Read Batak Karo ULANGEN 28 Bible Online

ULANGEN 28 - Batak Karo bible

ULANGEN 28

¹“Adi iikutkenndu TUHAN Dibatandu dingen alu tutus ipakendu kerina perentah-perentahNa si kubereken sendah man bandu, ibanNa kam jadi bangsa si belinen asang bangsa-bangsa si deban i babo doni enda. [146†]

²Ikutkenlah TUHAN Dibatandu maka kerina pasu-pasu enda jadi sikerajangenndu:

³ TUHAN masu-masu kuta ras jumandu.

⁴ TUHAN masu-masu kam maka kam ertuah, bayak, maka nterem pupusndu, melala pagendu, melala lembundu ras biri-birindu.

⁵ TUHAN masu-masu sinuan-sinuanndu ras pangan si ibahan i bas sinuan-sinuan e nari.

⁶ TUHAN masu-masu kerina pendahinndu.

⁷ TUHAN naluken musuhndu adi iperangna kam. Iperang musuhndu kam arah sada dalan, tapi kiam ia nadingken kam alu marpar-merap.

⁸ TUHAN Dibatandu masu-masu pendahinndu, ras ndemi lumbung-lumbungndu alu gandum. Ipasu-pasuNa kam i bas negeri si iberekenNa man bandu.

⁹Adi iikutkenndu TUHAN Dibatandu, dingen ilakokenndu kerina perentahNa, ijadikenNa kam jadi bangsaNa jine sue ras si enggo ipadankenNa.

¹⁰E maka kerina bangsa-bangsa i babo doni enda ngidah maka TUHAN enggo milih kam jadi bangsaNa, janah mbiar bangsa-bangsa e man bandu.

¹¹TUHAN mereken man bandu nterem pupusndu, lembu ras page i negeri si ipadankenNa man nini-ninindu maka iberekenna e man bandu.

¹²I bas paksana, ipesusurNa udan i bas perbendaharan kinibayakenNa i langit nari, dingen ipasu-pasuNa kerina pendahinndu, maka banci kam minjamken man bangsa-bangsa si deban, tapi la kam perlu minjam i bas bangsa si apai nari pe.

¹³TUHAN Dibatandu mahan kam jadi ikuten bangsa-bangsa si deban, labo jadi bangsa si ngikut-ngikut. Lalap kam menang, la penah talu, adi iikutkenndu alu tutus kerina perentahNa si kubereken man bandu i bas wari enda.

¹⁴Tapi ola ndigan pe ilanggarndu perentah-perentah e alu dalan si apai pe, ntah nembah dingen erdahin guna dibata-dibata si deban.”

¹⁵“Tapi adi la iikutkenndu TUHAN Dibatandu ras la atendu tutus make kerina perentah-perentah ras undang-undangNa si kubereken man bandu wari enda, kerina sumpah-sumpah si la mehuli enda jadi me man bandu:

¹⁶ TUHAN numpahi kuta ras jumandu.

¹⁷ TUHAN numpahi sinuan-sinuan ras pangan si ibahan i bas sinuan-sinuan e nari.

¹⁸ TUHAN numpahi kam seh maka la ibereNa man bandu nterem anak, pagenndu la mbuah ras asuh-asuhenndu la merih.

¹⁹ TUHAN numpahi kerina pendahindu.

²⁰Adi ibahanndu si jahat dingen itulakndu TUHAN, iberekenNa man bandu mara, keguluten, ras kiniseran i bas kerina pendahinndu, seh maka erpedasna kam kernep kerina.

²¹La erngadi-ngadi iberekenNa penakit man bandu, seh maka sada pe lanai kam lit tading i negeri si nandangi iinganindu e.

²²Ipekpek TUHAN kam alu penakit sinanahen, besar ras penakit marun. IbahanNa wari lego, ras angin si melas isuruhNa rembus ncedaken sinuan-sinuanndu. Kerina mara enda la erleka ras kam seh kam mate.

²³Udan pe la reh, erbanca tanehndu bali piherna ras besi.

²⁴Gancih udan ipesusur TUHAN man bandu udan abu ras kersik seh maka kam kernep.

²⁵Iban TUHAN maka italuken musuh-musuhndu kam. Ilawanndu musuhndu arah sada dalan, tapi marpar merap kam kiam nadingken ia. Kerina bangsa i babo doni enda mbiar ngidah si jadi man bandu.

