Read Batak Karo ULANGEN 27 Bible Online

ULANGEN 27 - Batak Karo bible

ULANGEN 27

¹Kenca bage, Musa ras peminpin-peminpin Israel ngerana man bangsa e, “Ikutkenlah kerina perentah-perentah si kubereken man bandu wari enda.

²Sanga kam ngepari Lau Jordan, bengket ku negeri si ibereken TUHAN Dibatandu man bandu, pajekkenlah piga-piga batu galang, lapisi alu pelester, [133†]

³kenca bage suratken i je undang-undang ras pengajaren enda. Adi kam enggo bengket ku bas negeri si mehumur dingen dem kebayaken si ipadanken TUHAN Dibata nu nini-ninindu man bandu,

⁴janah adi enggo ikeparindu Lau Jordan e, pajekken batu si bage i das Deleng Ebal, bagi si kuperentahken man bandu i bas wari enda, jenari lapisi alu pelester.

⁵Pajekken lah sada batar-batar batu, alu la make perkakas besi. [134†]

⁶Sabap kasa kai batar-batar si ipajekkenndu man TUHAN Dibatandu arus maka ibahan i bas batu si langa ipahat. I je arus ipersembahkenndu persembahen tutungen,

⁷janah i je ka pe arus ipersembahkenndu ras ipanndu persembahen persadanndu, janah ermengkahlah atendu i adep-adepen TUHAN Dibatandu.

⁸I babo batu si ipelester ndai suratken lah terang-terang tep-tep perkatan undang-undang Dibata.”

⁹E maka Musa, ras imam-imam kalak Lewi, ngerana man kerina bangsa Israel, “Perdiateken ras begikenlah, o bangsa Israel. Sendah kam enggo jadi bangsa TUHAN Dibatandu.

¹⁰E maka ikutken Ia, cikep kerina undang-undangNa si kubereken man bandu i bas wari enda.”

¹¹Ngerana Musa man bangsa Israel,

¹²“Kenca enggo kam ngepari Lau Jordan, tedislah suku Simeon, Lewi, Juda, Isakar, Jusup, ras suku Benyamin i datas Deleng Gerisim tupung pasu-pasu e ibelasken. [135†]

¹³Tapi suku Ruben, Gat, Aser, Sebulon, Dan ras suku Naptali tedis lah i datas Deleng Ebal tupung sumpah kebilangen e ibelasken.

¹⁴Ibelasken kalak Lewilah kata-kata enda alu sora megang,

¹⁵‘Dibata numpahi kalak si erbahan berhala batu, kayu, ntah logam, janah si ersembah ku je erbuni-buni. Sabap nembeh ate TUHAN adi nembah man berhala.’ E maka kerina bangsa e ngaloisa, ‘Amin!’ [136†]

¹⁶‘Dibata numpahi tep-tep kalak si la mehamat man nande ras bapana.’ E maka kerina bangsa e ngaloisa, ‘Amin!’ [137†]

¹⁷‘Dibata numpahi kalak si ngasak juma temanna si balengen.’ E maka kerina bangsa e ngaloisa, ‘Amin!’ [138†]

¹⁸‘Dibata numpahi kalak si erbanca papak kalak si pentang.’ E maka kerina bangsa e ngaloisa, ‘Amin!’ [139†]

¹⁹‘Dibata numpahi kalak si ngerampas hak kalak pertandang, hak anak-anak melumang, ras hak diberu balu-balu.’ E maka kerina bangsa e ngaloisa, ‘Amin!’ [140†]

²⁰‘Dibata numpahi kalak si njuruken bapana alu ersada kula ras sekalak diberu bapana e.’ E maka kerina bangsa e ngaloisa, ‘Amin!’ [141†]

²¹‘Dibata numpahi kalak si ersada kula ras rubia-rubia.’ E maka kerina bangsa e ngaloisa, ‘Amin!’ [142†]

²²‘Dibata numpahi kalak si ersada kula ras turangna sada nande sada bapa, ntah turangna sada nande pedauh bapa.’ E maka kerina bangsa e ngaloisa, ‘Amin!’ [143†]

²³‘Dibata numpahi kalak si ersada kula ras mamina.’ E maka kerina bangsa e ngaloisa, ‘Amin!’ [144†]

²⁴‘Dibata numpahi kalak si munuh erbuni-buni.’ E maka kerina bangsa e ngaloisa, ‘Amin!’

²⁵‘Dibata numpahi kalak si ngaloken upah guna munuh kalak si la ersalah.’ E maka kerina bangsa e ngaloisa, ‘Amin!’

²⁶‘Dibata numpahi kalak si la ngikutken kerina undang-undang ras pengajaren Dibata.’ E maka kerina bangsa e ngaloisa, ‘Amin!’ ” [145†]