Read Batak Karo ULANGEN 30 Bible Online

ULANGEN 30 - Batak Karo bible

ULANGEN 30

¹“Genduari enggo kupepilihken man bandu, pasu-pasu ntah sumpah. Adi enggo jadi enda kerina man bandu, janah kam sangana nggeluh i tengah-tengah bangsa ku ja kam ikerapken TUHAN Dibatandu, ingetndu me pilihen si enggo kubereken man bandu.

²Adi kam ras sinursurndu mulihken ku TUHAN, janah alu bulat ukurndu ikutkenndu perentah-perentahNa si kubereken man bandu wari enda,

³e maka mekuah ate TUHAN Dibatandu man bandu. I tengah-tengah bangsa-bangsa inganndu ipemerapNa e nari ibabaNa kam mulih, janah iberekenNa ka kesangapen man bandu.

⁴Aminna pe enggo kam merap seh ku tampuk doni, ipepulung ras ilegi TUHAN Dibatandu kam mulihken,

⁵gelah banci ka man bandu mulihken negeri ingan ninindu mbarenda tading. Kesangapenndu ras teremna beliganndu ndauh belinen asang si penah ibereken TUHAN man nini-ninindu nai.

⁶TUHAN Dibatandu mereken pusuh si patuh man bandu ras man sinursurndu, maka ikelengindu Ia alu bulat ukurndu gelah kam terus nggeluh i negeri e.

⁷IpindahkenNa kerina sumpah enda man musuh-musuhndu si rate nembeh ras ndehken kam,

⁸e maka iikutkenndu Ia ras icikepndu ka kerina perentah-perentah si kubereken man bandu wari enda.

⁹TUHAN erbanca maka kam sangap i bas kerina si idahikenndu; ertuah kam, merih asuh-asuhenndu, ras mbuah sinuan-sinuanndu. Bagi megahna iakap TUHAN mereken kesangapen man nini-ninindu bage me pe megahna akapNa mereken kesangapen bandu.

¹⁰Tapi arus maka iikutkenndu Ia ras icikepndu kerina undang-undangNa si isuratken i bas kitap pengajarenNa enda. Arus maka jera kam ku Ia alu bulat ukurndu.

¹¹Perentah si kubereken bandu wari enda, labo meserasa, ntah la terjakandu.

¹²Labo i langit cibalna. E maka labo perlu kam nungkun, ‘Ise nge ndia nangkih ngelegi undang-undang e man kami, maka banci ibegiken ras iikutken kami?’ [152†]

¹³Labo i kepar lawit. E maka labo perlu kam nungkun, ‘Ise nge ndia lawes ngepari lawit ngelegi undang-undang e man kami, maka banci ibegiken ras iikutken kami?’

¹⁴Lang! Undang-undang e lit kap bas kam i jenda. Ietehndu e, banci ibelaskenndu, e maka genduari ikutken dage.

¹⁵Sendah kupepilihken man bandu, si mehuli ntah si jahat, kegeluhen ntah kematen.

¹⁶Adi iikutkenndu perentah-perentah TUHAN Dibatandu, si kubereken man bandu wari enda, adi keleng atendu Ia, iikutkendu Ia, janah icikepndu kerina undang-undangNa, e maka sangap kam, janah kam jadi bangsa si nterem. TUHAN Dibatandu masu-masu kam i negeri si nandangi iinganindu e.

¹⁷Tapi adi la iikutkenndu ras la ibegikenndu, tapi nggit kam ibabai kalak papak gelah nembah man dibata-dibata si deban,

¹⁸kernep me kam. E maka kupersingeti kam genduari i jenda: la kam ndekah nggeluh i bas negeri si i kepar Lau Jordan si nandangi iinganindu e.

¹⁹Kupepilihken man bandu, siapai atendu: kegeluhen ntah kematen, pasu-pasu Dibata ntah sumpah Dibata; kulebuh langit ras doni jadi saksi kerna pilihenndu e. E maka pilihlah kegeluhen maka kam ras kesusurenndu nggeluh.

²⁰Kelengilah TUHAN Dibatandu, ikutken lah Ia, ras setia lah man baNa, e maka umurndu ras umur sinursurndu ipegedang i bas negeri si enggo ipadanken TUHAN Dibatandu merekenca man nini-ninindu Abraham, Isak ras Jakup.” [153†]