²⁶Adi kam mate badanndu ipangani perik-perik ras rubia-rubia si meliar, janah la lit si nggurbasa.

²⁷Ibereken TUHAN bareh man bandu bali ras si ibahanNa man bangsa Mesir. IbahanNa maka badanndu dem alu cuit ugah, ras si megatel-gatel, tapi la lit tambarna.

²⁸Iban TUHAN maka kam adon, ipentangkenNa kam ras gulut ukurndu ibahanNa.

²⁹Suari pe kam dadap-dadap bali ras kalak pentang, tapi lalap la datndu dalan. Amin kai pe idahikenndu lalap la lit asilna. Tetap kam idedeh ras irampasi kalak, janah ise pe la lit si nampati kam.

³⁰Ertunangen kam ras sekalak si nguda-nguda, tapi kalak si deban ngempoisa. Ipajekkenndu rumah tapi la penah iinganindu. Isuanindu peken anggur tapi la penah ipanndu buahna.

³¹Lembundu igeleh i lebe-lebe matandu tapi la ipanndu sitik pe jukutna. Keledendu idahndu itegu kalak tapi lanai iulihkenna man bandu. Biri-birindu ibereken man imbang-imbangndu, janah la lit ise pe si nampati kam.

³²Iidahndu anak-anakndu ibereken jadi budak bangsa si deban. Tep-tep wari matandu tertulih-tulih nimai anak-anakndu mulih man bandu, tapi sia-sia, sabap lanai kap ia mulihken.

³³Sada bangsa si deban muat kerina ulih sinuan-sinuan si latih kal akapndu nuankenca, tapi kai pe la lit ialokenndu, seakatan pendedeh ras penggombang-gombangi kalak si la erngadi-ngadi.

³⁴Kiniseranndu erbanca kam adon.

³⁵Nahendu idemi TUHAN alu ugah si mesui si la ermalem-malem; badanndu dem alu bareh, mulai i bas tapak-tapak nahendu nari seh ku takalndu.

³⁶Itamaken TUHAN kam ras rajandu ku negeri si deban, si langa penah iinganindu tah nini-ninindu. I jah isembahndu dibata-dibata si ibahan i bas kayu ras batu nari.

³⁷I negeri inganndu ipemerap TUHAN e, sengget kalak kerina ngidah si jadi man bandu. Kam igombang-gombangi ras ipelingling kalak.

³⁸Mbue benih ierdangkenndu tapi sitik ngenca buahna, erkiteken ipangani labang sinuan-sinuanndu e.

³⁹Isuanindu peken anggur ras ipekena-kenandu, tapi la iperanindu buah anggur e ntah pe minem launa, erkiteken ipangani nipe-nipe batang anggur e.

⁴⁰I ja pe turah batang saitun i negerindu e, tapi la lit minak saitunndu, erkiteken mintes naktaken mutikna pe.

⁴¹Lit anakndu dilaki ras diberu, tapi kebenen me kam, erkiteken ibaba kalak ia jadi tabanen perang.

⁴²Kerina batang kayu ras sinuan-sinuanndu keri ipan labang.

⁴³Bangsa si deban si tading i negerindu erdekahna ertambahna kuasana, sedangken kam erdekahna reh urakna kuasandu.

⁴⁴Melala senna si man pinjamenndu, tapi senndu la lit sada pe man pinjamenna. Dungna ikuasaina kam, janah kam ngikut-ngikut nari.

⁴⁵Kerina mara enda jadi sikerajangenndu, janah lalap la erleka ras kam ngayak kam kernep kerina, erkiteken la iikutkenndu TUHAN Dibatandu ras la icikepndu kerina undang-undang si iberekenNa man bandu.

⁴⁶Mara enda ndai jadi tanda ukumen Dibata man bandu ras man sinursurndu asa lalap seh asa lalap.

⁴⁷Ipasu-pasu TUHAN kerina si ibahanndu, tapi la kam nggit ngelakoken si ngena ateNa alu meriah ras ukur menahang.

⁴⁸E maka ibere TUHAN kam iperbudak musuh-musuhndu. Muas, melihe, ras manjang-anjang me kam, janah i bas kai pe kam kekurangen. Idedeh musuhndu kam alu mesangat, seh kernep kam.

