami maka iberekenNa man kami.’

⁴Ialoken imam sumpit si babandu e, iamparkenna i lebe-lebe batar-batar persembahen TUHAN Dibatandu.

⁵Kenca bage arus ibelaskenndu kata-kata enda i lebe-lebe TUHAN, ‘Nini-niningku e me bangsa Aram, kalak perlajang, kalak si la lit tetap inganna tading, si maba keluargana ku Mesir. Sanga e sitik ngenca beliganna, tapi dungna ia jadi bangsa si mbelin ras megegeh.

⁶Kejam kal perbahanen bangsa Mesir man kami, ipaksana kami erdahin jadi budak.

⁷Dungna serko kami mindo penampat man TUHAN, Dibata nu nini-nini kami. Ibegi TUHAN perserko kami, idahNa kiniseran, kelatihen, ras kesuhsahen kami.

⁸Alu gegehNa si mbelin ipulahiNa kami i Mesir nari. IlakokenNa tanda kuasa, ibanNa kejadin-kejadin si mejin.

⁹IbabaNa kami i jah nari ku jenda, iberekenNa man kami negeri si mehuli ras mehumur enda.

¹⁰E maka genduari kubaba man TUHAN, bagin si pemena i bas ulih juma si enggo iberekenNa man bangku.’ Kenca bage amparken sumpit e i adep-adepen TUHAN janah ersembahlah kam i je.

¹¹Ermengkahlah atendu kerna kerina si mehulina si ibereken TUHAN Dibatandu man bandu ras man keluargandu. Bere maka kalak Lewi ras kalak pertandang pe ikut ras kam i bas pesta si meriah e.

¹²Tiap tahun peteluken bereken persembahen persepuluhenndu, e me sepersepuluh i bas ulih jumandu, man kalak Lewi, kalak pertandang, anak-anak melumang, ras man diberu balu-balu, maka i bas tep-tep perpulungen bias nakan si iperlukenna. Kenca enggo ibanndu bage, [131†]

¹³kataken lah man TUHAN, ‘Lanai lit tading persembahen persepuluhen e i bas rumahku erkiteken enggo kubereken e man kalak Lewi, kalak pertandang, anak-anak melumang, ras man diberu balu-balu rikutken si iperentahkenNdu maka kulakoken e. La kusimbak, ras la aku lupa sada pe perentah-perentahNdu kerna persembahen persepuluhen e.

¹⁴Sanga aku erceda ate pe labo e kupan. Sanga aku la bersih rikutken peraturen agama pe labo sitik pe kubaba persembahen persepuluhen e ndarat i bas rumahku nari. La kubereken sitik pe man persembahen kalak mate. Enggo kuikutken kam o, TUHAN. Enggo kulakoken kerina perentahNdu kerna persembahen persepuluhen e.

¹⁵Nehenlah ku teruh i bas inganndu si badia nari i Surga janah pasu-pasulah bangsandu Israel. Bereken pe pasu-pasuNdu man negeri si dem kebayaken ras mehumur enda sue ras si ipadankenNdu man nini-nini kami.’ ”

¹⁶“I bas wari enda TUHAN Dibatandu merentahken kam ngikutken kerina undang-undangNa; e maka ikutkenlah alu tutus ras alu bulat ukurndu.

¹⁷I bas wari enda enggo iakuindu TUHAN jadi Dibatandu. Enggo kam erpadan ngikutken Ia, make kerina undang-undangNa, ras ngikutken kerina perentah-perentahNa.

¹⁸I bas wari enda enggo ialoken TUHAN kam jadi bangsaNa, sue ras si ipadankenNa man bandu, janah iperentahkenNa kam ngikutken kerina undang-undangNa. [132†]

¹⁹IjadikenNa kam jadi sada bangsa si belinen asang kerina bangsa-bangsa si deban si enggo ijadikenNa, janah arah kam gelarNa terpuji dingen ermulia. Kam jadi bangsaNa sue ras si ipadankenNa.”