⁴⁹Ibaba TUHAN sada bangsa i tampuk doni nari ngelawan kam, bangsa si la iangkandu cakapna. Itangkisna kam bali ras penangkis rajawali.

⁵⁰Ia kejam janah la encidahken perkuah ate man kalak si nguda ntah metua.

⁵¹Ipanna asuh-asuhen ras sinuan-sinuanndu, e maka mate kelihen me kam. La sitik pe itadingkenna man bandu gandum, anggur, minak saitun, lembu ntah biri-biri, seh maka mate kam.

⁵²Iperangna tep-tep kuta i bas negeri si ibereken TUHAN Dibatandu man bandu, janah itembok bentengndu si meganjang si ipenalemndu ngampang-ngampangi kam, runtuh.

⁵³Sanga ikepung musuh-musuhndu kam, bage susahna ras sulit iakapndu muat nakan seh maka ipanndu anak-anakndu si ibereken TUHAN Dibatandu man bandu.

⁵⁴[54-55] Sedangken kalak si tuhu-tuhu pe ia kesusuren kalak bayak, sulit kal akapna i bas paksa ikepung musuh e, seh maka ipanna nge piga-piga anakna perban lanai lit pangan si deban. Anak si ipanna e sitik pe la iberena man seninana, tah man ndehara si ikelengina, ntah pe man anak-anakna si tading denga.

⁵⁵

⁵⁶[56-57] Diberu si tuhu-tuhu pe ia sinursur kalak bayak, si la penah ndedeh taneh pe perban bayakna, bage ka nge perbahanenna. Sanga ikepung musuh kutana, bage sulitna akapna muat nakan, seh maka alu erbuni-buni ipanna anakna si mbaru tubuh ras kerina si ndarat i bas beltekna nari kenca anak e tubuh. Sitik pe la ibagikenna man perbulangen si ikelengina ntah pe man anakna si deban. [147†]

⁵⁷

⁵⁸Adi la iikutkenndu alu tutus kerina pengajaren Dibata si isuratken i bas kitap enda, adi la ipehagandu gelar TUHAN Dibatandu si mulia dingen si mejin e,

⁵⁹iberekenNa man bandu ras man sinursurndu penakit si la banci malem, ras penakit langket-langket si la erpeltep-peltep.

⁶⁰IberekenNa sekali nari man bandu kerina penakit si man kebiaren si ialamindu i Mesir mbarenda, janah la ndigan pe kam malem-malem.

⁶¹IberekenNa pe erbage-bage penakit ras penakit langket-langket, si la isingetken i bas kitap undang-undang ras pengajaren Dibata enda, maka kam kernep.

⁶²Aminna pe beliganndu enggo seri ras bintang-bintang i langit tapi piga-piga kalak ngenca kam si tading nggeluh, erkiteken la iikutkenndu TUHAN Dibatandu.

⁶³Bagi riahna ukur TUHAN mereken kesangapen ras nambahi beliganndu jadi nterem, bage ka me pe riahna ukurNa ngkernepken ras masapken kam. IruahNa kam i negeri si nandangi iinganindu e nari.

⁶⁴Ipemerap TUHAN kam ku tengah-tengah bangsa si deban, i bas tampuk doni nari ku tampuk doni. I je isembahndu dibata-dibata si ibahan i bas kayu ras batu nari, dibata-dibata si langa penah isembahndu tah isembah nini-ninindu.

⁶⁵I japa pe la datndu dame. La lit ingan si banci ikataken inganndu. Idemi TUHAN kam alu kearun ate, la lit ketenangen, la lit pengarapen.

⁶⁶Geluhndu lalap i bas bahaya ras kebiaren. Suari ras berngi kam irimrimi kebiaren, kam nggeluh tetap mbiar mate.

⁶⁷Pusuhndu debet-debet dem kebiaren ngenehen kai saja si idahndu. Adi erpagi-pagi ben min atendu; adi enggo ben erpagi-pagi min atendu.

⁶⁸Ibaba TUHAN kam mulih ku Mesir tare kapal, aminna pe pernah ikatakenNa maka lanai ndigan pe kam mulihken ku jah. I jah icubakenndu ndayaken bandu jadi budak musuh-musuhndu, tapi ise pe la nggit nukur kam.”